கலர்புல் குடைமிளகாய் சட்னி! சப்பாத்தி, தோசைக்கு வித்தியாசமான சுவையில் கேப்சிகம் சைட் டிஷ்!

Capsicum Chutney Recipe In Tamil: ஆரோக்கியமான காய்கறிகளை உங்கள் உணவில் சேர்த்துக் கொள்ள வேண்டும் என்ற ஆசை இருந்தும், அதை எப்படி சுவையாக மாற்றுவது என்று தெரியாமல் தவிக்கிறீர்களா? கவலை வேண்டாம், உங்கள் சமையலறையில் இருக்கும் குடைமிளகாயை வைத்து ஒரு அற்புதமான மற்றும் நாவூறும் சட்னியைத் தயார் செய்ய முடியும்.

இந்த குடைமிளகாய் சட்னி அதன் நிறத்தாலும், மணத்தாலும் குழந்தைகளை முதல் பெரியவர்கள் வரை அனைவரையும் எளிதில் கவர்ந்துவிடும். குடைமிளகாயின் தனித்துவமான சுவை இந்த சட்னிக்கு ஒரு கூடுதல் பலத்தை சேர்க்கிறது.

இந்த குடைமிளகாய் சட்னியில் ஏராளமான ஆரோக்கிய நன்மைகள் ஒளிந்துள்ளன. குடைமிளகாயில் உள்ள வைட்டமின் ஏ மற்றும் சி சத்துக்கள் உங்கள் சருமத்திற்கும், கண்களுக்கும் மிகவும் நல்லது. மேலும், இதில் நாம் சேர்க்கும் உளுத்தம் பருப்பு மற்றும் கடலை பருப்பு உடலுக்குத் தேவையான புரதச்சத்தை வழங்குகின்றன.

பல நேரங்களில் குடைமிளகாயின் வாசனை சிலருக்குப் பிடிக்காது, ஆனால் இந்த முறையில் வதக்கி அரைக்கும்போது அதன் வாசனை மிகவும் இதமாகவும், சுவை அபாரமாகவும் இருக்கும். இந்த சட்னியை பிரிட்ஜில் வைத்தால் இது இரண்டு நாட்கள் வரை கெடாமல் இருக்கும்.

தேவையான பொருட்கள்

• குடைமிளகாய் (பெரியது) - 2 எண்ணம்

• பெரிய வெங்காயம் - 2 எண்ணம்

• தக்காளி - 1 எண்ணம்

• பூண்டு - 4 பற்கள்

• உளுத்தம் பருப்பு - 1 டீஸ்பூன்

• கடலை பருப்பு - 1 டீஸ்பூன்

• வரமிளகாய் - 4 (காரத்திற்கு ஏற்ப)

• புளி - ஒரு சிறு நெல்லிக்காய் அளவு

• எண்ணெய் - 3 டேபிள் ஸ்பூன்

• உப்பு - தேவையான அளவு

• கடுகு மற்றும் கருவேப்பிலை - தாளிக்க

செய்முறை விளக்கம்

• முதலில் குடைமிளகாயை நன்கு கழுவி, உள்ளே இருக்கும் விதைகளை நீக்கிவிட்டு நடுத்தர அளவிலான துண்டுகளாக நறுக்கிக் கொள்ளவும். அதேபோல் வெங்காயம் மற்றும் தக்காளியையும் நறுக்கித் தயாராக வைக்கவும்.

• பின் ஒரு வாணலியில் இரண்டு ஸ்பூன் எண்ணெய் ஊற்றி சூடாக்கவும். எண்ணெய் காய்ந்ததும் உளுத்தம் பருப்பு, கடலை பருப்பு மற்றும் வரமிளகாய் சேர்த்து மிதமான தீயில் பொன்னிறமாகும் வரை வறுத்து தனியாக ஒரு தட்டில் எடுத்து வைக்கவும்.

• அடுத்து அதே வாணலியில் நறுக்கிய வெங்காயம் மற்றும் பூண்டு சேர்த்து பொன்னிறமாக வதக்கவும். வெங்காயம் கண்ணாடி பதம் வந்தவுடன், நறுக்கி வைத்துள்ள குடைமிளகாயைச் சேர்த்து நன்கு வதக்க வேண்டும்.

• பிறகு குடைமிளகாய் சுருங்கி அதன் பச்சை வாசனை மறைந்தவுடன், நறுக்கிய தக்காளி, புளி மற்றும் தேவையான அளவு உப்பு சேர்த்து வதக்கவும். தக்காளி நன்கு குழைந்து மசியும் வரை வதக்கிவிட்டு அடுப்பை அணைக்கவும்.

• இறுதியாக வதக்கிய பொருட்கள் அனைத்தும் நன்கு ஆறின பிறகு, முதலில் வறுத்த பருப்புகளுடன் சேர்த்து மிக்ஸி ஜாரில் போட்டு சிறிது தண்ணீர் தெளித்து நைசாக அரைக்கவும். பின் கடுகு, கருவேப்பிலை தாளித்து சட்னியில் சேர்த்தால் சுவையான குடைமிளகாய் சட்னி தயார்.