நேரா நேரத்துக்கு சாப்பிட்டு நிம்மதியாக இருக்கும் அமைச்சர்கள்.. "அம்மா" இல்லாததால்!
சென்னை: வழக்கமாக அம்மாக்கள்தான் பிள்ளைகள் நேரா நேரத்துக்குச் சாப்பிட்டார்களா, இல்லையா, உடம்பைக் கவனித்துக் கொள்கிறார்களா என்று பார்த்துக் கொள்வார்கள். ஆனால் "அம்மா" முதல்வராக இருந்தவரை அவரது "பிள்ளைகள்" அதாவது அமைச்சர்கள் சரியான நேரத்துக்குச் சாப்பிட முடியாமல், நேரம் கெட்ட நேரத்தில் சாப்பிட்டு வந்தனர். அதுகுறித்து "அம்மா"வும் கண்டு கொண்டாரா என்பது தெரியவில்லை. ஆனால் இப்போது நேரா நேரத்துக்கு சரியான முறையில் சாப்பிடும் வாய்ப்பு அமைச்சர்களுக்குக் கிடைத்துள்ளதாம்.
ஜெயலலிதா முதல்வராக இருந்தவரை அமைச்சர்களை விரல் நுனியில் வைத்திருந்தார் ஜெயலலிதா. அவர் என்ன கேட்பார், என்ன மாதிரி விசாரிப்பார் என்று தெரியாமல் எப்போதுமே ஒரு விதமான டென்ஷனில் இருப்பார்கள் அமைச்சர்கள்.
ஜெயலலிதா முதல்வராக இருந்தவரை, அமைச்சர்களால் உட்காரக் கூட முடியாது. சரியான நேரத்தில் சாப்பிட முடியாது. ஜெயலலிதா அலுவலகத்திலிருந்து புறப்படுகிறார் என்றால் அவர் புறப்படுவதற்கு ஒரு மணி நேரத்திற்கு முன்பு அமைச்சர்களுக்குத் தகவல் போய் விடும்.
உடனே சீட்டை விட்டு எழுந்து கீழே ஓடி வந்து வரிசை கட்டி நிற்பார்கள். ஜெயலலிதா வந்து காரில் ஏறிச் செல்லும்போது கை கூப்பி, குணிந்து வணங்கி வழியனுப்பி விட்டுத்தான் திரும்புவார்கள். இதே கதை தான் அவர் வீட்டில் இருந்து கிளம்பி கோட்டைக்கு வரும்போதும். மக்களின் முதல்வரின் வண்டி போயஸ் கார்டன் கேட்டை தாண்டியவுடனேயே எல்லா அமைச்சர்களும் கோட்டை வாசலில் வரிசையாக நிற்க ஆரம்பித்துவிடுவர்.
அவர் அலுவலகத்தில் இருக்கும்போது எந்த அமைச்சரும் சாப்பிடக் கூட மாட்டார்களாம். மாறாக ஜெயலலிதா போன பின்னர்தான் சாப்பிடவே உட்காருவார்கள். சில நேரங்களில் மதிய உணவைத் தாண்டியும் கூட ஜெயலலிதா அலுவலகத்தில் இருப்பார். அப்போதெல்லாம் சாப்பிட முடியாமல் தவிப்பார்கள் அமைச்சர் பெருமக்கள்.
அமைச்சர்கள் பலருக்கு சர்க்கரை வியாதி உள்ளிட்டவை உள்ளன. ஆனாலும் சரியான நேரத்தில் சாப்பிட முடியாத நிலையில் தவித்து வந்தார்கள்.
தற்போது ஜெயலலிதா முதல்வராக இல்லாததால் பழைய மாதிரி கெடுபிடி, ஹரிபரி, பதட்டம் என்று எதுவும் இல்லை. எனவே அமைச்சர்கள் அனைவரும் காலா காலத்தில், நேரா நேரத்தில் சாப்பிட்டு நிம்மதியாக, அமைதியாக, ஹாயாக இருக்கிறார்களாம்.
எப்படியோ "அம்மா" வருவதற்குள் உடம்பை சரி செய்து கொண்டால் சரிதான்!
Click it and Unblock the Notifications
Sign in with Google