கருணாஸ் கைது பாரபட்சமானது.. விஜயகாந்த், தலைவர்கள் கண்டனம்

எச்.ராஜாவை ஏன் கைது செய்யவில்லை என தலைவர்கள் கேள்வி எழுப்பியுள்ளனர்.

Published: Sunday, September 23, 2018, 14:18 [IST]

Subscribe to Oneindia Tamil

பாஜக தலைவர்கள்

கருணாஸ் கைது செய்யப்பட்டதற்கு பல்வேறு வகையான கருத்துக்கள் நிலவி வருகின்றன. கருணாஸ் கைது செய்யப்பட்டது சரியே என்றும், வரம்பு மீறி பேசியற்கான சரியான தண்டனைதான் இது என்றும் மாநில பாஜக தலைவர் தமிழிசை சவுந்தராஜன், மூத்த தலைவர்கள் பொன்.ராதாகிருஷ்ணன், இல.கணேசன் போன்றோர் ஒட்டுமொத்தமாக சொல்லிவைத்தாற்போல் ஒரே மாதிரியான கருத்தை தெரிவித்துள்ளனர். மேலும் எச்.ராஜா விவகாரம் பற்றி பேசும்போது மட்டும், அவர் நீதிமன்றத்தில் சட்டப்படி எதிர்கொள்வார் என்று சொல்லிவிட்டார்கள்.

காட்டமான கேள்விகள்

ஆனால் கருணாஸ் சாதி உணர்வை தூண்டியதாக பேசினார் என்றால், எச்.ராஜாவும் மத உணர்வை தூண்டும் வகையில் பேசவில்லையா? என்றும் கருணாஸை கைது செய்தது போல் ராஜாவை ஏன் கைது செய்யவில்லை என்றும் சீமான், இரா.முத்தரசன், ஜவாஹிருல்லா போன்ற தமிழக அரசியல் கட்சி தலைவர்கள் காட்டமாக கேள்விகளை எழுப்பி உள்ளனர்.

விஜயகாந்த் கண்டனம்

இதில் ஒருபடிமேல போய் தேமுதிக தலைவர் விஜயகாந்த், கருணாஸை கைது செய்ததற்கு கண்டனமே தெரிவித்துவிட்டார். பல பேர் கருத்துக்களை அவரவர்கள் நினைப்பதுபோல பேசிக் கொண்டிருக்கும்போது, கருணாசை மட்டும் 5-ம் தேதி வரை காவலில் வைப்பது சரியா என்றும் விஜயகாந்த் தனது அறிக்கை மூலமாக கேட்டிருக்கிறார்.

அச்சுறுத்தல் நடவடிக்கை

தங்களுக்கு வேண்டியவர்கள் தவறு செய்தால் கண்டுகொள்ளாமல் இருந்து கொண்டு ஆட்சியை தக்க வைத்துக் கொள்வது, இன்னொரு பக்கம் அச்சுறுத்தல் செய்வதற்காக கைது நடவடிக்கை எடுப்பது கண்டிக்கத்தக்கது என்றும் விஜயகாந்த் தெரிவித்துள்ளார்.

சுண்ணாம்பு, வெண்ணை?

ஒருகண்ணில் சுண்ணாம்பு, மறுகண்ணில் வெண்ணை வைத்து பார்ரக்கும் அரசின் போக்கு கண்டிக்கத்தக்கது என்று தெரிவித்துள்ள விஜயகாந்த் அனைவரையுமே சரிசமமாக அரசு பார்க்க வேண்டும் என்றும் கேட்டுக் கொண்டுள்ளார்.

Published On September 23, 2018