திருச்செந்தூர் அருகே கடலில் மிதந்து வந்த மர்ம பொருளால் பரபரப்பு!

திருச்செந்தூர்: தூத்துக்குடி மாவட்டத்தில், திருச்செந்தூர் அருகே மர்ம பொருள் கடலில் மிதந்து வந்ததால் அதை எடுத்து மரைன் போலீசிடம் மீனவர்கள் ஓப்படைத்தனர். அதனை கடலோர காவல் படையினர் ஆய்வு செய்து வருகின்றனர்.

தூத்துக்குடி மாவட்டம் திருச்செந்தூர் ஆலந்தலை அருகே கடலில் சுமார் 5 மைல் தொலைவில் சில மீனவர்கள் மீன் பிடித்து கொண்டிருந்தனர். அப்போது கடலில் மஞ்சள் நிறத்தில் வாக்கி டாக்கி போன்ற கருவி மிதந்துள்ளது. அதை கண்ட அவர்கள் அதனை மீ்ட்டு ஆலந்தலை மரைன் போலீசிடம் ஒப்படைத்தனர். போலீசார் விசாரணையில் அந்த கருவி கப்பல்களில் பயன்படுத்தப்படும் எமர்ஜென்சி கருவி போல் இருந்ததால் அதை கடலோர காவல் படையினரிடம் ஓப்படைத்தனர்.

இதற்கிடையே கடலில் மிதந்த அந்த கருவியில் இருந்த ஒரு சிக்னல் கடலோர காவல் படை கப்பலில் உள்ள ரேடாரில் கிடைத்துள்ளது. இதனால் இரண்டு கடலோர காவல் படை ரோந்து படகுகள் மற்றும் கடலோர காவல் படையின் டோனியர் ரக விமானம் மூலம் ஆலந்தலை முழுவதும் அவர்கள் தேடியுள்ளனர்.

அவர்களுக்கு மரைன் போலீஸ் மூலம் தகவல் தெரிவிக்கப்பட்டு அந்த கருவியை அவர்கள் ஆய்வு செய்து வருகின்றனர். ஆய்வில் அது கப்பல் ஆபத்து காலத்தில் பயன்படுத்தப்படும் இப்ரிப் எனப்படும் சிக்னல் அனுப்பும் கருவி என்று கண்டறியப்பட்டது. இது எந்த படகு மற்றும் கப்பலில் இருந்து விழுந்தது என்பது அதில் பதிவாகி இருக்கும் ஐஎம்ஓ, எம்எம்எஸ்ஐ ஆகிய கப்பல் பதிவு நம்பர்களை வைத்து விசாரணை நடத்தி வருகின்றனர்.

இது கப்பல் கடலில் மூழ்கும் போது தண்ணீரில் விழுந்ததும் தானாக சிக்னல் கொடுக்க தொடங்கும். இதில் ஜிபிஎஸ் வசதி இருப்பதால் விபத்து கப்பல் எந்த இடத்தில் எந்த திசையில் இருக்கிறது என்பதை துல்லியாக கணிக்க முடியும் என்று கூறப்படுகிறது.

English summary

Fishermen found unidentified object in the sea, police started their investigation.