Suman: அஜித் எனக்கு அண்ணன் தான்! வரலாறு ஷூட்டிங்கில் நடந்த விஷயம்.. நெகிழ்ந்த நடிகர் சுமன்

சென்னை: தமிழ் சினிமாவில் காமெடி நடிகராக அறிமுகமாகி, இன்று வரை ரசிகர்களின் நினைவில் நிற்கும் முகமாக இருப்பவர் நடிகர் சுமன் ஷெட்டி. தெலுங்கு திரையுலகில் இருந்து வந்து, மொழி, அழகு என பல தடைகளை தாண்டி தமிழில் தனக்கென ஒரு இடத்தை பிடித்திருப்பது சாதாரண விஷயம் அல்ல.

சமீபத்தில் அளித்த ஒரு பேட்டியில், தனது சினிமா பயணம், சந்தித்த சவால்கள், மற்றும் தனக்கு கிடைத்த ஆதரவுகள் குறித்து சுமன் ஷெட்டி மனம் திறந்து பேசியுள்ளார். அந்த பேச்சுகள் தற்போது ரசிகர்களிடையே கவனம் பெற்று வருகின்றன.

தமிழில் சுமன் ஷெட்டியை மக்கள் அதிகமாக நினைவுகூருவது ரவி மோகன் நடித்த 'ஜெயம்' திரைப்படத்தின் மூலம் தான். அந்த படத்தில் "அலிபாபா" என்ற கேரக்டரில் அவர் நடித்த நடிப்பு அவருடைய ரியாக்சன் அவருடைய உடல் மொழி எல்லாமே ரசிகர்களை சிரிக்க வைத்ததோடு, அவரை அடையாளம் காணச் செய்தது. அதன்பிறகு '7ஜி ரெயின்போ காலனி' படத்தில் கிடைத்த கதாபாத்திரம், சுமன் ஷெட்டியின் நடிப்புக்கு இன்னொரு பரிமாணத்தை கொடுத்தது.

காமெடிக்கு அப்பால், கதையின் ஓட்டத்தில் கலந்துகொள்ளும் இயல்பான நடிப்பு, அந்த படத்தில் அவரை மறக்க முடியாத ஒரு துணைக் கதாபாத்திரமாக மாற்றியது. இதனைத் தொடர்ந்து குத்து, வரலாறு, படிக்காதவன், சண்டக்கோழி, கேடி, தோரணை உள்ளிட்ட பல படங்களில் நடித்துள்ளார்.

பெரும்பாலும் காமெடி நடிகராகவே திரையில் தோன்றினாலும், ஒவ்வொரு படத்திலும் அந்தக் கதைக்கு தேவையான வித்தியாசத்தை தனது நடிப்பால் சேர்த்தவர் சுமன் ஷெட்டி. குறிப்பாக, அவர் நடிக்கும் காமெடி காட்சிகள் செயற்கையாக இல்லாமல், கதையின் சூழ்நிலைக்குள் இயல்பாக கலந்து விடும் தன்மை கொண்டவை என்பதே அவரது பலம்.

தமிழில் நடிக்க ஆரம்பித்த காலகட்டத்தில் மொழி தான் மிகப்பெரிய சவாலாக இருந்ததாக சுமன் ஷெட்டி கூறுகிறார். இருந்தாலும், சக நடிகர்களின் ஆதரவு அந்த தடையை தாண்டுவதற்கு தனக்கு உதவியதாக அவர் பேசி இருக்கிறார்.

குறிப்பாக நடிகர் அஜித்குமார் குறித்து பேசும் போது, "அவர் எனக்கு அண்ணன் மாதிரி. வரலாறு படத்தின் போது அவர் என்னுடன் தெலுங்கிலேயே பேசுவார். அந்த அளவுக்கு எனக்கு கம்பர்ட்டை கொடுத்தார்" என்று நெகிழ்ச்சியாக பேசி இருக்கிறார். அந்த ஆதரவு தான், தமிழில் தொடர்ந்து நிலைத்து நிற்கும் நம்பிக்கையை அவருக்கு கொடுத்ததாகவும் சொல்கிறார்.

சமீபத்தில் தெலுங்கு பிக்பாஸ் நிகழ்ச்சியில் பங்கேற்று 97 நாட்கள் வரை விளையாடியதும், சுமன் ஷெட்டியை மீண்டும் மக்கள் மத்தியில் பேச வைத்தது. அந்த நிகழ்ச்சியில் அவரது வீடியோக்கள் தமிழிலும் வைரலாகி, பழைய ரசிகர்களையும், புதிய தலைமுறையையும் அவரிடம் மீண்டும் இணைத்தது.

பிக்பாஸ் நிகழ்ச்சிக்கு செல்ல தூண்டியது தனது மகன் தான் என்றும், குடும்ப ஆதரவு இல்லாமல் எதுவும் சாத்தியமில்லை என்றும் அவர் கூறியுள்ளார். தனது வாழ்க்கையில் மிகப்பெரிய இழப்பாக, 2019ஆம் ஆண்டு தந்தையை இழந்தது தான் இன்னும் மனதில் வலியாக இருப்பதாக சுமன் ஷெட்டி சொல்கிறார்.

"சினிமா தான் என் வாழ்க்கை. அதற்கு அப்பால் எனக்கு எதுவும் தெரியாது" என்று கூறும் அவர், இனி காமெடியைத் தாண்டி நெகட்டிவ் அல்லது வலுவான கதாபாத்திரங்களில் நடிக்க வேண்டும் என்ற ஆசையும் இருப்பதாக வெளிப்படுத்தியுள்ளார்.

மொத்தத்தில், சுமன் ஷெட்டி என்பது வெறும் காமெடி நடிகர் மட்டுமல்ல; மொழி எல்லைகளை தாண்டி, உழைப்பும், பொறுமையும் இருந்தால் எந்தத் துறையிலும் நிலைத்து நிற்க முடியும் என்பதை நிரூபித்த ஒரு பயணம். தமிழ் ரசிகர்கள் மனதில் அவர் பிடித்த அந்த "தனி இடம்" தான், அவரது மிகப்பெரிய வெற்றி என்று சொல்லலாம்.

English summary

Suman Shetty: Actor Suman Shetty, who entered Tamil cinema as a comedy performer from the Telugu film industry, has carved a lasting place in the hearts of Tamil audiences through hard work and adaptability. He is best remembered for his breakout role as “Alibaba” in Ravi Mohan’s Jayam, where his body language and comic timing made him instantly recognizable. His performance in 7G Rainbow Colony further showcased his ability to blend naturally into emotionally driven narratives beyond pure comedy. Over the years, he has appeared in several notable Tamil films such as Kuthu, Varalaru, Padikkathavan, Sandakozhi, Kedi, and Thoranai, often adding a distinct flavor to each story. In a recent interview, Suman Shetty spoke candidly about the language barrier he initially faced in Tamil cinema and how the support of fellow actors helped him overcome it. He fondly recalled actor Ajith Kumar, describing him as an elder brother who made him feel comfortable by speaking in Telugu during the filming of Varalaru. His participation in Telugu Bigg Boss, where he survived for 97 days, brought him renewed popularity across both Telugu and Tamil audiences, with many of his clips going viral. Encouraged by his family, especially his son, Suman Shetty credits their support as essential to his journey. Reflecting on personal loss, he shared that losing his father in 2019 remains his deepest pain. While comedy remains his forte, he now aspires to explore strong negative or character-driven roles, proving that his journey is not limited to laughter alone but defined by perseverance beyond linguistic and industry boundaries.