அமெரிக்காவில்.. தடுப்பூசி போட்டவர்கள் மாஸ்க் அணிய வேண்டாம்.. பைடன் அரசு கொடுத்த ஸ்பெஷல் ஆபர்!

Updated: Wednesday, April 28, 2021, 12:50 [IST]

Subscribe to Oneindia Tamil

வாஷிங்டன்: அமெரிக்காவில் கொரோனா தடுப்பூசி போட்டுக்கொண்டவர்கள் இனி பொது இடங்களில் மாஸ்க் கட்டாயமாக அணிய வேண்டிய அவசியமில்லை என்று அறிவிக்கப்பட்டுள்ளது.

கொரோனா படுத்தியபாடு

உலகின் வல்லரசு நாடுகளில் ஒன்றான அமெரிக்காவில் கடந்த ஆண்டு கொரோனா பாடாய்படுத்தி விட்டது. இப்போதும் அதிக தொற்று பாதிப்பில் அமெரிக்காவே முதலிடம் பிடித்துள்ளது. அங்கு இதுவரை மொத்தம் 32,927,091 பேர் கொரோனாவால் பாதிக்கப்பட்டுள்ளனர்.587,384 பேர் கொரோனாவுக்கு உயிரிழந்துள்ளனர். தொற்றில் இருந்து 25,521,913 பேர் குணமடைந்துள்ளனர்.

கூடுதல் தளர்வுகள்

அங்கு 6,817,794 பேர் கொரோனாவுக்கு சிகிச்சை பெற்று வருகின்றனர். தீவிர தொற்று பரவல் காரணமாக அமெரிக்காவில் கொரோனா தடுப்பூசி போடும் பணிகள் முடுக்கி விடப்பட்டது. தொற்றை கட்டுக்குள் கொண்டு வர ஊரடங்கும் போடப்பட்டது. இதன் பயணமாக அங்கு தற்போது கொரோனா தொற்று குறைந்து விட்டது.
தொற்று தொடர்ந்து குறைந்து வருவதால் ஏராளமான தளர்வுகள் அளிக்கப்பட்டு வருகின்றன.

மாஸ்க் அணிய வேண்டும்

இந்த நிலையில் கொரோனா தடுப்பூசி போட்டுக்கொண்டவர்கள் இனி பொது இடங்களில் மாஸ்க் கட்டாயமாக அணிய வேண்டிய அவசியமில்லை என அமெரிக்கா சுகாதார கட்டமைப்பு அதிகாரிகள் தெரிவித்துள்ளனர். அதே வேளையில் தடுப்பூசி போட்டுக் கொண்டவர்கள் கூட்டமான இடங்களில் செல்ல நேர்ந்தால் மாஸ்க் அணிய வேண்டும் என்றும் தியேட்டர்கள் போன்ற உள் அரங்கு கூடத்தில் நடைபெறும் நிகழ்ச்சிகளில் பங்கேற்கும் போதும் மாஸ்க் அணிய வேண்டும் என்று அதிகாரிகள் தெரிவித்துள்ளனர்.

30% பேருக்கு தடுப்பூசி

ஃபைசர்-பயோஎன்டெக் அல்லது மாடர்னா தடுப்பூசிகளின் இரண்டாவது அளவைப் பெற்ற இரண்டு வாரங்களுக்குப் பிறகு அல்லது ஜான்சன் & ஜான்சன் தடுப்பூசி பெற்ற இரண்டு வாரங்களுக்குப் பிறகு தனிநபர்கள் முழுமையாக தடுப்பூசி போடப்பட்டதாக கருதப்படுவார்கள். இவர்களுக்கே மாஸ்க் தளர்வுகள் பொருந்தும் என்று அமெரிக்க சுகாதார கட்டமைப்பு கூறியுள்ளது. கடந்த செவ்வாய்க்கிழமை நிலவரப்படி, அமெரிக்க மக்கள்தொகையில் கிட்டத்தட்ட 30% பேர் முழுமையாக தடுப்பூசி இரண்டு டோஸை போட்டுள்ளனர். 42% க்கும் அதிகமானோர் குறைந்தது ஒரு டோஸை பெற்றுள்ளதும் குறிப்பிடத்தக்கது.