கள்ளக்குறிச்சி மணிமுக்தா அணையிலிருந்து உபரி நீர் திறப்பு... கரையோர மக்களுக்கு வெள்ள அபாய எச்சரிக்கை!

விழுப்புரம்: கள்ளக்குறிச்சி மாவட்டத்தில் உள்ள மணிமுக்தா அணையிலிருந்து 1,308 கன அடி உபரிநீர் வெளியேற்றப்படுகிறது. இதனால் மாவட்ட நிர்வாகம் மூலம் கரையோர மக்களுக்கு வெள்ள அபாய எச்சரிக்கை விடுக்கப்பட்டுள்ளது.

தமிழகம் முழுவதும் பரவலாக இடைவிடாது பெய்து வரும் கனமழையால் ஏரி, குளங்கள் என அனைத்தும் விறுவிறுவென நிரம்பி வருகின்றன. இதையடுத்து அதனை தீவிரமாக கண்காணித்து வரும் மாவட்ட நிர்வாகத்தினர், நிலைமைக்கு ஏற்றவாறு நீரை திறக்க நடவடிக்கை எடுத்து வருகின்றனர்.

அந்த வகையில் கள்ளக்குறிச்சி மாவட்டம் சங்கராபுரம் வட்டம் அணைக்கரைக்கோட்டாலம் அருகே அமைந்துள்ள மணிமுக்தா அணையின் நீர்ப்பிடிப்பு பகுதிகளில் தொடர்ந்து பெய்து வரும் மழையின் காரணமாக அணைக்கு நீர்வரத்து அதிகரித்துள்ளது. 36 அடி உயரம் கொண்ட அணையின் நீர்மட்டம் 34 அடியை எட்டியுள்ளது.

இதனால் நீர்ப்பிடிப்பு பகுதியில் இருந்து அணைக்கு வரும் 1,308 கன அடி நீர் அப்படியே உபரியாக வெளியேற்றப்படுகிறது. இந்நிலையில் அணையின் பாதுகாப்பு மற்றும் முன்னெச்சரிக்கை நடவடிக்கைகள் குறித்து மாவட்ட ஆட்சியர் பி.என்.ஸ்ரீதர் நேரில் பார்வையிட்டு ஆய்வு மேற்கொண்டார்.

அணையின் நீர்ப்பிடிப்பு பகுதிகளில் பெய்து வரும் மழை காரணமாக அணைக்கு வரும் நீரின் அளவு அதிகரிக்கும் என்றும், அவ்வாறு அதிகரிக்கும் பட்சத்தில் அணையிலிருந்து உடனடியாக உபரிநீர் திறந்து விடவும், கரையோர பகுதி மக்கள் பாதுகாப்பாக இருக்கவும் மாவட்ட ஆட்சியர் ஸ்ரீதர் அறிவுறுத்தியிருந்தார்.

மணிமுக்தா அணை நீண்ட நாட்களுக்கு பிறகு நிரம்பியுள்ளதால் அதனை நீராதாரமாக நம்பியுள்ள பாசன விவசாயிகள் மகிழ்ச்சி தெரிவித்துள்ளனர். இதனிடையே விழுப்புரம், கடலூர் மாவட்டங்களில் கனமழை பெய்யக்கூடும் என எதிர்பார்க்கப்படுவதால் மாவட்ட நிர்வாகங்கள் சார்பில் முன்னெச்சரிக்கை நடவடிக்கையாக நீர் நிலைகள் திறந்துவிடப்படுகிறது.

மணிமுக்தா அணையில் தேக்கி வைக்கப்படும் தண்ணீர் மூலம் அதை சுற்றியுள்ள 10-க்கும் மேற்பட்ட கிராமங்களில் நீர்மட்டம் உயர்வதோடு பாசன வாய்க்கால் மூலம் சுமார் 6,000 ஏக்கர் விளை நிலங்கள் பயன்பெறக் கூடும் என்பது கவனிக்கத்தக்கது. கல்வராயன்மலை பகுதியில் பெய்யும் மழையானது மணி மற்றும் முக்தா என இரண்டு ஆறுகள் வழியாக இந்த அணைக்கு தண்ணீராக வந்து சேருகிறது.

English summary

Excess water discharge from Manimukta Dam in kallakurichi district