திருச்சி மெட்ரோ ரயில்.. 68 கி.மீ. தொலைவுக்கு 3 வழித்தடங்கள்.. சாத்தியக்கூறு அறிக்கை தயாராவதாக தகவல்!

திருச்சி: திருச்சி மாநகரம் மற்றும் சுற்றியுள்ள பகுதிகளில் 68 கி.மீ தொலைவுக்கு 3 வழித்தடங்களில் மெட்ரோ ரயில் சேவை அமைக்க சாத்தியக்கூறுகள் உள்ளதாக பரிந்துரைக்கப்பட்டுள்ளது. இதனால் திருச்சியில் மெட்ரோ ரயில் அமைப்பதற்காக சாத்தியக்கூறு அறிக்கைகள் தயாரிக்கப்பட்டு வருவதாக தகவல் வெளியாகியுள்ளது.

தமிழ்நாட்டின் இரண்டாவது தலைநகரமாக திருச்சியை கொண்டு வர வேண்டும் என்று மறைந்த முதல்வர் எம்.ஜி.ஆர் கனவு கண்டார். திருச்சியை குறி வைப்பதற்கு முழு முதற்காரணம் பூகோள ரீதியில் போக்குவரத்திற்கு, தமிழ்நாட்டின் மத்திய பகுதியாக திருச்சி இருப்பது தான்.

சாலை போக்குவரத்தில் தென் மாவட்டங்களின் நுழைவு வாயிலாக திகழும் திருச்சி, ரயில் போக்குவரத்து, விமான போக்குவரத்திலும் சிறந்து விளங்குகிறது. சென்னையில் இருந்து, கன்னியாகுமரியில் இருந்தும் அதிகபட்சமாக, 5 மணி நேர பயணத்தில் மக்களால் திருச்சிக்கு வந்தடைய முடியும்.

சென்னை மெட்ரோ

இந்த நிலையில் சென்னையின் போக்குவரத்து நெரிசலை சரி செய்வதற்கு, மெட்ரோ ரயில் திட்டம் தொடங்கப்பட்டு, சிறப்பாக செயல்பட்டு வருகிறது. இதனால் சென்னையை தொடர்ந்து, மதுரை, கோவைம், திருச்சி உள்ளிட்ட இரண்டாம் நிலை நகரங்களிலும் மெட்ரோ ரயில் திட்டத்தை செயல்படுத்த, சென்னை மெட்ரோ ரயில் நிறுவனம் முனைப்பு காட்டி வருகிறது.

மெட்ரோ சேவை

இந்த நிலையில் திருச்சி மாநகரம் மற்றும் சுற்றியுள்ள பகுதிகளில் 68 கி.மீ தொலைவுக்கு 3 வழித்தடங்களில் மெட்ரோ ரயில் சேவை அமைக்க சாத்தியக்கூறுகள் உள்ளதாக பரிந்துரைக்கப்பட்டுள்ளது. திருச்சி மாநகராட்சி மாமன்ற அவசரக் கூட்டம் நேற்று நடைபெற்றது. அதில் திருச்சி மாநகராட்சி பகுதிகளுக்கான விரிவான பொது போக்குவரத்து திட்டம் குறித்த ஆய்வறிக்கை மாமன்ற ஒப்புதலுக்கு வைக்கப்பட்டது.

பொது போக்குவரத்து மாஸ்டர் பிளான்

அப்போது இந்தத் திட்டம் தொடர்பாக மெட்ரோ நிறுவன அலுவலர் அழகப்பன் கூறுகையில், திருச்சி மாநகருக்கு அடுத்த 20 ஆண்டுகளுக்குத் தேவையான பொதுப் போக்குவரத்து திட்டம் குறித்த 'மாஸ்டர் பிளான்' தயாரிக்கப்பட்டுள்ளது. இந்த ஆய்வறிக்கை மூலமாகவே, திருச்சிக்கான மெட்ரோ உள்ளிட்ட முக்கிய திட்டங்களை கொண்டு வர முடியும். கடந்த ஒரு வருடமாக திருச்சி மாநகரம் மட்டுமின்றி அருகிலுள்ள நகரம், ஊராட்சிகளிலும் கள ஆய்வு மேற்கொள்ளப்பட்டது.

திருச்சியில் மெட்ரோ தேவை

அதில் 22 சதவீதம் பேர் பொதுப் போக்குவரத்துகளில் ஒன்றான மாநகர பேருந்துகளை பயன்படுத்துகின்றனர். இந்தியாவிலுள்ள மற்ற மாநகராட்சிகளை ஒப்பிடும்போது, திருச்சியில் பொதுபோக்குவரத்து அதிகமாக உள்ளது. குறைந்தபட்சம் நாள்தோறும் 6.41 கி.மீ தொலைவுக்கு பேருந்துகளை சராசரியாக பயன்படுத்துகின்றனர். இவை தவிர, மெட்ரோ ரயில் சேவையை செயல்படுத்த திருச்சியில் 68 கி.மீ.க்கு தேவை உள்ளது. இதனை 3 வழித்தடங்களாக பிரித்துள்ளோம்.

3 வழித்தடங்கள் என்னென்ன?

சமயபுரத்திலிருந்து ஸ்ரீரங்கம், சத்திரம் பேருந்து நிலையம், தில்லைநகர் வழியாக வயலூர் வரை 18.7 கி.மீ தொலைவுக்கு ஒரு வழித்தடம் அமைக்கப்படும். துவாக்குடியிலிருந்து திருவெறும்பூர், பால்பண்ணை, மத்திய பேருந்து நிலையம் வழியாக பஞ்சப்பூர் வரை 26 கி.மீ தொலைவுக்கு இரண்டாவது வழித்தடம் கண்டறியப்பட்டுள்ளது. அடுத்ததாக ஜங்சனிலிருந்து பஞ்சப்பூர், ஏர்போர்ட், புதுக்கோட்டை சாலை வழியாக மாத்தூர் பகுதியிலுள்ள ரிங்ரோடு வரை 23.3 கி.மீ தொலைவுக்கு ஒரு வழித்தடம் அமைக்க பரிந்துரைக்கப்பட்டுள்ளது. இவற்றில் எங்கெங்கு நிறுத்தங்கள் அமையும், எந்த வழியாக மெட்ரோ ரயில் இயக்கப்படும் என்பது குறித்து, அடுத்து நடைபெறக்கூடிய விரிவான திட்ட அறிக்கையின்போது தெரியவரும்.

ஆணையர் விளக்கம்

இதுகுறித்து மாநகராட்சி ஆணையர் ஆர்.வைத்திநாதன் கூறுகையில், ஆரம்பத்தில் சமயபுரத்திலிருந்து காவிரி பாலம் வழியாக சத்திரம் பேருந்து நிலையம் வரை மட்டுமே மெட்ரோ வழித்தடத்துக்கு ஆய்வு செய்தனர். அமைச்சர் கே.என்.நேரு அதை ஏற்கவில்லை. மதுரை, கோவையைக் காட்டிலும் திருச்சியில் பொதுப் போக்குவரத்தை பயன்படுத்துவோர் அதிகமாக உள்ளனர். எனவே சில வழித்தடங்களில் ஆய்வு செய்ய அமைச்சர் அறிவுறுத்தினார். அதன்படி 68 கி.மீ தொலைவுக்கு 3 வழித்தடங்கள் கண்டறியப்பட்டுள்ளன என்று தெரிவித்தார்.

English summary

There is a possibility of establishing metro rail service on 3 lines for a distance of 68 km in Trichy city and surrounding areas. As a result, it has been reported that feasibility reports are being prepared for setting up a metro train in Trichy.