தங்கம், வெள்ளி விற்பனையில்.. களமிறங்கும் திருப்பதி தேவஸ்தானம்.. விற்பனைக்கு வரும் ஸ்ரீவாரி தங்கம்!

திருப்பதி: திருப்பதி ஏழுமலையான் பக்தர்களுக்கு ஒரு நற்செய்தி! இனி திருமலைக்கு நேரில் செல்லாமலேயே, சுவாமியின் திருவுருவம் பொறித்த தங்கம் மற்றும் வெள்ளி டாலர்களை ஆன்லைன் மூலம் உங்கள் இல்லம் தேடி வரவழைக்கலாம். இதற்கான அதிரடித் திட்டத்தைத் திருமலை திருப்பதி தேவஸ்தானம் (TTD) தீவிரமாகப் பரிசீலித்து வருகிறது.

வீடு தேடி வரும் 'ஸ்ரீவாரி' பிரசாதம்!

தற்போது வரை, ஏழுமலையான் உருவம் பதித்த தங்கம் மற்றும் வெள்ளி டாலர்கள் திருமலையில் உள்ள குறிப்பிட்ட கவுண்ட்டர்களில் மட்டுமே விற்பனை செய்யப்படுகின்றன. மொட்டை அடித்து, நீண்ட வரிசையில் நின்று தரிசனம் முடித்த கையோடு இந்த டாலர்களை வாங்குவதை பக்தர்கள் பெரும் பாக்கியமாகக் கருதுகின்றனர்.

இந்நிலையில், உலகெங்கிலும் உள்ள லட்சக்கணக்கான பக்தர்களின் வசதிக்காக இந்த டாலர்களை ஆன்லைன் தளத்தில் விற்பனைக்குக் கொண்டுவரத் தேவஸ்தானம் திட்டமிட்டுள்ளது.

ஏன் இந்தத் திடீர் மாற்றம்?

தேவஸ்தானத்தின் வருவாயைப் பெருக்குவது குறித்தும், நிர்வாகச் சீர்திருத்தங்கள் குறித்தும் ஆய்வு செய்ய அமைக்கப்பட்ட நிதிக் குழு (Finance Committee) சில முக்கியப் பரிந்துரைகளை வழங்கியது. அதில், 'ஸ்ரீவாரி டாலர்களின்' விற்பனையை விரிவுபடுத்துவதன் மூலம் பக்தர்களுக்குப் பெரிய அளவில் சேவை செய்ய முடியும் எனத் தெரிவிக்கப்பட்டுள்ளது.

திட்டத்தின் சிறப்பம்சங்கள்:

பாதுகாப்பான டெலிவரி: ஆன்லைனில் ஆர்டர் செய்யப்படும் டாலர்கள், தபால் துறை மூலமாக 'டிரான்ஸிட் இன்சூரன்ஸ்' (Transit Insurance) வசதியுடன் பக்தர்களின் வீடுகளுக்கு அனுப்பப்படும்.

புதுப்பொலிவு: டாலர்களின் வடிவமைப்பை மேலும் மெருகேற்றவும், அதன் புனிதத் தன்மை மாறாமல் நவீனத் தொழில்நுட்பத்தைப் பயன்படுத்தவும் அதிகாரிகள் ஆலோசித்து வருகின்றனர்.

சாமானியர்களுக்காக 'தங்க முலாம்' பூசிய டாலர்கள்!

தங்கம் விலை விண்ணைத் தொட்டு வரும் சூழலில், சாதாரண பக்தர்களால் சுத்த தங்க டாலர்களை வாங்குவது கடினமாக உள்ளது. இதைக் கருத்தில் கொண்டு, 'வெள்ளியில் தங்க முலாம்' பூசப்பட்ட டாலர்களை அறிமுகப்படுத்தவும் தேவஸ்தானம் திட்டமிட்டுள்ளது. இது ஆன்மீக மதிப்புக் குறையாமல், குறைந்த விலையில் பக்தர்களுக்குக் கிடைக்கும் என எதிர்பார்க்கப்படுகிறது.

"திருப்பதிக்கு வர முடியாத முதியவர்கள் மற்றும் வெளியூர் பக்தர்களுக்கு இது ஒரு வரப்பிரசாதமாக அமையும். அதே சமயம் தேவஸ்தானத்தின் வருவாயும் கணிசமாக உயரும்" என்கிறார்கள் அதிகாரிகள்.

இந்தத் திட்டம் தற்போது ஆலோசனைக் கட்டத்தில் உள்ளது. விரைவில் நடைபெறவுள்ள TTD அறங்காவலர் குழு கூட்டத்தில் இதற்கு அதிகாரப்பூர்வ ஒப்புதல் கிடைத்தவுடன், ஆன்லைன் விற்பனை குறித்த அறிவிப்பு வெளியாகும்.

எப்படி வாங்குவது?

திருமலை திருப்பதி தேவஸ்தானத்தின் இந்த ஆன்லைன் விற்பனைத் திட்டம் இன்னும் அதிகாரப்பூர்வமான ஒப்புதலுக்காகக் காத்திருக்கிறது. ஒருமுறை TTD அறங்காவலர் குழு இதற்குப் பச்சைக்கொடி காட்டியவுடன், தேவஸ்தானத்தின் அதிகாரப்பூர்வ இணையதளமான ttdevasthanams.ap.gov.in அல்லது அதன் பிரத்யேக மொபைல் செயலி மூலம் பக்தர்கள் ஆர்டர் செய்யலாம். உங்கள் தனிப்பட்ட விவரங்கள் மற்றும் முகவரியைப் பதிவு செய்து, தங்கம் அல்லது வெள்ளி டாலரைத் தேர்வு செய்தபின், ஆன்லைன் மூலம் பணத்தைச் செலுத்த வேண்டும். நீங்கள் ஆர்டர் செய்த புனிதமான ஸ்ரீவாரி டாலர்கள், இன்சூரன்ஸ் வசதியுடன் கூடிய தபால் சேவை மூலம் பாதுகாப்பான பேக்கிங்கில் நேரடியாக உங்கள் இல்லத்திற்கே அனுப்பி வைக்கப்படும்.

இந்தத் திட்டம் நடைமுறைக்கு வந்தால், திருப்பதி லட்டுக்கு அடுத்தபடியாக ஸ்ரீவாரி டாலர்கள் அதிக அளவில் பக்தர்களைச் சென்றடையும் என்பதில் சந்தேகமில்லை.

English summary

TTD to sale Srivari Gold and Silver through online : How to order