Coolie: பாக்ஸ் ஆபிஸ் மன்னன் ரஜினி! கூலி படத்தின் 25 நாள் வசூல் நிலவரம்.. கமலின் சாதனையை முறியடித்ததா?

Updated: Monday, September 8, 2025, 19:10 [IST]

Subscribe to Oneindia Tamil

சென்னை: தமிழ் சினிமாவின் இரு பெரும் தூண்களான சூப்பர் ஸ்டார் ரஜினிகாந்த் மற்றும் உலக நாயகன் கமல்ஹாசன் ஆகிய இருவருக்கும் இடையில் நடக்கும் பாக்ஸ் ஆபிஸ் போட்டி நீண்டகாலமாகப் பேசப்பட்டு வருகிறது. சினிமாவில் ரஜினியின் அறிமுகமே கமல் நடித்த 'அபூர்வ ராகங்கள்' படத்தில் ஒரு சிறிய கதாபாத்திரத்தில்தான். ஆரம்பத்தில் ரஜினி, கமலின் நண்பராகவோ அல்லது வில்லனாகவோ பல படங்களில் நடித்தார். ஒரு கட்டத்தில் இருவரும் தனித்தனியாக நடிக்க முடிவு செய்தனர்.

இதில், ரஜினி பக்கா கமர்ஷியல் மசாலாப் படங்களில் நடித்து, வசூல் மன்னனாக மாறினார். ரஜினியின் வளர்ச்சி கமல்ஹாசனையே ஆச்சரியப்படுத்தியது. ரஜினி படங்களுக்குக் கிடைத்த அளவுக்கு வசூல் கமல் படங்களுக்குக் கிடைக்கவில்லை என்றே சொல்ல வேண்டும். ரஜினியின் சம்பளம் ₹70 கோடியாக இருந்தபோது கமலின் சம்பளம் ₹30 கோடியாகத்தான் இருந்தது. கமல்ஹாசனின் விக்ரம் படம்தான் ₹400 கோடி வசூலைத் தாண்டி, அவரது சம்பளத்தையும் உயர்த்தியது.

கூலி படத்தின் வசூல் வேட்டை

லோகேஷ் கனகராஜ் இயக்கத்தில் ரஜினிகாந்த் நடித்திருக்கும் கூலி திரைப்படம் ஆகஸ்ட் 14ஆம் தேதி வெளியாகி பெரும் எதிர்பார்ப்புகளுடன் கலவையான விமர்சனங்களை பெற்றது. "ரஜினியை லோகேஷ் சரியாகப் பயன்படுத்தவில்லை" என்றும், "படத்தில் லாஜிக் மிஸ்டேக்குகள் அதிகம்" என்றும் விமர்சனங்கள் எழுந்தன. ஆனால், இந்த நெகட்டிவ் விமர்சனங்கள் படத்தின் வசூலைப் பாதிக்கவில்லை.

வெளியான நான்கு நாட்களிலேயே படம் உலக அளவில் ₹400 கோடி வசூல் செய்ததாக சன் பிக்சர்ஸ் நிறுவனம் அதிகாரப்பூர்வமாக அறிவித்தது. தற்போது, படம் வெளியாகி 25 நாட்கள் ஆன நிலையில், அதன் மொத்த வசூல் குறித்து மூத்த பத்திரிகையாளர் செய்யாறு பாலு ஒரு தகவலை வெளியிட்டுள்ளார்.

"கூலி படம் வெளியானது முதல் இதற்கு நெகட்டிவ் விமர்சனங்கள் பரவினாலும், படத்தின் வசூலை யாராலும் தடுக்க முடியவில்லை. எனக்குக் கிடைத்த தகவலின்படி, படம் உலக அளவில் ₹675 கோடி வசூல் செய்துள்ளதாகத் தெரிகிறது. ஜெயிலர் திரைப்படம் 25வது நாள் முடிந்ததும், கலாநிதி மாறன் அனைவருக்கும் பரிசளித்தார். கூலி படத்திற்கும் விரைவில் அப்படி ஒரு நிகழ்ச்சியை எதிர்பார்க்கலாம்" என்று செய்யாறு பாலு கூறியுள்ளார்.

கமலை முந்திய ரஜினி

கூலி திரைப்படம் வெளிநாடுகளிலும் பெரிய அளவில் வசூலித்துள்ளது. குறிப்பாக, வட அமெரிக்காவில் இப்படம் $6.8 மில்லியன் (சுமார் ₹56 கோடி) வசூலித்துள்ளது. இது கமல்ஹாசன் அங்கு வெளியான அவருடைய அனைத்துப் படங்களின் மொத்த வசூலை விடவும் அதிகம் என்று கூறப்படுகிறது. இந்தப் பெரிய சாதனை, ரஜினிதான் வசூல் சக்கரவர்த்தி என்பதை மீண்டும் ஒருமுறை நிரூபித்துள்ளது.

விக்ரம் படம் பெற்ற பெரிய வெற்றியைத் தொடர்ந்து, கூலி படத்தின் பாக்ஸ் ஆபிஸ் சாதனை, ரஜினி-கமல் இடையேயான போட்டி ரசிகர்களால் ஏற்படுத்தப்பட்டதுதான் என்ற கமலே சொன்னாலும், தொழில்முறையில் இந்த இருவரும் தொடர்ந்து பாக்ஸ் ஆபிஸில் போட்டியாளர்களாகவே நீடிக்கிறார்கள் என்பதைக் காட்டுகிறது.