வெளிமாநிலத்திற்கு போக இருந்த வின்பாஸ்டை.. இழுத்து வந்த தமிழக அரசு.. தூத்துக்குடியில் ஆலை அமைத்த கதை!
தூத்துக்குடி: வியட்நாமின் முன்னணி மின்சார வாகன உற்பத்தியாளரான வின்ஃபாஸ்ட் (Vinfast), இந்தியாவின் தூத்துக்குடியில் தனது முதல் உற்பத்தி ஆலையை வெற்றிகரமாக அமைத்துள்ளது. உலகின் மிக வேகமாக வளர்ந்து வரும் வாகனச் சந்தைகளில் ஒன்றான இந்தியாவில் தனது வணிகத்தை விரிவுபடுத்துவதற்கான வின்ஃபாஸ்டின் ஒரு முக்கிய வியூக நகர்வாக இது பார்க்கப்படுகிறது.
இந்த ஆலையை அமைப்பதற்கு முன், வின்ஃபாஸ்ட் இந்தியாவின் ஆறு மாநிலங்களில் 15 வெவ்வேறு இடங்களை ஆராய்ந்தது. முதலில் வெளிமாநிலம் ஒன்றிற்கு போக இருந்த ஆலையை, நேரடியாக வியட்நாமிற்கே சென்று அங்குள்ள வின்ஃபாஸ்ட் அதிகாரிகளிடம் பேசி, தமிழக அரசு தூத்துக்குடிக்கு இந்த ஆலையை கொண்டு வர வைத்தது. தமிழ்நாட்டின் திறமையான தொழிலாளர் வளம், முற்போக்கான மின்சார வாகனக் கொள்கைகள் மற்றும் வலுவான வாகன உற்பத்திச் சூழல் ஆகியவற்றைக் கருத்தில் கொண்டு தூத்துக்குடி தேர்ந்தெடுக்கப்பட்டது.
தூத்துக்குடிக்கு வந்த வின்ஃபாஸ்ட் ஆலை
2024 ஜனவரி 6 அன்று, வின்ஃபாஸ்ட் தமிழ்நாடு அரசுடன் ஒரு புரிந்துணர்வு ஒப்பந்தத்தில் (MoU) கையெழுத்திட்டது. இந்த ஒப்பந்தத்தின்படி, முதல் கட்டமாக 500 மில்லியன் டாலர் முதலீடும், நீண்டகாலமாக 2 பில்லியன் டாலர் முதலீடும் உறுதியளிக்கப்பட்டது. தூத்துக்குடி சில்லாத்தங்குளத்தில் உள்ள சிப்காட் தொழிற்பூங்காவில், இந்த ஆலைக்காக 408 ஏக்கர் நிலம் ஒதுக்கப்பட்டது; இதில் தொழிற்சாலை 114 ஏக்கரில் அமையவுள்ளது.
2024 பிப்ரவரி 25 அன்று, இத்திட்டத்திற்கான அடிக்கல் நாட்டு விழாவை தமிழ்நாடு முதல்வர் மு.க. ஸ்டாலின் தொடங்கி வைத்தார். புரிந்துணர்வு ஒப்பந்தம் கையெழுத்தான ஒரு மாதத்திற்குள்ளேயே கட்டுமானப் பணிகள் தொடங்கியதன் மூலம், வின்ஃபாஸ்டின் விரைவான செயல்பாடு வெளிப்பட்டது. இந்த புதிய வசதிக்காக ₹4,000 கோடி முதலீடு செய்யப்படும் என அப்போது அறிவிக்கப்பட்டது.
வின்ஃபாஸ்ட் ஆலை கட்டப்பட்டது எப்படி?
புரிந்துணர்வு ஒப்பந்தத்திலிருந்து கட்டுமானம் வரை, இந்த திட்டம் 15 மாதங்களில் அபார பாய்ச்சலை அடைந்துள்ளது. 2025 ஜூலை மாதத்தில், முதல் கட்டமாக 200 உள்ளூர் வல்லுநர்கள் பணியமர்த்தப்பட்டனர். தமிழ்நாட்டின் "நான் முதல்வன்" திறன் மேம்பாட்டுத் திட்டத்துடன் இணைந்து, பணியாளர்களுக்கான பயிற்சி வகுப்புகளும் நடத்தப்படுகின்றன. முழுத் திறனில், ஆண்டுக்கு 1,50,000 வாகனங்கள் உற்பத்தி செய்யக்கூடிய திறன் இந்த ஆலைக்கு உள்ளது.
ஆரம்பத்தில் 2025 ஜூலை 31-ல் திறக்க திட்டமிடப்பட்ட இந்த ஆலை, இறுதியாக 2025 ஆகஸ்ட் 4 அன்று முதல்வர் மு.க. ஸ்டாலினால் திறந்து வைக்கப்பட்டது. தற்போது இந்த வசதி செயல்பாட்டில் உள்ளதுடன், 'மேட் இன் தூத்துக்குடி' மின்சார வாகனங்களையும் உற்பத்தி செய்யத் தொடங்கியுள்ளது. ஆரம்பக் கட்டமாக, VF6 மற்றும் VF7 மாடல் மின்சார எஸ்யூவி வாகனங்கள் இங்கு தயாரிக்கப்படுகின்றன.
வின்ஃபாஸ்ட் முதலீடு எவ்வளவு?
மொத்த முதலீடு ₹16,000 கோடி என மதிப்பிடப்பட்டுள்ளது. இதில் ஆரம்ப கட்டமாக ₹1,119.67 கோடி செலவிடப்பட்டுள்ளது. சிப்காட் தொழிற்பூங்காவில் 400 ஏக்கர் பரப்பளவில் அமைந்துள்ள இந்த ஆலை, ஆரம்பத்தில் ஆண்டுக்கு 50,000 வாகனங்களை உற்பத்தி செய்யும் திறனைக் கொண்டுள்ளது. இந்த உற்பத்தித் திறனை 1,50,000 அலகுகள் வரை விரிவாக்க முடியும்.
இந்த ஆலை நேரடி மற்றும் மறைமுகமாக 3,000 முதல் 3,500 வேலைவாய்ப்புகளை உருவாக்கும் என எதிர்பார்க்கப்படுகிறது. 2025 ஜூலையில் 200 உள்ளூர் வல்லுநர்கள் கொண்ட முதல் தொகுதி பணியமர்த்தப்பட்டது. மேலும், அரசின் திறன் மேம்பாட்டுத் திட்டங்களுடன் இணைந்து, பணியாளர்களுக்குத் தேவையான பயிற்சிகளும் வழங்கப்படுகின்றன.
வின்ஃபாஸ்ட் வேலைவாய்ப்பு
முதலில் இந்திய சந்தைக்கு சேவை செய்யும் இந்த ஆலை, தெற்காசியா, மத்திய கிழக்கு மற்றும் ஆப்பிரிக்க நாடுகளுக்கும் ஏற்றுமதி செய்யும் திட்டங்களைக் கொண்டுள்ளது. இது தமிழ்நாட்டின் தென்பகுதியில் புதிய பசுமைத் தொழில் மையமாக உருவாக உள்ளது. தூத்துக்குடி துறைமுகத்திற்கு அருகாமையில் அமைந்துள்ளதால், எதிர்கால ஏற்றுமதி நடவடிக்கைகளுக்கு இது ஒரு முக்கிய நிலையமாக அமையும்.
வின்ஃபாஸ்ட் தூத்துக்குடி தொழிற்சாலை, புரிந்துணர்வு ஒப்பந்தம் முதல் முழு உற்பத்தி வரையிலான பயணத்தை வெறும் 19 மாதங்களில் முடித்து, தொழில்துறை வளர்ச்சியில் ஒரு குறிப்பிடத்தக்க சாதனையை நிகழ்த்தியுள்ளது. இந்தியாவின் அண்மைய வரலாற்றில் மிக விரைவாக அமைக்கப்பட்ட வாகன உற்பத்தி ஆலைகளில் இதுவும் ஒன்றாகும்.
Click it and Unblock the Notifications
Sign in with Google