போலீஸ் வர்றாங்க... ஓவர் ஓவர்... 7 வாக்கி டாக்கிகளைத் தூக்கிக் கொண்டு ஓடிய சென்னை திருடர்கள்!

சென்னை: சென்னை தேனாம்பேட்டை போக்குவரத்து போலீஸ் நிலையத்தில் 7 வாக்கி டாக்கி கருவிகள் திருடு போயுள்ளது. இது தொடர்பாக தேனாம்பேட்டை குற்றப்பிரிவு போலீசில் புகார் கொடுக்கப்பட்டுள்ளது. போலீசார் வழக்குப்பதிவு செய்து விசாரணை நடத்தி வருகிறார்கள்.

சென்னை தேனாம்பேட்டை போலீஸ் நிலையத்திற்கு பின்புறம் உள்ளது போக்குவரத்து போலீஸ் நிலையம். போக்குவரத்து போலீசார் பயன்படுத்தும் வாக்கி டாக்கி கருவிகள் இந்த அலுவலகத்தில் தான் வைக்கப் பட்டிருக்கும். வாக்கி டாக்கி தேவைப் படும் போலீசார் அதனை எடுத்துக் கொண்டு அருகிலுள்ள பதிவேட்டில் கையெழுத்து இட்டுச் செல்வது நடைமுறை.

இந்நிலையில், நேற்று முன் தினம் இரவு இந்த போக்குவரத்து அலுவலகம் வழக்கம் போல் மூடப்பட்டது. போக்குவரத்து போலீசார் பயன்படுத்தும் 7 வாக்கி டாக்கி கருவிகள் அலுவலகத்தில் வைக்கப்பட்டிருந்தது.

நேற்று காலையில் வழக்கம் போல பணிக்கு வந்த போக்குவரத்து போலீஸ் இன்ஸ்பெக்டர், அலுவலக கதவு பூட்டுகள் உடைக்கப் பட்டிருந்ததைக் கண்டு அதிர்ச்சி அடைந்தார். உள்ளே வைக்கப் பட்டிருந்த 7 வாக்கி டாக்கிகளும் திருட்டு போய் இருந்தது. உடனடியாக இது தொடர்பாக உயர் அதிகாரிகளுக்கு அவர் தகவல் தெரிவித்தார்.

சம்பவ இடத்திற்கு விரைந்து வந்த சென்னை தெற்கு போக்குவரத்து போலீஸ் துணை கமிஷனர் லட்சுமி, இது தொடர்பாக விசாரணை நடத்தினார். மேலும்,இந்த திருட்டு தொடர்பாக தேனாம்பேட்டை குற்றப்பிரிவு போலீசில் புகார் கொடுக்கப்பட்டுள்ளது. போலீசார் வழக்குப்பதிவு செய்து விசாரணை நடத்தி வருகிறார்கள்.

போலீசாரே இந்த திருட்டில் ஈடுபட்டு இருக்கலாம், என்ற சந்தேகம் உள்ளதாகத் தெரிகிறது. திருட்டு நடந்த போக்குவரத்து போலீஸ் நிலையத்திற்கு முன்புதான் சட்டம்-ஒழுங்கு போலீஸ் நிலையம் உள்ளது. உதவி கமிஷனர் அலுவலகமும் அங்குதான் இருக்கிறது. அங்கு இரவு விடிய, விடிய போலீசார் காவல் பணியில் இருந்துள்ளனர். அப்படி இருக்க வாக்கி டாக்கி கருவிகளை திருடியது யார், என்ற கேள்வி எழுந்துள்ளது.

கடந்த ஆண்டு காணாமல் போன சென்னை முக்தாபுதுப்பேட்டை போலீஸ் இன்ஸ்பெக்டரின் வாக்கி டாக்கி இன்னமும் கண்டுபிடிக்கப் படவில்லை. சமீபத்தில் கூட விருகம்பாக்கம் போலீஸ்காரர் ஒருவரின் வாக்கிடாக்கி காணாமல் போனது. ஆனால், விரைந்து அந்த வாக்கி டாக்கி மீட்கப் பட்டது. அது தொடர்பாக இரண்டு கல்லூரி மாணவர்களும் கைது செய்யப் பட்டனர்.

இந்தச் சூழ்நிலையில் ஒரே நேரத்தில் 7 வாக்கி டாக்கிகள், அதுவும் போலீஸ் நிலைய பூட்டுகளை உடைத்து திருடப்பட்டிருப்பது சென்னை போலீஸ் வட்டாரத்தில் பெரும் அதிர்ச்சியை ஏற்படுத்தியுள்ளது.

English summary

They are called in when a theft occurs in the locality but policemen at the Teynampet station were in for shock on Tuesday morning when they opened a room in the traffic enforcement wing. Seven Very High Frequency (VHF) wireless sets kept near a window for charging were missing.