கேரளாவில் 2-ம் கட்ட உள்ளாட்சித் தேர்தல்- முதல் 2 மணிநேரங்களில் 9% வாக்கு பதிவு

திருவனந்தபுரம்: கேரளா உள்ளாட்சி அமைப்புகளுக்கான தேர்தலில் 2-ம் கட்ட வாக்குப் பதிவு காலை 7 மணி முதல் நடைபெற்று வருகிறது. முதல் 2 மணிநேரங்களில் 9% வாக்குகள் பதிவாகி உள்ளன.

கேரளாவில் கொரோனா பரவல் அதிகமாக உள்ள நிலையிலும் உள்ளாட்சி அமைப்புகளுக்கான தேர்தல் 3 கட்டங்களாக நடத்தபட்டு வருகிறது. முதல் கட்ட வாக்குப் பதிவு நேற்று முன்தினம் நடைபெற்றது. அதில் 61% வாக்குகள் பதிவாகின.

இதனைத் தொடர்ந்து கோட்டயம், எர்ணாகுளம், திரிசூர், பாலக்காடு மற்றும் வயநாடு ஆகிய 5 மாவட்டங்களின் உள்ளாட்சி அமைப்புகளில் 2-ம் கட்ட தேர்தல் நடைபெற்று வருகிறது. இந்த தேர்தலில் ஆளும் இடது முன்னணி, காங்கிரஸின் ஐக்கிய ஜனநாயக முன்னணி மற்றும் பாஜக தலைமையிலான தேசிய ஜனநாயக முன்னணி என மும்முனை போட்டி நிலவுகிறது.

5 மாவட்டங்களில் மொத்தம் 8,57,208 பேர் வாக்காளர்கள். மொத்தம் 451 உள்ளாட்சி அமைப்புகளின் 8116 வார்டுகளுக்கு தேர்தல் நடைபெறுகிறது. இதில் 28,142 வேட்பாளர்கள் களத்தில் உள்ளனர்.

இன்று காலை முதலே வாக்காளர்கள் நீண்ட வரிசைகளில் காத்திருந்து வாக்களித்து வருகின்றனர். எந்தவித அசம்பாவிதங்களும் நடைபெறாத வகையில் பலத்த பாதுகாப்பு ஏற்பாடுகள் செய்யப்பட்டுள்ளன.

English summary

Second Phase Voting underway of local body elections in Kerala.