வரப்போகுது பிக் பாஸ் தமிழ் சீசன் 9 நிகழ்ச்சி! அதுவும் எப்போ தெரியுமா! தொகுப்பாளர் இவர்தானா?

Updated: Wednesday, July 23, 2025, 18:27 [IST]

Subscribe to Oneindia Tamil

சென்னை: விஜய் டிவியில் ஒளிபரப்பாகி வந்த பிக் பாஸ் தமிழ் சீசன் எட்டாவது நிகழ்ச்சி முடிவடைந்ததை தொடர்ந்து இப்போது பிக் பாஸ் தமிழ் ஒன்பதாவது சீசன் விரைவில் தொடங்கவுள்ளது. இந்த ஆண்டுக்கான பிக் பாஸ் நிகழ்ச்சி முன்கூட்டியே தொடங்கப்பட இருப்பதாக தகவல்கள் தெரிவிக்கின்றன.

இந்தியாவில் பிக் பாஸ் நிகழ்ச்சி முதன் முதலில் இந்தியில் தொடங்கப்பட்டது. அதன் பிறகு, 2017ஆம் ஆண்டு தமிழில் கமல்ஹாசன் தொகுப்பாளராக இந்நிகழ்ச்சியைத் தொகுத்து வழங்கினார். முதல் சீசன் பெரும் வரவேற்பைப் பெற்றது. ஆரம்பத்தில் விமர்சனங்கள் வந்தாலும் போகப்போக இந்த நிகழ்ச்சியை பார்ப்பதற்கு பலரும் ஒரு ஆர்வம் காட்டி வந்தனர். பக்கத்து வீட்டு சண்டையை எட்டி பார்ப்பது போல இந்த வீட்டிற்குள் பிரபலங்கள் என்ன செய்கிறார்கள் என்று பார்ப்பது பலருக்கு பொழுதுபோக்காக இருந்தது.

முதல் சீசனில் ஆரவ் வெற்றி பெற்றாலும், ஓவியாவிற்கு மிகப்பெரிய ரசிகர் பட்டாளம் உருவானது. ஓவியாவிற்காக சமூக வலைத்தளங்களில் ரசிகர்கள் ஆர்மியெல்லாம் ஆரம்பித்தனர். அதுபோல முதல் சீசனில் கலந்து கொண்ட போட்டியாளர்கள் எதார்த்தமாக இருந்தார்கள் என்ற பாராட்டு எப்போதும் இருக்கிறது. பிக் பாஸ் நிகழ்ச்சியின் முதல் சீசன் மிகப்பெரிய வெற்றியைப் பெற்றதைத் தொடர்ந்து, ஒவ்வொரு ஆண்டும் இந்நிகழ்ச்சி நடத்தப்பட்டு வருகிறது. இரண்டாவது சீசனில் ரித்விகா, மூன்றாவது சீசனில் முகென் ராவ் ஆகியோர் வெற்றி பெற்றனர்.

அதனைத் தொடர்ந்து, நான்காவது சீசனில் ஆரியும், ஐந்தாவது சீசனில் ராஜுவும், ஆறாவது சீசனில் அசீமும், ஏழாவது சீசனில் அர்ச்சனாவும், எட்டாவது சீசனில் முத்துக்குமரனும் பிக் பாஸ் டைட்டிலை வென்றனர். தற்போது ஒன்பதாவது சீசன் குறித்த தகவல் வெளியாகியுள்ளது. விஜய் டிவியில் பிக் பாஸ் நிகழ்ச்சியின் முதல் மூன்று சீசன்கள் ஜூன் மாதத்தில் தொடங்கி செப்டம்பர் மாதம் வரை நடைபெற்றன. கொரோனா தொற்று பரவிய பிறகு, அக்டோபர் மாதத்திற்கு மாற்றப்பட்டது.

கடந்த ஐந்து சீசன்களாக அக்டோபர் மாதம் தொடங்கி பொங்கல் பண்டிகை வரை இந்நிகழ்ச்சி நடத்தப்பட்டு வருகிறது. இந்த நிலையில், பிக் பாஸ் சீசன் 9 முன்கூட்டியே செப்டம்பர் மாதத்தில் தொடங்க வாய்ப்புள்ளதாக தகவல்கள் தெரிவிக்கின்றன. பிக் பாஸ் நிகழ்ச்சியின் முதல் ஏழு சீசன்களை கமல்ஹாசன் தொகுத்து வழங்கினார். பின்னர் அவர் திரைப்படங்களில் பிஸியானதால், எட்டாவது சீசனில் இருந்து விலகினார். அவருக்கு பதிலாக விஜய் சேதுபதி தொகுத்து வழங்கினார்.

விஜய் சேதுபதி தொகுத்து வழங்கிய முதல் முறையே தன்னுடைய இயல்பான கேள்வி கேட்கும் திறமையால் ரசிகர்களை கவர்ந்தார். மக்கள் எதையெல்லாம் போட்டியாளர்களிடம் கேட்க வேண்டும் என்று நினைக்கிறார்களோ அதை முகத்தில் அடித்தது போல விஜய் சேதுபதி கேட்டு வந்தார். இதனால், பிக் பாஸ் சீசன் 9 நிகழ்ச்சியையும் விஜய் சேதுபதியே தொகுத்து வழங்குவார் என்று எதிர்பார்க்கப்படுகிறது.