Super Singer : சூப்பர் சிங்கர் 11-ல் ஐந்தாவது பைனல் லிஸ்ட்.. அரங்கமே அதிர்ந்த தருணம்! உருப்படியான முடிவு

Updated: Tuesday, January 6, 2026, 13:31 [IST]

Subscribe to Oneindia Tamil

சென்னை : விஜய் டிவியில் பிரம்மாண்டமாக ஒளிபரப்பாகி வரும் சூப்பர் சிங்கர் சீசன் 11 நிகழ்ச்சி, தற்போது இறுதி கட்டத்தை நோக்கி நகர்ந்து வரும் நிலையில், ரசிகர்களுக்கு மகிழ்ச்சி தரும் ஒரு முக்கிய அறிவிப்பு வெளியாகியுள்ளது. பல வாரங்களாக கடுமையான போட்டிகளை எதிர்கொண்டு வந்த சரண் ராஜா, இந்த சீசனின் 5வது பைனலிஸ்டாக தேர்வாகி அரங்கத்தையே உற்சாகத்தில் ஆழ்த்தியுள்ளார்.

சூப்பர் சிங்கர் 11

சூப்பர் சிங்கர் என்பது வெறும் பாடல் போட்டி மட்டுமல்ல; பலரின் கனவுகளின் மேடையாக இது மாறியுள்ளது. தற்போது நடைபெற்று வரும் 11வது சீசனில், தமிழகம் மட்டுமல்லாமல் இலங்கை உள்ளிட்ட பல பகுதிகளில் இருந்து வந்த திறமையான பாடகர்கள் கலந்து கொண்டு, தங்களது குரல் வளத்தால் நடுவர்களையும் ரசிகர்களையும் கவர்ந்து வருகின்றனர். இந்த சீசன் ஆரம்பித்த நாளிலிருந்தே, ஒவ்வொரு வாரமும் எதிர்பாராத திருப்பங்களும், உணர்ச்சிகரமான தருணங்களும் இடம்பெற்று வருகின்றன.

மக்கள் மனதை வென்ற சரண் ராஜா

இந்த சீசனில் ஆரம்பத்திலிருந்தே தனித்துவமான குரல், பாடல் தேர்வு மற்றும் மேடை நடத்தை மூலம் கவனம் பெற்றவர் சரண் ராஜா. இளையராஜாவை போல குரலில் பாடும் இவர் மெலோடி, கிளாசிக்கல், குத்துப் பாடல் என பல ஜானர்களில் பாடி, தனது பல்திறனை நிரூபித்து வந்தார். குறிப்பாக சில முக்கிய சுற்றுகளில் அவர் பாடிய பாடல்கள் சமூக வலைதளங்களில் வைரலாகி, ரசிகர்களிடமிருந்து பெரும் ஆதரவை பெற்றன.

உருக்கிய தருணம்

சமீபத்தில் நிகழ்ச்சியில் நடைபெற்ற போட்டியாளர்கள் பரிசுகளை பரிமாறிக்கொள்ளும் சிறப்பு நிகழ்வில், சரண் ராஜா செய்த ஒரு செயல் அனைவரையும் நெகிழ வைத்தது. இலங்கை சிறுமியான டிசாதானவிற்கு, அவர் வெள்ளி கொலுசை பரிசாக வழங்கினார். இந்த தருணம், போட்டியை தாண்டி மனிதநேயமும் நட்பும் எவ்வளவு முக்கியம் என்பதைக் காட்டிய ஒரு அழகான சம்பவமாக ரசிகர்கள் மத்தியில் பேசப்பட்டது.

4வது பைனலிஸ்ட்

கடந்த எபிசோட்டில் 4வது பைனலிஸ்ட் அறிவிக்கப்பட்டதை தொடர்ந்து, அன்றைய நிகழ்ச்சியில் அதுவே கடைசி தேர்வு என பலர் நினைத்திருந்தனர். ஆனால், நடுவர்கள் மேடையில் நின்று "இன்னும் ஒரு பைனலிஸ்ட் தேர்வு செய்யப்படுவார்" என அறிவித்த போது, அரங்கமே எதிர்பார்ப்பில் அமைதியாக மாறியது. அந்த நிமிடங்கள் போட்டியாளர்களுக்கும் ரசிகர்களுக்கும் மிகுந்த பதற்றத்தை ஏற்படுத்தின.

சரண் ராஜா தேர்வு

5வது பைனலிஸ்டாக சரண் ராஜாவின் பெயர் அறிவிக்கப்பட்ட தருணம், உணர்ச்சிகரமானதாக மாறியது. மகிழ்ச்சியில் கண்கலங்கிய சரண் ராஜா, மேடையில் நின்று நடுவர்களுக்கும் ரசிகர்களுக்கும் நன்றி தெரிவித்தார். அரங்கில் இருந்த பார்வையாளர்கள் எழுந்து நின்று கைத்தட்ட, இந்த தருணம் சூப்பர் சிங்கர் 11-ன் நினைவுகூரத்தக்க தருணங்களில் ஒன்றாக அமைந்தது.

இறுதிக்கட்டத்தை நோக்கி சூப்பர் சிங்கர் 11

ஐந்து பைனலிஸ்ட்கள் தேர்வு செய்யப்பட்டுள்ள நிலையில், இனி நடைபெறவுள்ள போட்டிகள் இன்னும் கடுமையாக இருக்கும் என எதிர்பார்க்கப்படுகிறது. ஒவ்வொரு பைனலிஸ்டும் வெற்றிக்கான கனவுடன் களமிறங்க, ரசிகர்கள் யார் கோப்பையை தட்டிச் செல்லப் போகிறார் என்பதை ஆவலுடன் எதிர்பார்த்து வருகின்றனர். அந்த பட்டியலில் சரண் ராஜாவின் பெயரும், தற்போது வலுவான போட்டியாளராக பேசப்பட்டு வருகிறது.

ரசிகர்களின் எதிர்பார்ப்பு உச்சத்தில்

சரண் ராஜா 5வது பைனலிஸ்டாக தேர்வானதையடுத்து, சமூக வலைதளங்களில் அவருக்கு ஆதரவான பதிவுகள் அதிகரித்து வருகின்றன. "மக்கள் மனதை வென்ற பாடகர்", "இந்த சீசனின் சைலண்ட் கில்லர்" போன்ற பெயர்களுடன் ரசிகர்கள் அவரை கொண்டாடி வருகின்றனர். இனி வரும் எபிசோட்களில் அவர் எப்படி தன்னை நிரூபிக்கப் போகிறார் என்பதே அனைவரின் கவனமாக உள்ளது.