மாடு பிடிபட்டது.. உண்மையைச் சொல்லி மாட்டிக்கொண்டார் எங்க மதுரைக்காரர்.. கலாய்த்த செல்லூர் ராஜூ!

மதுரை : திமுக அமைச்சரவை மாற்றம் குறித்து விமர்சித்த அதிமுக முன்னாள் அமைச்சர் செல்லூர் ராஜூ, "தமிழ்நாடு அமைச்சரவை மாற்றப்பட்டதற்கு முழுக்க முழுக்க காரணம் 30,000 கோடி ரூபாய் விவகாரம் தான். உண்மையைச் சொல்லி மதுரைக்காரர் மாட்டிக் கொண்டார். மாடு பிடிபட்டது. அமைச்சரவையில் இருந்து அவரை நீக்கி விட்டால் அவர் கூறியது உண்மையாகிவிடும் என்பதற்காக ஒரு சாதாரண இலாகாவுக்கு மாற்றப்பட்டுள்ளார்." எனத் தெரிவித்துள்ளார்.

அதிமுக பொதுச் செயலாளர் எடப்பாடி பழனிசாமியின் 69வது பிறந்தநாளை தமிழ்நாடு முழுவதும் உள்ள அக்கட்சியின் நிர்வாகிகள், தொண்டர்கள் கொண்டாடி வருகின்றனர். அதன் ஒரு பகுதியாக மதுரையில் முன்னாள் அமைச்சரும், மாவட்ட செயலாளருமான செல்லூர் ராஜூ தலைமையில் அதிமுகவினர் எடப்பாடி பழனிச்சாமியின் பிறந்த நாளை கேக் வெட்டி கொண்டாடினர்.

இதனைத் தொடர்ந்து முன்னாள் அமைச்சர் செல்லூர் ராஜூ செய்தியாளர்களை சந்தித்தார். அப்போது தமிழ்நாடு அமைச்சரவை மாற்றம் குறித்து செய்தியாளர்கள் கேள்வி எழுப்பினர். அதற்கு பதிலளித்த செல்லூர் ராஜூ, "தமிழ்நாடு அமைச்சரவை மாற்றப்பட்டதற்கு முழுக்க முழுக்க காரணம் 30,000 கோடி ரூபாய் விவகாரம் தான். தவளை தன் வாயால் கெடும். அதுபோல உண்மையைச் சொல்லி மதுரைக்காரர் மாட்டிக் கொண்டார்.

மாடு பிடிபட்டது, மதுரை பழனிவேல் தியாகராஜன் பிடிபட்டு விட்டார். அமைச்சரவையில் இருந்து அவரை நீக்கி விட்டால் அவர் கூறியது உண்மையாகிவிடும் என்பதற்காக ஒரு சாதாரண இலாகாவுக்கு அமைச்சராக மாற்றப்பட்டுள்ளார். இளம் அமைச்சரான மனோ தங்கராஜ் வைத்திருந்த இலாகாவை பழனிவேல் தியாகராஜனுக்கு வழங்கியுள்ளனர்.

தமிழ்நாடு முதல்வருக்கும் அவருடைய குடும்பத்தினருக்கும் பிடிஆர் பழனிவேல் தியாகராஜன் மீது அதிகப்படியான கோபம் உள்ளது. குறிப்பாக உதயநிதி ஸ்டாலினுக்கும், சபரீசனுக்கும் பழனிவேல் தியாகராஜன் மீது கடுமையான கோபம் உள்ளது என்பது அமைச்சரவை மாற்றத்தில் தெரிகிறது, இதுதான் உண்மை.

நிதித்துறை அமைச்சராக பொறுப்பேற்றுள்ள தங்கம் தென்னரசு சிறந்த நிர்வாகி. எந்த துறையிலும் அவர் முத்திரை பதிக்கக்கூடியவர். இன்றுள்ள அமைச்சர்களில், பிறரை தரக்குறைவாக பேசாதவர். நிதித் துறையிலும் அவர் சிறப்பாக செயல்படுவார். அவருக்கு பாராட்டுகள்." எனத் தெரிவித்துள்ளார் செல்லூர் ராஜூ.

English summary

Criticizing the DMK cabinet reshuffle, former AIADMK minister Sellur Raju said, “The reason for the Tamil Nadu cabinet reshuffle is the Rs 30,000 crore issue. The Madurai man was trapped by telling the truth."