சின்ன மருமகள் சீரியல் ஸ்வேதாவுக்கு ரகசிய திருமணமா? - மோசடி நபர் மீது சட்ட நடவடிக்கை, பரபரப்பு பதிவு!

Updated: Monday, August 25, 2025, 17:07 [IST]

Subscribe to Oneindia Tamil

சென்னை: விஜய் தொலைக்காட்சியில் ஒளிபரப்பாகும் பிரபலமான சின்ன மருமகள் சீரியலில் நடித்து வரும் நடிகை ஸ்வேதா, தனது சமூக வலைத்தள பக்கத்தில் அதிர்ச்சிகரமான தகவலை வெளியிட்டுள்ளார். அவர் வெளியிட்டுள்ள அந்தப் பதிவில், தன்னைத் தனது கணவர் என்று பொதுவெளியில் கூறிவரும் ஒரு நபர் ஒரு மோசடி செய்பவர் என்றும், அவர் மீது ஏற்கனவே பல வழக்குகள் பதிவு செய்யப்பட்டுள்ளதாகவும் தெரிவித்துள்ளார். மேலும், அந்த நபரை காவல்துறையினர் தீவிரமாகத் தேடி வருவதாகவும் அவர் கூறியுள்ளார்.

ரகசிய திருமண சர்ச்சை

நடிகை ஸ்வேதா, சமீப நாட்களாக சமூக வலைத்தளங்களில் பரபரப்பாகப் பேசப்பட்டு வருகிறார். தான் காதலித்து வருவதாகவும், விரைவில் திருமணம் செய்துகொள்ளப் போவதாகவும் அவர் முன்பே கூறியிருந்தார். ஆனால், தற்போது அவரது காதல் வாழ்க்கை எதிர்பாராத திருப்பத்தை சந்தித்துள்ளது. நடிகை ஸ்வேதா, தான் காதலிப்பதாகக் கூறி, அந்த நபரின் முகத்தைக் காட்டாமல் சில புகைப்படங்களைப் பகிர்ந்து வந்தார். இந்நிலையில், அந்த நபர் ஒரு சில யூடியூப் சேனல்களுக்கு பேட்டி அளித்து, தனக்கும் ஸ்வேதாவுக்கும் 'ரகசியமாகப் பதிவுத் திருமணம்' நடந்துவிட்டதாகக் கூறி, அவர்களின் காதல் கதை பற்றியும் சில தகவல்களைப் பகிர்ந்து வருகிறார்.

ஸ்வேதாவின் மறுப்பு

இந்தத் தகவல் சமூக வலைத்தளங்களில் பரவி பெரும் பரபரப்பை ஏற்படுத்தியது. இதற்கு மறுப்பு தெரிவித்து நடிகை ஸ்வேதா, தனது சமூக வலைத்தளப் பக்கத்தில் ஒரு பதிவை வெளியிட்டார். அதில், அந்த நபர் கூறியது அனைத்தும் உண்மைக்கு புறம்பானது என்று அவர் குறிப்பிட்டிருக்கிறார். இந்த விவகாரம், சின்னத்திரை ரசிகர்கள் மத்தியில் பெரிய விவாதத்தை ஏற்படுத்தி உள்ளது. ஸ்வேதாவின் பதிவு, இந்த சர்ச்சை குறித்த பல கேள்விகளை எழுப்பியுள்ளது.

ஸ்வேதா தனது பதிவில் மேலும் கூறியிருப்பதாவது,

நான் ஒரு முக்கியமான விஷயத்தைத் தெளிவுபடுத்த விரும்புகிறேன். ஒரு குறிப்பிட்ட நபர் தன்னை என் கணவர் என்று பொதுவெளியில் கூறி வருகிறார். அவர் ஒரு மோசடி செய்பவர் என்பதை நான் தெளிவுபடுத்த விரும்புகிறேன். அவர் மீது ஏற்கனவே பல சட்ட வழக்குகள் பதிவு செய்யப்பட்டுள்ளன. உண்மையில், காவல்துறையினர் அவரை தீவிரமாகத் தேடி வருகிறார்கள்.

அவர் என் பெயரைப் பயன்படுத்தி, ஒரு நேர்காணலில் பொய்யான கதையை உருவாக்கி, நாங்கள் காதலித்து திருமணம் செய்து கொண்டதாகக் கூறியுள்ளார். துரதிர்ஷ்டவசமாக, நான் அவரை அந்த நேரத்தில் ஆழமாக நம்பினேன். அவருடைய உண்மையான இயல்பு மற்றும் குற்றப் பின்னணியை நான் பின்னர் தான் தெரிந்து கொண்டேன். இப்போது, அவர் என் எதிர்காலத்தை நாசப்படுத்தாமல் இருக்க, அவர் மீது தேவையான சட்ட நடவடிக்கைகளை நான் எடுத்து வருகிறேன்."

சட்ட நடவடிக்கை

இதனைத் தொடர்ந்து அடுத்த பதிவில் ஸ்வேதா மேலும் கூறுகையில், "மேலும், யார் ஒருவர் என் பெயரையோ அல்லது புகைப்படத்தையோ தவறாகப் பயன்படுத்த அவருக்கு ஆதரவளித்தாலோ அல்லது உதவினாலோ, அவர்கள் சட்டரீதியான விளைவுகளைச் சந்திக்க நேரிடும். என்னைப் பற்றி அவதூறாகப் பேசுபவர்கள் அல்லது உண்மைகளைத் திரித்துக் கூறுபவர்கள் மீது நான் கடுமையான நடவடிக்கை எடுப்பேன்.

நான் மனதளவிலும், உடலளவிலும் நிறைய கஷ்டங்களை அனுபவித்திருக்கிறேன். எல்லாவற்றையும் நான் தனியாகவே கையாண்டு வந்தாலும், இந்த கடினமான நேரத்தில் என் குடும்பத்தினர் எனக்கு அளித்த ஆதரவுக்கு நான் நன்றியுள்ளவளாக இருக்கிறேன்.

எனவே, தயவுசெய்து அனைவரும் தேவையற்ற நாடகங்களை ஊக்குவிக்கவோ அல்லது வதந்திகளைப் பரப்பவோ வேண்டாம் என்று கேட்டுக்கொள்கிறேன். எனது நிலையைப் புரிந்துகொள்ளுங்கள். உங்கள் ஆதரவுக்கு நன்றி."

நடிகை ஸ்வேதாவின் இந்தத் தகவல் அவரது ரசிகர்கள் மற்றும் சின்னத்திரை வட்டாரத்தில் பெரும் அதிர்ச்சியை ஏற்படுத்தியுள்ளது. அவர் விரைவில் இந்த பிரச்சனையிலிருந்து மீண்டு வர ரசிகர்கள் தங்களது ஆதரவைத் தெரிவித்து வருகின்றனர்.