"ஹூஸ்டன் பல்கலைக்கழகத்தில் தமிழ் இருக்கை நிறுவப்படும்.." அமெரிக்காவில் பிரதமர் மோடி பேச்சு

Updated: Saturday, June 24, 2023, 6:52 [IST]

Subscribe to Oneindia Tamil

வாஷிங்டன்: ஹூஸ்டன் பல்கலைக்கழகத்தில் தமிழ் இருக்கை நிறுவப்படும் என்று அமெரிக்காவில் இந்திய சமூகத்தினர் மத்தியில் பிரதமர் மோடி அறிவித்தார்.

பிரதமர் மோடி அமெரிக்காவிற்கு அரசுமுறை சுற்றுப்பயணம் மேற்கொண்டுள்ளார். பிரதமர் மோடிக்கு வெள்ளை மாளிகையில் அணிவகுப்பு மரியாதை வழங்கப்பட்டது. அதுமட்டும் இன்றி அமெரிக்க அதிபர் ஜோ பைடனும், அவரது மனைவி ஜில் பைடனும் தனிப்பட்ட முறையில் இரவு விருந்து அளித்து கவுரவித்தனர். இதே போன்று அமெரிக்க அரசின் சார்பில், பிரதமர் மோடிக்கு நேற்று முன்தினம் இரவு விருந்து அளிக்கப்பட்டது.

Tamil Studies chair will be established at University of Houston- PM Modi To Indian Community In US

தொடர்ந்து பல்வேறு நிகழ்ச்சிகளில் பிரதமர் மோடி பங்கேற்று வருகிறார். அந்த வகையில், இந்திய சமூகத்தினர் மத்தியில் பிரதமர் மோடி உரையாற்றினார். அப்போது அவர் கூறியதாவது:- அமெரிக்காவில் எனக்கு கிடைத்த அன்பு அருமையாக உள்ளது. இந்த பெருமை உங்களையே சேரும். ஜோ பைடனும் நானும் பல்வேறு விஷயங்கள் குறித்து கடந்த 3 தினங்களாக பேசினோம். ஜோ பைடன் அனுபவம் வாய்ந்த அரசியல் வாதி என என்னால் சொல்ல முடியும்.

இந்தியா - அமெரிக்கா உறவை அடுத்த கட்டத்திற்கு எடுத்து செல்ல அவர் எப்போதுமே முயற்சிக்கிறார். இந்தியாவின் மிகப்பெரும் வளர்ச்சிக்கு நாட்டில் உள்ள 140 கோடி மக்களின் நம்பிக்கையே காரணம். மோடி தனியாக எதையும் செய்யவில்லை. 100 ஆண்டுகளுக்கு மேலாக இருந்த காலனித்துவம் நம்மிடம் இருந்து பறித்த நம்பிக்கையை புதிய இந்தியா மீட்டுள்ளது.

இந்தியா தனது பாதை மற்றும் திசையை சரியாக அறிந்திருக்கிறது, இந்தியாவின் முடிவுகளில் குழப்பம் இல்லை. இந்தியா உள்கட்டமைப்புகளுக்காக இதற்கு முன்பாக இவ்வளவு முதலீடுகள் செய்தது இல்லை. இந்தியா ஜனநாயகத்தின் தாய். அமெரிக்கா நவீன ஜனநாயகத்தின் சாம்பியன். இந்தியாவில் இருந்து திருடி கொண்டு செல்லப்பட்ட நூற்றுக்கும் மேற்பட்ட சிலைகளை ஒப்படைக்க அமெரிக்க அரசு முடிவு செய்துள்ளது.

இந்தியா - அமெரிக்கா கூட்டுறவு 21 ஆம் நூற்றாண்டை உலகமை இன்னும் சிறந்த இடத்திற்கு கொண்டு செல்வதாகும். அமெரிக்காவில் இருந்து முதலீடுகள் வேலை வாய்ப்பு உருவாக்கத்தை மேலும் மேம்படுத்தும். இந்தியாவில் முடிந்த அளவு முதலீடுகளை செய்ய இதுதான் சிறந்த தருணம் ஆகும். இந்தியாவில் உள்ள கூகுள் ஏஐ- யின் ஆய்வு மையம் 100 க்கும் மேற்பட்ட மொழிகளில் செயல்படும். ஹூஸ்டனில் உள்ள பல்கலைக்கழகத்தில் இந்திய அரசு உதவியுடன் தமிழ் இருக்கை நிறுவப்படும்" என்றார்.