சாத்தான்குளம் சாலைகளில் விளையும் "தங்கம்!" கண்டுகொள்ளாத மக்கள்!

By Oneindia Staff

Updated: Monday, April 14, 2025, 18:11 [IST]

Subscribe to Oneindia Tamil

திருச்செந்தூர்: தூத்துக்குடி மாவட்டம் சாத்தான்குளம் மற்றும் அதன் சுற்றுவட்டாரப் பகுதிகளில் சாலையோரங்களில் யாரும் கண்டுகொள்ளாத பொக்கிஷம் ஒன்று செழித்து வளர்ந்து கொண்டிருக்கிறது. அதுதான் "பொன் ஆவாரை" என்று உள்ளூர் மக்களால் அழைக்கப்படும் "சாய அவுரி" மூலிகைச் செடி. அடர் பச்சை நிற இலைகளையும், மஞ்சள் நிற பூக்களையும் கொண்டு காணப்படும் இந்த மூலிகை, பல்வேறு மருத்துவ குணங்களை தன்னகத்தே கொண்டுள்ளது என்பது பலருக்கும் தெரியாத உண்மை.

இயற்கை முறையில் தலைக்கு சாயம் போடுவதற்காகவும், குடல் புண் மற்றும் மலச்சிக்கல் போன்ற பிரச்சனைகளுக்கு மருந்தாகவும் இந்த மூலிகை காலம் காலமாக பயன்படுத்தப்பட்டு வந்துள்ளது. ஆனால், நாகரீக மோகம் தலைவிரித்தாடும் இந்த காலத்தில், பலரும் இதன் அருமையை மறந்து செயற்கை சாயங்களையும், ஆங்கில மருந்துகளையும் நாடிச் செல்கின்றனர். இதனால், சாலையோரங்களில் இலவசமாக கிடைக்கும் இந்த மருத்துவ பொக்கிஷம் வீணாகிப் போகிறது.

சாத்தான்குளம் பகுதியில் இந்த மூலிகை அதிக அளவில் வளர்ந்திருந்தும், பெரும்பாலான மக்கள் இதன் மருத்துவ குணங்கள் குறித்து அறியாமல் இருப்பது வேதனை அளிக்கிறது. தினமும் இந்த சாலையோரங்களை கடந்து செல்லும் மக்கள், இந்த மூலிகையை ஒரு சாதாரண களைச்செடியாகவே கருதி கடந்து செல்கின்றனர்.

இந்நிலையில், மூலிகை மருத்துவர்கள் கவலை தெரிவித்துள்ளனர். "சாத்தான்குளம் பகுதியில் இவ்வளவு மருத்துவ குணம் வாய்ந்த மூலிகை செழித்து வளர்வது ஒரு வரப்பிரசாதம். இதனை முறையாகப் பயன்படுத்தினால், உள்ளூர் மக்களின் ஆரோக்கியத்திற்கும் பொருளாதாரத்திற்கும் மிகவும் பயனுள்ளதாக இருக்கும். இப்பகுதியில் ஒரு மூலிகை பண்ணை அமைத்து, இந்த பொன் ஆவாரை போன்ற மூலிகைகளை முறையாகப் பராமரித்து, அவற்றிலிருந்து மதிப்பு கூட்டப்பட்ட பொருட்களைத் தயாரித்து விற்பனை செய்யலாம். இதன் மூலம் உள்ளூர் மக்களுக்கு வேலை வாய்ப்பும் கிடைக்கும்" என்று அவர்கள் கூறுகின்றனர்.

எனவே, சாத்தான்குளம் பகுதி மக்கள் இந்த அரிய மூலிகையின் மகத்துவத்தை உணர்ந்து, அதனைப் பாதுகாக்க முன்வர வேண்டும். மேலும், அரசு அதிகாரிகளும் இதுகுறித்து விழிப்புணர்வு ஏற்படுத்தி, மூலிகை பண்ணை அமைப்பதற்கான முயற்சிகளை மேற்கொள்ள வேண்டும் என்பதே அனைவரின் எதிர்பார்ப்பாகும். ஒரு காலத்தில் நம் முன்னோர்கள் பயன்படுத்திய இந்த இயற்கை மருத்துவத்தை மீட்டெடுப்பதன் மூலம், ஆரோக்கியமான வாழ்வை நாம் பெற முடியும் என்பதில் எந்த சந்தேகமும் இல்லை.