Plus 2 Exam results 2026: தமிழகத்தில் நாளை பிளஸ் 2 தேர்வு முடிவுகள் வெளியாகாது! எப்போது வெளியாகும்?

சென்னை: தமிழக மாநில பாடத்திட்டத்தின் கீழ் பிளஸ் 2 பொதுத்தேர்வு எழுதிய சுமார் 8 லட்சம் மாணவர்கள் ஆவலுடன் எதிர்பார்த்து காத்திருந்த தேர்வு முடிவுகள் நாளை வெளியாகாது எனத் தெரிகிறது. பள்ளிக் கல்வித்துறை சார்பில் முன்னதாக மே 8-ம் தேதி முடிவுகள் வெளியிடப்படும் என்று அறிவிக்கப்பட்டிருந்தது.

தாமதத்திற்கான முக்கிய காரணங்கள்

அரசியல் சூழல்: தமிழக சட்டசபைத் தேர்தல் முடிவுகள் வெளியான நிலையில், புதிய அரசு அமைவதில் நீடிக்கும் இழுபறி காரணமாகத் தேர்வு முடிவுகள் தள்ளிப் போகிறது. பொதுவாக, தேர்வு முடிவுகளை வெளியிடுவதற்கு அரசின் (முதலமைச்சர் அல்லது பள்ளிக் கல்வித்துறை அமைச்சர்) அனுமதி அவசியம்.

புதிய அமைச்சரவை: தற்போது தற்காலிக அரசு அல்லது ஆளுநரின் வழிகாட்டுதலின் கீழ் நிர்வாகம் நடைபெற்று வருவதால், புதிய அரசு பதவியேற்ற பின்னரே முடிவுகளை வெளியிடத் திட்டமிட்டிருப்பதாகத் தகவல்கள் தெரிவிக்கின்றன.

எப்போது வெளியாகும்?

பள்ளிக் கல்வித்துறை அதிகாரிகள் தரப்பில் பெறப்பட்ட தகவலின்படி, விடைத்தாள்கள் திருத்தும் பணிகள் மற்றும் மதிப்பெண்களை இணையதளத்தில் பதிவேற்றும் பணிகள் ஏற்கனவே முழுமையாக முடிவடைந்துவிட்டன.

புதிய முதலமைச்சர் பதவியேற்று, பள்ளிக் கல்வித்துறை அமைச்சரின் ஒப்புதல் கிடைத்தவுடன் புதிய தேதி அதிகாரப்பூர்வமாக அறிவிக்கப்படும்.

அநேகமாக மே மாதத்தின் மூன்றாவது அல்லது நான்காவது வாரத்தில் முடிவுகள் வெளியாக வாய்ப்புள்ளதாகக் கூறப்படுகிறது.

மாணவர்கள் கவனத்திற்கு:

தேர்வு முடிவுகள் வெளியானதும் மாணவர்கள் தங்களது மதிப்பெண்களைக் கீழே உள்ள அதிகாரப்பூர்வ இணையதளங்களில் சரிபார்க்கலாம்.

tnresults.nic.in

dge.tn.gov.in

தேர்வு முடிவுகள் வெளியான பிறகே கல்லூரிகளுக்கான மாணவர் சேர்க்கை (Admission) தொடங்கும் என்பதால், மாணவர்கள் குழப்பமடைய வேண்டாம் என்றும், அதிகாரப்பூர்வ அறிவிப்பு வரும் வரை காத்திருக்குமாறும் கேட்டுக் கொள்ளப்படுகிறார்கள்.

மாநிலப் பாடத்திட்டத்தின் கீழ், 2025-26 கல்வி ஆண்டிற்கான 11 மற்றும் 12-ஆம் வகுப்பு பொதுத் தேர்வுகள் மார்ச் 2ஆம் தேதி தொடங்கி மார்ச் 27ஆம் தேதி வரை நடைபெற்றன. இந்தத் தேர்வுகளை எழுத மாநிலம் முழுவதிலும் இருந்து சுமார் 7,99,692 மாணவ, மாணவிகள் விண்ணப்பித்திருந்தனர். தேர்வுகள் நிறைவடைந்ததும், விடைத்தாள் திருத்தும் பணிகளைத் தேர்வுத் துறை உடனடியாகத் தொடங்கியது. இனி ரிசல்ட் வெளியாவது மட்டும்தான் பாக்கி!

பொறியியல் படிப்புகளில் சேருவதற்கான விண்ணப்பங்கள் வரவேற்கப்படுகின்றன. ஜூன் 2 வரை விண்ணப்பிக்க கடைசி தேதியாகும். எனவே மாணவர்கள் பதற வேண்டிய அவசியம் இல்லை.

English summary

Students awaiting the Tamil Nadu Class 12 Board Examination 2026 results may have to wait longer, as reports suggest the Plus Two results are unlikely to be released tomorrow. Earlier, the Tamil Nadu School Education Department had announced May 8 as the expected result date for nearly 8 lakh students who appeared for the exams.