கீழ இறங்கு..வெளியே வா! தப்பா பேசுவியா? ஜோதிமணியை வழிமறித்த அதிமுக மாஜி எம்எல்ஏ உறவுகள்- பரபர வீடியோ!
வேடசந்தூர்: கரூர் லோக்சபா தொகுதி காங்கிரஸ் வேட்பாளர் ஜோதிமணி எம்பி வேடசந்தூர் சட்டசபை தொகுதிக்குட்பட்ட கிராமங்களில் பிரசாரம் செய்த போது அதிமுக முன்னாள் எம்.எல்.ஏ. டாக்டர் விபிபி பரமசிவத்தின் உறவினர்கள் ஜோதிமணி எம்பியின் காரை மறித்து ஆவேசமாக எதிர்ப்பு தெரிவித்ததால் பரபரப்பு ஏற்பட்டது.
வேடசந்தூர் தொகுதிக்குட்பட்ட கிராமங்களில் ஜோதிமணி நேற்று சூறாவளி பிரசாரம் செய்தார். வேடசந்தூர் தொகுதி திமுக எம்.எல்.ஏ. காந்திராஜனும் உடன் சென்றார்.
வேடசந்தூர் குக்கிராமங்களில் பிரசாரம் செய்துவிட்டு திரும்பிய ஜோதிமணியின் கார் இரவு நேரத்தில் திடீரென ஒரு கிராமத்தில் வழி மறிக்கப்பட்டது. ஒரு இளம் பெண் தலைமையில் வயதான சிலரும் காரை வழி மறித்து நின்றனர். ஏம்மா முதல்ல நீ கீழே இறங்கு.. காரை ஏத்திடுவியா.. ஏத்து பார்க்கலாம்..பிரசாரம் செய்.. ஓட்டு கேளு.. வேணாம்னா சொல்றோம்.. அதுக்கு எங்க அண்ணனை (வேடசந்தூர் தொகுதி முன்னாள் அதிமுக எம்.எல்.ஏ. டாக்டர் விபிபி பரமசிவம்) தப்பா பேசுற.. எதுக்கு எங்க அண்ணனை தப்பா பேசுற என அந்த இளம் பெண் ஆவேசமாகவும் சரமாரியாகவும் கேள்வி கேட்டு கொண்டே இருந்தார்.
அப்போது ஜோதிமணி காரில் பின்னால் வந்த வேடசந்தூர் தொகுதி திமுக எம்.எல்.ஏ காந்திராஜன் இறங்கி, இளம் பெண் உட்பட பெரியவர்களை சமாதானப்படுத்தினார். அப்போதும் ஆவேசம் அடங்காத அந்த இளம் பெண் எம்.எல்.ஏ. காந்திராஜனை நோக்கி, பெரியப்பா.. அந்த அம்மா கிட்ட சொல்லி வையுங்க.. எதுக்கு எங்க அண்ணனை பத்தி தப்பா பேசுது.. இவங்க ஓட்டுகேட்டு போயிடுவாங்க.. நல்லது கெட்டதுக்கு எங்க அண்ணதானே வந்து நிக்குது.. ஓட்டுன்னா ஓட்டு மட்டும் கேட்கனும்.. தப்பா எதுக்கு பேசனும்? என ஆவேசம் குறையாமல் கேட்டுக் கொண்டே இருந்தார். அதிமுக முன்னாள் எம்.எல்.ஏ. டாக்டர் விபிபி பரமசிவம், சிட்டிங் திமுக எம்.எல்.ஏ. காந்திராஜன் இருவரும் உறவினர்கள்தான். ஜோதிமணியின் காரை வழிமறித்த பெண்ணும் இருவருக்கும் உறவினர்தான். அதனால் உறவு முறையில் காந்திராஜனிடம் பெரியப்பா என்றும் பரமசிவத்தை அண்ணன் என்றும் அழைத்து ஜோதிமணியிடம் மல்லுக்கட்டி இருக்கிறாராம்.
Click it and Unblock the Notifications
Sign in with Google