ஜெ.வுக்காக எங்கள் கூட்டணிக்கு வர விரும்பினால்..: இன்னும் விஜயகாந்தை எதிர்பார்க்கும் ஈவிகேஎஸ்

By Siva

Published: Sunday, March 20, 2016, 12:58 [IST]

Subscribe to Oneindia Tamil

சென்னை: ஜெயலலிதாவை எதிர்க்க, தோற்கடிக்க நினைத்து விஜயகாந்த் எங்கள் கூட்டணிக்கு வர விரும்பினால் கூட்டணி கட்சிகளுடன் கலந்தாலோசித்து முடிவு செய்வோம் என தமிழக காங்கிரஸ் தலைவர் ஈ.வி.கே.எஸ். இளங்கோவன் தெரிவித்துள்ளார்.

உடல் நலக்குறைவு காரணமாக மருத்துவமனையில் அனுமதிக்கப்பட்டிருந்த தமிழக காங்கிரஸ் தலைவர் ஈ.வி.கே.எஸ். இளங்கோவன் வீடு திரும்பியுள்ளார். அவர் சென்னையில் உள்ள கட்சி அலுவலகமான சத்தியமூர்த்தி பவனுக்கு வந்தார். அவருக்கு கட்சி பெண்கள் ஆரத்தி எடுத்து பூசனிக்காய் உடைத்தனர்.

கட்சியினரை சந்தித்த பிறகு அவர் செய்தியாளர்களுக்கு பேட்டி அளித்தார். அப்போது அவர் கூறுகையில்,

அமைச்சர்கள்

தமிழகத்தில் அசாதாரண சூழல் நிலவி வருகிறது. 3,4 அமைச்சர்களை வீட்டுக் காவலில் இருக்க முதல்வர் ஜெயலலிதா உத்தரவிட்டுள்ளதாக தெரிகிறது. இது போன்ற செய்திகள் கடந்த 2 நாட்களாக வெளியாகி வருகிறது. இது குறித்து ஜெயலலிதா தான் விளக்கம் அளிக்க வேண்டும்.

திமுக கூட்டணி

காங்கிரஸ்-திமுக கூட்டணி உறுதியாகிவிட்டது. இதனை திமுக தலைவர் கருணாநிதி மற்றும் காங்கிரஸ் தலைவர் குலாம் நபி ஆசாத் ஆகியோர் ஒப்புக் கொண்டுள்ளனர். தொகுதி பங்கீடு தொடர்பாக இன்னும் 2,3 நாட்களில் பேச்சுவார்த்தை துவங்கப்படும். பேச்சுவார்த்தை நடத்தும் குழு உறுப்பினர்கள் யார், யார் என்பது குறித்து இன்று அறிவிப்பு வெளியாகும்.

தேமுதிக

கூட்டணிக்கு வருமாறு தேமுதிகவை அழைத்தோம். ஆனால் அவர் வராததால் விட்டுவிட்டோம். அதே சமயம் ஜெயலலிதாவை எதிர்க்க, தோற்கடிக்க நினைத்து விஜயகாந்த் எங்கள் கூட்டணிக்கு வர விரும்பினால் கூட்டணி கட்சிகளுடன் கலந்தாலோசித்து முடிவு செய்வோம்.

ஜெயலலிதா

ஜெயலலிதாவை தோற்கடிக்கத் தேவைப்படும் பலம் திமுக-காங்கிரஸ் கூட்டணிக்கு உள்ளது. எங்கள் கூட்டணி வலுவான கூட்டணி ஆகும். வரும் சட்டசபை தேர்தலில் நாங்கள் வெற்றி பெற்று ஜெயலலிதாவை வீட்டிற்கு அனுப்பி வைப்போம். முடிந்தால் சிறைக்கு அனுப்பி வைப்போம்.

மக்கள் நலக் கூட்டணி

மக்கள் நலக் கூட்டணி வலுவாக உள்ளது என்று அதன் தலைவர்கள் தெரிவிப்பது காக்கைக்கும் தன் குஞ்சு பொன் குஞ்சு என்பது போன்றது. வைகோ பேசுவது எதுவும் இதுவரை நடந்ததாக தமிழக அரசியல் வரலாற்றிலேயே இடம் இல்லை. கடந்த 30 ஆண்டுகளில் அவர் பேசுவதற்கு எதிராகத் தான் நடந்துள்ளது.

Published On March 20, 2016