தக்காளி கிலோ ரூ.43, வெங்காயம் ரூ.39: பண்ணை பசுமைக் கடைகளில் விற்பனை

சென்னை: மழையால் காய்கறிகளின் விலை உயர்வதை கட்டுப்படுத்தும் வகையில் சென்னையில் பண்ணை பசுமை கடைகள் கூடுதலாக திறக்கப்பட்டுள்ளன. முதல்வர் ஜெயலலிதாவின் உத்தரவின் பேரில் திறக்கப்பட்டுள்ள இந்த காய்கறிக் கடைகள் அனைத்தும் தற்காலிகமானவை என தெரிவிக்கப்பட்டுள்ளது.

பசுமைப் பண்ணைக் கடைகளில் விலை குறைவான அளவில் காய்கறிகள் விற்பனை செய்யப்படுவதால் பொதுமக்கள் அதிக அளவில் காய்கறிகளை வாங்கிச் செல்கின்றனர்.

சென்னையில் பண்ணை பசுமை கடைகள் கூடுதலாக திறக்கப்பட்டுள்ள நிலையில், பிற சில்லறை விற்பனை கடைகளிலும் பண்ணை பசுமை கடைகளிலும் உள்ள விலை வித்தியாசம் அதிகம் உள்ளது.

பண்ணை பசுமை கடைகளில் தக்காளி, கத்தரிக்காய், சுரக்காய், அவரை, உருளை,கேரட், பீட்ரூட் போன்ற காய்கள், தருமபுரி, நீலகிரி, திண்டிவனம் உள்ளிட்ட பகுதிகளில் இருந்து நேரடியாக அரசால் கொள்முதல் செய்யப்பட்டு விற்பனை செய்யப்படுகின்றன. அவற்றின் விலை நிலவரத்தை தெரிந்து கொள்ளுங்கள்.

வெங்காயம் விலை குறைவு

பண்ணை பசுமை கடைகளில் பெரிய வெங்காயம் கிலோ ஒன்றுக்கு 39 ரூபாயாக நிர்ணயிக்கப்பட்டுள்ளது. பிற கடைகளில் இதன் விலை 50 முதல் 60 ரூபாய் வரை உள்ளது.

தக்காளி விலை

பண்ணை பசுமை கடையில் தக்காளியின் விலை 43 ரூபாயாக உள்ள நிலையில் பிற கடைகளில் இது 100 ரூபாயாக உள்ளது. கத்தரிக்காய் விலை பண்ணை பசுமை கடைகளில் 25 ரூபாய்க்கு விற்கப்படுகிறது. பிற கடைகளில் இது 80 ரூபாய் வரை விற்கப்படுகிறது.

கிழங்குகளின் விலை

உருளைக்கிழங்கு விலை பண்ணை பசுமை கடைகளில் 23 ரூபாயாகவும் பிற கடைகளில் 40 ரூபாயாக உள்ளது. பீட்ரூட் விலை பண்ணை பசுமை கடைகளில் கிலோ 19 ரூபாய் என நிர்ணயிக்கப்பட்டுள்ளது. பிற கடைகளில் இது 40 ரூபாய்க்கு விற்கப்படுகிறது.

பெண்கள் மகிழ்ச்சி

புடலங்காய் விலை பசுமை பண்ணைகடைகளில் 27 ரூபாயாகவும் பிற கடைகளில் 40 ரூபாயாகவும் இருக்கிறது. வெளியில் சில்லறையில் விற்பனை செய்யப்படும் கடைகளை விட பண்ணை பசுமைக் கடைகளில் குறைந்த விலையில் காய்கறிகள் கிடைப்பதால் ஏராளமானோர் மகிழ்ச்சியுடன் வாங்கிச் செல்கின்றனர்.

தமிழகம் முழுவதும் திறக்கப்படுமா?

சென்னையில் மட்டுமல்லாது தமிழகம் முழுவதும் முக்கிய நகரங்களில் விலைவாசியை கட்டுப்படுத்த பண்ணை பசுமை காய்கறி கடைகளைத் திறக்க வேண்டும் என்ற கோரிக்கை எழுந்துள்ளது. முதல்வர் மனது வைப்பாரா?

English summary

Chief Minister Jayalalithaa on Tuesday announced the opening of 50 temporary vegetable shops in the city where vegetables would be sold at affordable prices.These outlets would function in addition to the existing 42 ‘Pannai Pasumai’ (Farm Fresh) shops in the city.