திருப்பதி ஏழுமலையானுக்கு சேவை.. உண்டியல் காணிக்கை எண்ண விருப்பமா?.. அப்ளை பண்ணுங்க

திருப்பதி: திருமலை திருப்பதி ஏழுமலையான் கோயிலில் 2024 பிப்ரவரி மாதத்திற்கான ரூ.300 சிறப்பு நுழைவு தரிசன டிக்கெட்டுகள் நாளை காலை 10 மணிக்கு ஆன்லைனில் வெளியாகும் என்று அறிவிக்கப்பட்டுள்ளது. திருமலை திருப்பதி தேவஸ்தானத்தின் ஸ்ரீவாரி சேவை மூலம் தன்னார்வலர்களாக சேவை செய்ய விரும்பும் பக்தர்கள் வரும் 27ஆம் தேதி ஆன்லைனில் முன்பதிவு செய்யலாம்.

ஏழுமலையானை தரிசனம் செய்ய தினசரியும் பல்லாயிரக்கணக்கான பக்தர்கள் வந்து செல்கின்றனர். மணிக்கணக்கில் காத்திருந்தாலும் சில நிமிடங்கள் மட்டுமே ஏழுமலையான் தரிசனம் கிடைக்கிறது. அதைப்பற்றி கவலைப்படாமல் பக்தர்கள் நாள் கணக்கில் கூட காத்திருக்கின்றனர்.

விரைவு தரிசனத்திற்காக 300 ரூபாய் டிக்கெட் ஆன்லைனில் புக் செய்து ஏழுமலையானை தரிசனம் செய்கின்றனர். 4 மாதங்களுக்கு முன்பே ஆன்லைன் தரிசன டிக்கெட்டுகள் இணைய தள பக்கத்தில் வெளியிடப்படும். அங்கப்பிரதட்சணம், கட்டண சேவைகளுக்கான டிக்கெட்டுகள் 21ஆம் தேதி வெளியான நிலையில் 300 ரூபாய் தரிசன டிக்கெட்டுகள் நாளைய தினம் வெளியிடப்பட உள்ளது.

திருமலை மற்றும் திருப்பதியில் உள்ள அறைகளும் நாளை மாலை 3 மணிக்கு ஆன்லைனில் வெளியிடப்படும். எனவே பக்தர்கள் https://ttdevasthanams.ap.gov.in இணையதளத்தில் தரிசன டிக்கெட் மற்றும் அறைகளை முன்பதிவு செய்து கொள்ளுமாறு தேவஸ்தானம் வெளியிட்டுள்ள அறிக்கையில் தெரிவிக்கப்பட்டுள்ளது.

ஏழுமலையான் கோயிலில் அடுத்த ஆண்டு பிப்ரவரி 16 அன்று நடைபெறும் ரதசப்தமிக்காக தன்னார்வலர்களாக ஸ்ரீவாரி சேவா திட்டத்தில் சேவை செய்வதற்கான முன்பதிவு இந்த மாதம் 27ஆம் தேதி அன்று காலை 10 மணிக்கு ஆன்லைனில் வெளியிடும். இதற்காக 18 முதல் 50 வயது வரை உள்ளவர்கள் மட்டுமே இந்த தன்னார்வலர் சேவையில் பதிவு செய்ய தகுதியுடையவர்கள்.

இதேபோல், 2024 ஜனவரி மற்றும் பிப்ரவரி மாதங்களுக்கான ஸ்ரீவாரி சேவை மற்றும் நவநீத சேவையில் பங்கேற்க இந்த மாதம் 27 அன்று மதியம் 12 மணிக்கு திருமலை மற்றும் திருப்பதியில் பக்தர்களுக்கு சேவை செய்வதற்கான தன்னார்வ சேவைக்காக வெளியிடப்படும்.

அதே நாளில் மாலை 3 மணிக்கு உண்டியல் காணிக்கை எண்ணும் பரக்காமணி சேவையில் பங்கேற்க முன்பதிவு செய்து கொள்வதற்காக www.tirumala.org என்ற இணையதளத்தில் பக்தர்கள் முன்பதிவு செய்து கொள்ளலாம் என்று தேவஸ்தானம் வெளியிட்டுள்ள அறிக்கையில் தெரிவிக்கப்பட்டுள்ளது.

English summary

To register for Srivari seva through online click on the following link Online Registration for Srivari Seva on 27th November 2023. Tirumala Tirupati Elumalaiyan Temple Rs 300 special entry darshan tickets for the month of February 2024 will be released online tomorrow at 10 am.