கும்பகோணம் நவகிரக சுற்றுலா.. உற்சாகமாக கிளம்பிய பயணிகள்.. ஒரே நாளில் 9 கோவில்கள் தரிசனம்

சென்னை: கும்பகோணத்தை சுற்றியுள்ள நவக்கிரக தலங்களுக்கு சிறப்பு சுற்றுலா பேருந்து இன்று முதல் தொடங்கியுள்ளது. குறைந்த கட்டணத்தில் ஒரே நாளில் 9 தலங்களை தரிசனம் செய்யலாம் என அறிவிக்கப்பட்டுள்ளதால் ஏராளமான பயணிகள் உற்சாகமாக ஆன்மீக சுற்றுலாவிற்கு கிளம்பியுள்ளனர்.

கும்பகோணத்தை சுற்றி நவகிரக தலங்கள் உள்ளன. பல்லாயிரக்கணக்கான மக்கள் பரிகாரங்களுக்காக நவகிரக தலங்களுக்கு சென்று வருகின்றனர். அருகில் உள்ள ஆலயங்களுக்கும் செல்கின்றனர். இதற்காக தனித்தனியாக பஸ், ஆட்டோ, கார் மூலம் பயணம் செய்வதால் அதிக செலவாகிறது.

கும்பகோணம் மற்றும் அதைசுற்றியுள்ள நவக்கிரக தலங்களுக்கு ஒரே நாளில் ஒரே பேருந்தில் பயணம் செய்யும் வகையில் சிறப்பு பேருந்து இயக்க வேண்டும் என்பது பயணிகள், பக்தர்களின் நீண்ட நாள் கோரிக்கையாக இருந்து வந்தது. அதை ஏற்று, நவக்கிரக சுற்றுலா சிறப்பு பேருந்து இயக்கம் பிப்ரவரி 24ஆம் தேதி தொடங்க உள்ளதாக போக்குவரத்துத்துறை அமைச்சர் சிவசங்கர் தெரிவிதார். அதன்படி இன்று முதல் நவகிரக சுற்றுலா பேருந்து அதிகாலையிலேயே கிளம்பியுள்ளது.

மாசிமகம் என்பதால் நேற்று முதலே ஏராளமானோர் கும்பகோணத்திற்கு வந்துள்ளனர். முன்பதிவு செய்த பயணிகளுடன் கும்பகோணம் பேருந்து நிலையத்தில் இருந்து காலை 6 மணிக்கு நவகிரக சுற்றுலாவிற்கு கிளம்பினர். திங்களூர் சந்திரன் கோயில், ஆலங்குடி குரு பகவான் தரிசனம் முடிந்து காலை உணவுக்காக இடைவேளை விடப்பட்டது.

காலை 9 மணிக்கு திருநாகேஸ்வரம் ராகு பகவான் தரிசனம், 10 மணிக்கு சூரியனார்கோவில் சூரிய பகவான் தரிசனம் முடிந்து பக்தர்கள் 11 மணிக்கு கஞ்சனூர் சுக்கிரன் கோயில் தரிசனத்திற்கு அழைத்துச் செல்லப்படுவார்கள். 11.30 மணிக்கு வைத்தீஸ்வரன்கோவில் செவ்வாய் கிரக தரிசனத்துக்கு பயணிகள் இறக்கிவிடப்படுவார்கள்.

பிற்பகல் 12.30 முதல் 1.30 வரை மதிய உணவு இடைவேளை. பிற்பகல் 2.30 மணிக்கு திருவெண்காடு புதன் கோயில் தரிசனம், மாலை 4 மணிக்கு கீழபெரும்பள்ளம் கேது பகவான் தரிசனம், 4.45 மணிக்கு திருநள்ளாறு சனி பகவான் கோயிலுடன் தரிசனம் நிறைவடைகிறது. மாலை 6 மணிக்கு புறப்பட்டு இரவு 8 மணிக்குள் பேருந்து மீண்டும் கும்பகோணம் வந்தடையும்.

நவக்கிரக சுற்றுலாவுக்கு பயண கட்டணம் ரூ.750 ஆகும். இத்தலங்களை காரில் சென்று தரிசிக்க வாடகையாக மட்டும் குறைந்தது ரூ.6,500 செலவிட வேண்டிய நிலையில், பேருந்துக்கு குறைவான கட்டணமே நிர்ணயம் செய்யப்பட்டுள்ளது. வாரந்தோறும் சனி, ஞாயிறு கிழமைகளில் நவகிரக சுற்றுலா பேருந்து இயக்கப்படும். இந்த பேருந்தில் பயணிக்க tnstc செயலி அல்லது www.tnstc.in என்ற இணையதளத்தில் முன்பதிவு செய்ய வேண்டும்.

English summary

Kumbakonam Navagraha tour: (கும்பகோணம் நவகிரக சுற்றுலா) Special tourist bus to Navagraha places around Kumbakonam has started from today. As it has been announced that they can visit 9 places in a single day at a low cost, many travelers are enthusiastically embarking on spiritual tourism.