Annabishekam: "சோறு கண்ட இடமே சொர்க்கம்" என்றால் என்ன அர்த்தம் தெரியுமா? இனி கிண்டல் செய்யாதீங்க!

Updated: Wednesday, November 5, 2025, 7:47 [IST]

Subscribe to Oneindia Tamil

சென்னை: சோறு கண்ட இடமே சொர்க்கம் என நாம் பலரையும் கிண்டல் செய்திருக்கிறோம். ஆனால் அப்படி யாரையும் சொல்லாதீர்கள். அதன் உண்மையான அர்த்தம் என்ன என்பதை தெரிந்து கொள்ளுங்கள்.

சோறு கண்டால் சொர்க்க உண்டு என்ற சொலவடையை தற்போது சோறு கண்ட இடமே சொர்க்கம் என மாற்றி கூறுகிறார்கள். இதை கிண்டலுக்காக பயன்படுத்துகிறார்கள். அதாவது சோறு கிடைத்தால் போதும் அந்த இடமே சொர்க்கம்தான் என பொருள்படியாக அவர்கள் கிண்டல் செய்கிறார்கள்.

உண்மையில் சோறு கண்டால் சொர்க்கம் என்பதுதான் சரியான பழமொழி. அதாவது ஐப்பசி மாதம் பவுர்ணமி அன்று சிவலிங்கத்திற்கு அன்னாபிஷேகம் செய்யப்படும். அதில் ஒள்ள ஒவ்வொரு பருக்கையும் ஒவ்வொரு சிவலிங்கமாக கருதப்படுகிறது. எனவே அன்றைய தினம் சிவலிங்க தரிசனம் செய்பவர்கள் கோடி சிவலிங்கத்தை தரிசித்ததற்கான பலனை பெறுவார்கள்.

மேலும் அன்னாபிஷேக தரிசனத்தை காண்பவர்களுக்கு மோட்சம் கிடைக்கும் என்பது ஐதீகம். இதனைத்தான் சோறு கண்டால் சொர்க்கம் என முன்னோர்கள் சொல்லி வைத்தனர்.

சிவன் கோயில்களில் தினந்தோறும் 16 வகையான பொருட்களால் அபிஷேகம் நடந்தாலும் ஆண்டுக்கு ஒரு முறை ஐப்பசி மாத பவுர்ணமி அன்று நடக்கும் அன்னாபிஷேகம் மிகவும் விசேஷமானதாகும். இந்த அன்னாபிஷேகத்தை கண் குளிர பார்த்தவர்களுக்கு சொர்க்கம் நிச்சயம் என்பார்கள்.

ஐப்பசி பவுர்ணமியானது நேற்று இரவு 10.36 மணிக்கு பிறந்தது. இது இன்று மாலை 6.48 மணி வரை நீடிக்கிறது. இன்று சிவன் கோயில்களில் அன்னாபிஷேகம் நடைபெறுகிறது.

இது போன்ற சிறப்பான நாளில் சிவன் கோயில்களில் சிவனுக்கு அன்னத்தால் அபிஷேகம் செய்யப்படுகிறது.லிங்கம் முழுவதும் அன்னம் சாத்தப்பட்டிருக்கும். இந்த அன்னத்தை சாப்பிட்டால் குழந்தை இல்லாதவர்களுக்கு நிச்சயம் குழந்தை பிறக்கும்.

பிரதோஷத்திற்கு பால், இளநீர், தேன், தயிர் உள்ளிட்டவை வாங்கித் தருவது போல் அன்னாபிஷேகத்திற்கு அரிசி வாங்கிக் கொடுத்தால் நம் வீட்டில் உணவு தட்டுப்பாடு இருக்காது என்பது ஐதீகம்! சிவன் மேல் சாத்தப்பட்ட சாதத்தை எடுத்து பக்தர்களுக்கு வழங்கப்படும் பிரசாதத்தில் கலந்து விநியோகம் செய்வார்கள்.