ராமராஜனும் நானும் பிரிந்த உண்மை காரணம்! 13 வருஷமா இழுத்து பிடிச்சி வாழ்ந்தோம்! நடிகை நளினி உருக்கம்

சென்னை: 80 மற்றும் 90-களில் தமிழ், தெலுங்கு, மலையாளம் போன்ற பல மொழித் திரைப்படங்களில் முன்னணி கதாநாயகியாக வலம் வந்தவர் நடிகை நளினி. வெள்ளித்திரையில் கொடிகட்டிப் பறந்த இவர், திடீரென நடிகர் ராமராஜனை திருமணம் செய்துகொண்டார். சுமார் 13 ஆண்டுகள் நீடித்த இவர்களது திருமண வாழ்க்கை விவாகரத்தில் முடிந்த நிலையில், பிரிவுக்குக் காரணம் என்ன என்று நளினி மனம் திறந்து பேசியுள்ளார்.

நளினி & ராமராஜன்: ஒரு பார்வை

நடிகை நளினி 1980 மற்றும் 90-ஆம் ஆண்டுகளில் தமிழ் சினிமாவின் முன்னணி நடிகைகளில் ஒருவராக வலம் வந்தவர். கதாநாயகியாக மட்டுமல்லாமல் குணச்சித்திர வேடங்களிலும் நடித்து பிரபலமானவர். இவர், சின்னத்திரையிலும் பல வெற்றித் தொடர்களில் நடித்துள்ளார். குறிப்பாக, இவரது நடிப்பில் வெளியான 'சின்ன பாப்பா பெரிய பாப்பா' என்ற காமெடி சீரியல் இவருக்கு ஒரு பெரிய அங்கீகாரத்தை பெற்றுத் தந்தது. இப்போதும் தொடர்ந்து சினிமா மற்றும் சீரியலில் நடித்துக் கொண்டிருக்கிறார்

நடிகர் ராமராஜன்

'மக்கள் நாயகன்' என்று ரசிகர்களால் கொண்டாடப்பட்டவர் நடிகர் ராமராஜன். இவர், 80 மற்றும் 90-களில் பல கிராமியப் பின்னணி கொண்ட வெற்றிப் படங்களைக் கொடுத்தவர். பெரும்பாலும், வெள்ளைச் சட்டை, வேட்டி, அரை டவுசர் போட்டுக்கிட்டு கிராமத்துக் கதாநாயகனாக நடித்தே இவர் தனக்கென ஒரு பெரிய ரசிகர் பட்டாளத்தை உருவாக்கினார்.

பிரிவுக்கு காரணம்

நடிகை நளினியும் நடிகர் ராமராஜனும் காதலித்துத் திருமணம் செய்துகொண்டனர். இவர்களுக்கு இரண்டு குழந்தைகள் உள்ளனர். 13 வருடங்கள் நல்லபடியாகப் போயிருந்த இவர்களது இல்லற வாழ்க்கையில், கருத்து வேறுபாடு காரணமாக 2000-ஆம் ஆண்டு விவாகரத்துப் பெற்றுப் பிரிந்தனர்.

இந்த நிலையில், பிரிவுக்குக் காரணம் என்ன என்று நடிகை நளினி சமீபத்தில் ஒரு பேட்டியில் தெரிவித்துள்ளார். அது மிகவும் வித்தியாசமானதாகவும், அதிர்ச்சி அளிப்பதாகவும் உள்ளது: "நல்லா போயிருந்த வாழ்க்கையில நாங்க பிரிஞ்சதுக்குக் காரணம் ஜாதகம் தான். அவர் (ராமராஜன்) நல்லா ஜோசியம் பார்ப்பார்." "நாம பிரிஞ்சிடுவோம்னு சொல்லிக்கிட்டே இருப்பார்!"

"கல்யாணம் ஆன கொஞ்ச வருஷத்திலேயே 'நாம நாலு, அஞ்சு வருஷத்துல பிரிஞ்சிடுவோம்' என்று சொல்லிட்டே இருப்பார். ஆனால் எப்படியோ ரப்பர் மாதிரி 13 வருஷம் இழுத்துட்டு வந்துட்டோம்." மேலும், அவர் எதற்காகத் தன்னைத் திருமணம் செய்துகொண்டார் என்று ராமராஜன் கூறிய மற்றொரு தகவலையும் நளினி பகிர்ந்துள்ளார்.

"உன்னை கல்யாணம் பண்ணதால தான் நல்லா இருந்தேன். அதே மாதிரி, கல்யாணத்துக்கு எம்.ஜி.ஆர் வருவாங்க என்ற ஒரே காரணத்துக்காகத் தான் உன்னைக் கல்யாணம் பண்ணினேன் என்றும் (ராமராஜன்) சொல்லுவார்" என நடிகை நளினி தெரிவித்தார்.

ஜாதக ரீதியிலான முரண்பாடுதான் பிரிவுக்குக் காரணம் என்று நளினி கூறியிருக்கும் இந்தத் தகவல், ரசிகர்கள் மத்தியில் ஆச்சரியத்தையும், சோகத்தையும் ஏற்படுத்தியுள்ளது. தமிழ் சினிமாவின் பிரபல ஜோடிகளில் ஒருவரான நளினி - ராமராஜனின் விவாகரத்துக் கதை, பல வருடங்களுக்குப் பிறகு மீண்டும் பேசுபொருளாகியுள்ளது. இவர்கள் இருவரும் பிரிந்து போய் இருந்தாலும் இப்போதும் ஒருவரை ஒருவர் எந்த இடத்திலும் விட்டுக் கொடுக்காமல் குறை சொல்லாமல் பேசுவது பலராலும் பாராட்டப்பட்டு வருகிறது.

English summary

Actress Nalini : Veteran actress Nalini, who ruled Tamil, Telugu, and Malayalam cinema in the 80s and 90s, has revealed surprising details about her divorce from actor Ramarajan. The couple, once considered one of Tamil cinema’s most loved pairs, were married for 13 years before parting ways in 2000. In a recent interview, Nalini said that astrology played a major role in their separation. She shared that Ramarajan often predicted they would eventually separate, saying, “We’ll split in four or five years,” and that their marriage lasted longer “like a stretched rubber band.” Nalini also recalled Ramarajan joking that he married her mainly because M.G.R. would attend the wedding. Her candid revelation about astrological differences being the reason for their breakup has left fans shocked and emotional. Despite their separation, both continue to speak respectfully about each other, earning admiration from fans even today.