ஆர்.கே.நகர் இடைத் தேர்தலில் கமல் ஆதரவு இவர்களுக்கா? உச்சகட்ட எதிர்பார்ப்பு

சென்னை: ஆர்.கே.நகரில் நடிகர் கமல்ஹாசன் ஆதரவு யாருக்கு என்பது ரசிகர்கள் கேள்வியாக உள்ளது.

பாரதியார் போல முண்டாசு கட்டிக்கொண்டு டிவிட்டரில் டி.பி. வைத்தபடி அரசுக்கு எதிராக கருத்துக்களை கூறி வருகிறார் கமல்ஹாசன். இதை சீரியசாக எடுத்து, ஜெயக்குமார் உள்ளிட்ட அமைச்சர்கள், தமிழிசை போன்ற கட்சி தலைவர்கள் கருத்து கூறியபடி உள்ளனர்.

இப்படி ஒரு அதிர்வை ஏற்படுத்தியுள்ள கமல் ஆர்.கே.நகரில் என்ன நிலைப்பாட்டை எடுக்கப்போகிறார்?

தனிக்கட்சி அறிவிப்பு

தனிக்கட்சி துவங்கப்போகிறேன் என்று அறிவித்துள்ளார் கமல். எனவே ஆர்.கே.நகர் இடைத் தேர்தலில் அவரது கருத்து முக்கியத்துவம் பெறுகிறது. கேரளாவில் ஆளும் மார்க்சிஸ்ட் கம்யூனிஸ்ட் கட்சியுடன் நெருக்கமாக உள்ளார் கமல். முதல்வர் பிரனாயி விஜயனை அவ்வப்போது சந்தித்து பேசியுள்ளார்.

அந்த கட்சிகள் போட்டியில்லை

எனவே ஆர்.கே.நகரில் மார்க்சிஸ்ட் போட்டியிட்டால் அதற்கு கமல் ஆதரவு அளிப்பாரா என்ற எதிர்பார்ப்பு ஏற்பட்டுள்ளது. ஆம் ஆத்மி மற்றும், திரினாமுல் காங்கிரஸ் தலைவர்களுடன் கமல் நட்பு பாராட்டினாலும், அவ்விரு கட்சிகளும் ஆர்.கே.நகரில் போட்டியிடுவது சந்தேகம். எனவே கமல் சாய்ஸ் கம்யூனிஸ்ட்டுகளாக இருக்கலாம்.

திமுகவுக்கு ஆதரவு?

அதேநேரம் திமுகவுக்கு ஆதரவு அளிப்பதையும் கமல் விரும்பமாட்டார் என தெரிகிறது. தன் மீதான அதிமுகவினரின் விமர்சனங்களை உண்மை என்பதை போல அது காட்டிவிடும் என்ற அச்சம் கமலுக்கு இருப்பதாக அவருக்கு நெருக்கமானவர்கள் கூறுகிறார்கள். இருப்பினும் அதிமுகவை வீழ்த்த ஓரளவுக்கு கமலின் மறைமுக ஆதரவு தங்களுக்கு இருக்கவே செய்யும் என்பது திமுகவினர் எதிர்பார்ப்பு.

வாய்ஸ் கொடுத்து புண்ணாக்க வேண்டாம்

இதுகுறித்து கமலுக்கு நெருக்கமான சிலரிடம் கேட்டபோது, "அநேகமாக இந்த தேர்தலில் கமல் வாய்ஸ் கொடுக்க மாட்டார் என்றே தெரிகிறது. ஏனெனில், தமிழகத்தில் இடைத் தேர்தல் எப்படி நடைபெறும் என்பது எல்லோருக்கும் தெரியும். ஆளும் கட்சிதான் பெரும்பாலும் வெற்றி பெறும். அதிசயங்கள் நிகழ்ந்தால்தான் வேறு கட்சி வெல்ல முடியும். எனவே கமல் பேசாமல் இருப்பதையே விரும்புவார்" என்கிறார்கள்.

டிவிட்டுகளை பார்க்கலாம்

இருப்பினும், ஆர்.கே.நகர் தேர்தல் முடியும் வரை, அங்கே பணம் கொடுக்கிறார்கள், இங்கே மோதிரம் கொடுக்கிறார்கள் என்பது போன்ற பல டிவிட்டுகளை கமலிடமிருந்து எதிர்பார்க்கலாம். அதிமுகவுக்கு எதிராக இன்னும் அதிக உக்கிரமாக இருப்பார் என்பதே ரசிகர்கள் கருத்தாக உள்ளது.

English summary

To whom Kamal Hassan going to extend his support in RK nagar election, fans are eager to know his decision.