வண்டலூரில் துள்ளி விளையாடும் 2 புது காட்டுமாடு கன்றுகள் - "மக்கள் தொகை" 21 ஆனது!

வண்டலூர்: வண்டலூர் பூங்காவில் மேலும் ஒரு காட்டுமாடு கன்று ஈன்றது. இதனால் வண்டலூர் பூங்காவில் காட்டு மாடுகளின் எண்ணிக்கை 21 ஆக உயர்ந்துள்ளது.

இது குறித்து வண்டலூர் பூங்கா இயக்குனர் ரெட்டி வெளியிட்டுள்ள செய்திக்குறிப்பில், "அறிஞர் அண்ணா உயிரியல் பூங்காவிலுள்ள ரேமா என்ற 4 வயது காட்டு மாடு தனது முதல் ஈனுவாக 08.10.2015 அன்று ஒரு ஆண் கன்றையும், காவேரி என்ற 6 வயது மற்றொரு காட்டு மாடு மூன்றாவது ஈனுவாக 15.10.2015 அன்று ஒரு பெண் கன்றையும் ஈன்றது.

தற்போது பிறந்துள்ள கன்றுகளின் தந்தை இப்பூங்காவில் பிறந்து வளர்ந்த விஜய் என்ற 9 வயது ஆண் காட்டு மாடு ஆகும்.

துள்ளிக் குதித்து விளையாடும் கன்றுகள்:

தற்போது புதிதாய் பிறந்துள்ள இக்கன்றுகளுடன் சேர்த்து பூங்காவிலுள்ள காட்டு மாடுகளின் எண்ணிக்கை 12 ஆண் மற்றும் 9 பெண், ஆக மொத்தம் 21 ஆக உயர்ந்துள்ளது. புதிதாய் பிறந்த இக்கன்றுகள் தனது தாய்களுடன் துள்ளிக்குதித்து விளையாடுவது பார்வையாளர்களை மிகவும் கவர்கிறது.

சிறப்பு உணவுகள்:

கன்று ஈன்றுள்ள தாய்க்கு சிறப்பு உணவுகளாக தேங்காய், கடலைப்புண்ணாக்கு, கொண்டை கடலை, வாழைப்பழம், கீரை, சுரைக்காய் போன்றவை கூடுதலாக வழங்கப்படுகிறது.

இண்டியன் பைசன்:

பொதுவாக தமிழில் காட்டெருமை என்று அழைக்கப்பட்டாலும் இவைகள் "காட்டு மாடுகள்" அல்லது "காட்டெருதுகள்" என்பதே சரியாகும். மேலும் இது பைசன் இனமும் அல்லவென்றாலும் இந்தியாவில் "இண்டியன் பைசன்" என்றே அழைக்கப்படுகிறது.

செல்லத் தொந்தரவுகள்:

275 நாட்கள் அல்லது 9 மாத சினைக்காலத்தை உடைய காட்டு மாடுகள் ஒன்று அல்லது அரிதாக இரண்டு கன்றுகளை ஈனும். இவை வருடம் முழுவதும் இனப்பெருக்கம் செய்கின்றன. தாயின் வயிற்றிலிருந்து பிறந்து விழுந்தவுடன் கன்றுகள் பத்தே நிமிடங்களில் நடக்க ஆரம்பிக்கும். பின்னர் இருபதே நிமிடங்களில் தாயின் குறுக்கே அங்குமிங்கும் துள்ளிக்குதித்து செல்லமான தொந்தரவுகளைக் கொடுக்கும். தாய் தனது நாக்கால் பிறந்த கன்றுகளை நன்கு நக்கி இரத்த வாடையை நீக்கும். இதனால் இரைக்கொல்லிகள் மூலம் கன்றுகளுக்கு வரும் உடனடி ஆபத்து தடுக்கப்படுகிறது.

தங்க நிறத்தில் ஜொலிக்கும் கன்றுகள்:

புதிதாகப் பிறக்கும் கன்றுகள் ஏறத்தாழ தங்க நிறத்துடன் இருக்கும். மிக விரைவில் வயதிற்கேற்றவாறு இளம்பழுப்பு நிறத்தைப் பெற்று அதிலிருந்து வரக்காப்பி வண்ணத்தை அடையும் அல்லது சிவப்பேறிய கரும்பழுப்பு நிறத்தில் இருக்கும்" என்று தெரிவிக்கப்பட்டுள்ளது.

English summary

Indian bison in Vandalur delivered a new calf. people happy to see the calves plays with their moms.