மீண்டும் தியேட்டருக்கு வரும் 96 படம்.. 8 வருஷம் ஆனாலும் ராம்- ஜானு மீது காதல் குறையல!
சென்னை: சில படங்களை எத்தனை வருடங்கள் கழித்து பார்த்தாலும் அந்தப் படத்தோடு சேர்ந்து நம்முடைய பழைய நினைவுகளும் திரும்பி வந்துவிடும். அப்படிப்பட்ட படங்களில் விஜய் சேதுபதி, திரிஷா நடித்த 96 படத்துக்கு தனி இடம் இருக்கிறது. படம் பார்த்தவர்கள் மட்டுமல்லாமல், அதன் பாடல்களைக் கேட்டாலே ராம், ஜானு நினைவுக்கு வருகிற அளவுக்கு இந்த படம் ரசிகர்களுடன் ஒன்றிப்போனது.
2018-ம் ஆண்டு அக்டோபர் 4-ம் தேதி வெளியான 96 படத்துக்கு இப்போது 8 ஆண்டுகள் நிறைவடைந்திருக்கிறது. இதை முன்னிட்டு படம் மீண்டும் திரையரங்குகளில் வெளியாக இருக்கிறது. வரும் அக்டோபர் 9-ம் தேதி 96 ரீ-ரிலீஸ் ஆகும் என்று அறிவிக்கப்பட்டுள்ளது. சி. பிரேம்குமார் இயக்கிய இந்தப் படத்தில் விஜய் சேதுபதி ராமச்சந்திரனாகவும், திரிஷா ஜானகிதேவியாகவும் நடித்திருந்தார்கள். பள்ளி காலத்தில் காதலித்த இருவரும் எதிர்பாராத காரணத்தால் பிரிந்து செல்கிறார்கள்.
மீண்டும் 96 படம்
பல வருடங்களுக்குப் பிறகு பள்ளி நண்பர்கள் சந்திப்பில் மீண்டும் சந்திக்கிறார்கள். அதன் பிறகு ஒரே இரவில் அவர்கள் பேசிக்கொள்ளும் அந்தப் பழைய நினைவுகள்தான் மொத்த படத்தையும் நகர்த்தும். கதை என்று பார்த்தால் பெரிய ஆக்ஷன், பரபரப்பு என்று எதுவுமே இருக்காது. ஆனால் ராம், ஜானு இருவருக்கும் இடையே சொல்லப்படாமல் போன காதல், பல வருஷத்துக்கு பிறகு ஒருவரை ஒருவர் பார்த்ததும் வரும் தயக்கம், பழைய நினைவுகளைப் பேசும்போது ஏற்படும் உணர்வு என்று படம் முழுக்கவே ஒரு விதமான ஏக்கத்தை கொடுத்திருக்கும்.
மீண்டும் பள்ளிக்காலம்
அதனால்தான் 96 படத்தை வெறுமனே ஒரு காதல் படமாக மட்டும் ரசிகர்கள் பார்க்கவில்லை. பலருக்கும் அது அவர்களுடைய சொந்த பள்ளி காலத்தையும், பழைய நண்பர்களையும், சொல்ல முடியாமல் போன காதலையும் நினைவுபடுத்திய படம். அதிலும் கோவிந்த் வசந்தாவின் இசை 96 படத்துக்கு இன்னொரு பெரிய பலம். காதலே காதலே, தி லைஃப் ஆஃப் ராம் போன்ற பாடல்கள் படம் வெளியாகி 8 ஆண்டுகள் ஆன பிறகும் ரசிகர்களிடம் இன்னும் பிரபலமாக இருக்கின்றன.
உண்மையில் 96 படத்தை ஏற்கனவே பார்த்தவர்களுக்கு இந்த ரீ-ரிலீஸ் என்பது புதிதாக ஒரு கதையை பார்க்க போவது கிடையாது. ராம், ஜானுவை மீண்டும் பெரிய திரையில் பார்க்கப் போகிறோம் என்பதுதான் விஷயம். வீட்டில் தொலைக்காட்சியிலோ, இணையத்திலோ பார்த்த காட்சிகளை இந்த முறை திரையரங்கில் ரசிகர்களுடன் சேர்ந்து பார்க்கும்போது அந்த அனுபவமே வேறாக இருக்கும்.
96 ரீ ரிலீஸ்
குறிப்பாக 96 படத்தின் பாடல்கள் தியேட்டரில் ஒலிக்கும்போது ரசிகர்களின் ரியாக்ஷன் எப்படி இருக்கும் என்பதுதான் இப்போது ஆர்வத்தை ஏற்படுத்துகிறது. ஒரு காலத்தில் காதல் தோல்வி, பிரிவு, பழைய நினைவுகள் என்று படம் பார்த்து அமைதியாக வெளியே வந்தவர்கள், இப்போது 8 வருடங்கள் கழித்து அதே படத்தை வேறு ஒரு வயதில், வேறு ஒரு வாழ்க்கை அனுபவத்துடன் பார்க்கப் போகிறார்கள். அதனால்தான் 96-க்கு இந்த ரீ-ரிலீஸ் கொஞ்சம் ஸ்பெஷல்.
2018-ல் பார்த்த ராம்-ஜானுவை 2026-ல் மீண்டும் பார்க்கும்போது நம்முடைய வாழ்க்கையிலேயே எவ்வளவு மாற்றம் வந்திருக்கும்? அதையும் சேர்த்துதான் இந்தப் படம் ரசிகர்களுக்கு இன்னொரு அனுபவத்தை கொடுக்கப் போகிறது. வரும் அக்டோபர் 9-ம் தேதி 96 மீண்டும் திரையரங்குக்கு வருகிறது. 8 வருடங்கள் கழித்தும் ராம்-ஜானுவின் காதலுக்கு ரசிகர்கள் இன்னும் அதே இடத்தை கொடுக்கிறார்களா? என்பதற்கு தியேட்டர் ரிசல்ட்தான் பதில் சொல்லப் போகிறது.
Click it and Unblock the Notifications
Sign in with Google
