சிறைக்குள் கஞ்சா கடத்திய பூனை.. கையும் களவுமாக பிடித்த அதிகாரிகள்! சினிமாவில் கூட நடக்காத சம்பவம்

கோஸ்டா ரிகா: சினிமாவில் கூட காட்டப்படாத சீனாக, கோஸ்டா ரிகா நாட்டில் பூனை ஒன்று போதைப்பொருள் கடத்திய சம்பவம் அரங்கேறி இருக்கிறது. பூனை கடத்தி சென்ற 236 கிராம் கஞ்சா, 68 கிராம் ஹெராயின் போதைப் பொருளை அதிகாரிகள் பறிமுதல் செய்துள்ளனர். பூனை போதைப்பொருள் கடத்தி சென்ற வீடியோவை அந்த நாடு இணையத்தில் வெளியிட்டுள்ளது. தற்போது இந்த வீடியோ வேகமாக பரவி வருகிறது.

சிறைச்சாலைக்குள் போதை பொருள் புழக்கம் என்பது உலக அளவில் உள்ள பிரச்சினையாக உள்ளது. பல சினிமாக்களில் கூட சிறைக்குள் போதைப்பொருளை எப்படியெல்லாம் கடத்தி செல்கிறார்கள் என்பது பற்றி பல காட்சிகள் வடிவமைக்கப்பட்டு இருக்கும். சினிமாவில் காட்டுவதை எல்லம் தாண்டியும் கூட சில கடத்தல் சம்பவங்கள் நடக்கும் என்பதுதான் பலரும் சொல்லும் கருத்தாக உள்ளது.

போதைப் பொருள் கடத்திய பூனை

என்னதான் சிறைக்குள் கடுமையான கெடுபிடிகள் காட்டப்பட்டாலும், சிறைக்கைதிகள் ஏதாவது ஒரு வழியில் போதைப் பொருளை எடுத்து செல்வதை தடுக்க முடிவில் முழுமையாக வெற்றி அடைய முடியவில்லை என்பதே பொதுவாக சர்வதேச அளவிலும் சிறை அதிகாரிகள் சொல்லும் கருத்தாக உள்ளது. இது எந்த அளவுக்கு உண்மை என்பதை நிருபிக்கும் வகையில் கோஸ்டா ரிகா நாட்டில் ஒரு சம்பவம் நடைபெற்றுள்ளது.

அதாவது, சிறைக்குள் போதைப்பொருள் கடத்தல் பணியில் கருப்பு - வெள்ளை நிறத்திலான பூனை ஒன்று ஈடுபட்டுள்ளது. இதை படிக்கும் போதே புருவத்தை உயர்த்துவதை பார்ப்பது தெரிகிறது. உண்மைதாங்க.. பூனைதான் கடத்தலில் ஈடுபட்டுள்ளது. இது குறித்த விவரங்கள் வருமாறு:- ஆப்பிரிக்க நாடுகளில் ஒன்றான கோஸ்டா ரிக்காவில் உள்ள சிறை அருகே பூனை ஒன்று நடமாடியது. சிறிது நேரத்தில் சிறையை சுற்றி அமைக்கப்பட்டுள்ள வேலியில் ஏற அந்த பூனை முயன்றது.

236 கிராம் கஞ்சா, 68 கிராம் ஹெராயின்

இதைக்கவனித்த போலீசார், பூனையின் உடம்பில் வழக்கத்திற்கு மாறாக ஏதோ இருப்பதை கண்டுபிடித்தனர். உடனே பூனையை பிடித்து சோதனை செய்ததில், பூனையின் உடல் நிறத்தில், மேலே ஒரு ஸ்டிக்கர் ஒட்டி, அதற்குள் கஞ்சா, கோக்கைன் உள்ளிட்ட போதைப்பொருள் இருந்தது. இதனை கண்டு அதிகாரிகள் அதிர்ந்தனர். 236 கிராம் கஞ்சா, 68 கிராம் ஹெராயின் மற்றும் ரோலிங் பேப்பர் ஆகியவை பூனையின் முதுகில் ஒட்டி வைக்கப்பட்டு இருந்து.

பூனையின் நிறத்தை அப்படியே பிரதிபலிக்கும் வண்ணத்தில் உடலின் மேற்பரப்பில் ஸ்டிக்கர் ஒட்டப்பட்டு அதற்குள் கஞ்சா வைத்திருந்ததை கண்டுபிடித்து போலீசார் மீட்டுள்ளனர். கோஸ்ட ரிக்கா நாட்டின் நீதித்துறை அமைச்சகம் இந்த வீடியோவை தனது பேஸ்புக்கில் வெளியிட்டுள்ளது. அதில், போகோசி சிறைச்சாலையில் இரண்டு டிரக் பேக்கேஜ்களுடன் சுற்றி திரிந்த பூனையை சிறை போலீசார் பிடித்துள்ளனர்.

நெட்டிசன்கள் கருத்து

பூனையானது தேசிய சுகாதார சேவைகள் மையத்திடம் ஒப்படைக்கப்பட்டுள்ளது. அதன் உடல் நிலை கண்கணிக்கப்பட்டு வருகிறது. இந்த சம்பவம் எப்படி நடைபெற்றது. பூனையை பழக்கப்படுத்தி இத்தகைய செயலில் ஈடுபட வைக்கப்பட்டதா? யார் இதை செய்தனர்? என்று விசாரணை நடைபெற்று வருவதாக தெரிவித்துள்ளனர். பூனையை கூட விட்டு வைக்காமல் போதை பொருள் கடத்தலுக்கு கும்பல்கள் ஈடுபடுத்தியது சமூக வலைத்தளங்களில் அதிகம் விவாதிக்கப்பட்டு வருகிறது.

பூனை உடலில் இருந்து போதைப்பொருள் கைப்பற்றப்படும் வீடியோ காட்சிகள் சமூக வலைத்தளங்களில் பரவியது. இப்படியெல்லாம் யோசிக்க முடியுதா? என நினைக்கும் வகையில், கடத்தல் பேர்வழிகளின் செயல்பாடுகள் அமைந்து இருப்பதை காட்டுகிறது என்று நெட்டிசன்கள் கூறியுள்ளனர். சில நெட்டிசன்களோ, பூனையை ஏன் இப்டி பயன்படுத்துகிறார்கள் என்று பதிவிட்டுள்ளனர்.

English summary

In a rare incident that has not even been shown in cinema, a cat has been caught smuggling drugs in Costa Rica. Authorities have seized 236 grams of cannabis and 68 grams of heroin from the cat. The country has posted a video of the cat smuggling drugs on the internet. The video is currently going trend.