ஓணம் பண்டிகை.. “இது தப்பு” - ஹிஜாப் அணிந்த பெண்கள் நடனமாடுவதா? - முஸ்லிம் மதகுரு எதிர்ப்பு
திருவனந்தபுரம்: ஹிஜாப் அணிந்த இஸ்லாமிய பெண்கள் கேரளாவில் ஓணம் பண்டிகையை முன்னிட்டு நடனமாடிய வீடியோ சமூக வலைதளங்களில் வைரலான நிலையில் இதற்கு முஸ்லிம் மதகுரு எதிர்ப்பு தெரிவித்து இருக்கிறார்.
கேரளா மாநிலத்தின் புகழ்பெற்ற பண்டிகையாக ஓணம் இருந்து வருகிறது. ஒணம் பண்டிகையன்று மலையாள மக்களின் கொண்டாட்ட முறையே அனைவரையும் வியக்கவும் ரசிக்கவும் வைக்கும்.
அந்த வகையில் கடந்த ஆகஸ்ட் 30 ஆம் தேதி தொடங்கிய ஓணம் பண்டிகை செப்டம்பர் 8 தேதி வரை கேரளாவில் உற்சாகமாக கொண்டாடப்பட்டு வருகிறது.
10 நாள் கொண்டாட்டம்
10 நாட்கள் கொண்டாடப்படும் இந்த பண்டிகை நாளில், புத்தாடை அணிந்து, விதவிதமான உணவு பொருட்களை சமைத்து உற்றார் உறவினர்களுக்கு கொடுத்து மகிழ்கின்றனர் கேரள மக்கள். ஓணம் பண்டிகையன்று அத்தப்பூ கோலம் போடும் பெண்கள் கேரளாவின் பாரம்பரிய சேலையும் அணிந்து உற்சாகமாக வலம் வருவார்கள்.
ஹிஜாப் மாணவிகள்
கேரளா மட்டும் அல்லாது வெளி மாநிலங்களில் வசிக்கும் மலையாள மக்களும் ஓணம் பண்டிகையை சிறப்பாக கொண்டாடுகின்றனர். இந்த நிலையில் கேரளாவின் மலப்புரம் மாவட்டத்தில் உள்ள அரசு மேல்நிலை பள்ளியில் ஹிஜாப் அணிந்த மாணவிகள், ஓணம் பண்டிகையை முன்னிட்டு உற்சாகமாக நடனம் ஆடிய வீடியோ சமூக வலைதளங்களில் அதிகளவில் பகிரப்பட்டது.
சசி தரூர் பகிர்ந்த வீடியோ
மலப்புரம் மாவட்டம் வண்டூரில் உள்ள அரசு மகளிர் மேல்நிலைப்பள்ளியில் நடைபெற்ற ஓணம் பண்டிகை கொண்டாட்டத்தின் போது பள்ளியில் பயிலும் மாணவிகள் இசையை ஒலிக்கவிட்டு நடனம் ஆடினார்கள். இதில் ஹிஜாப் அணிந்த மாணவிகளும் உற்சாகமாக நடனம் ஆடும் வீடியோவை காங்கிரஸ் எம்.பி சசி தரூர் உள்ளிட்ட பலரும் பகிர்ந்திருந்தனர்.
இஸ்லாமிய மதகுரு எதிர்ப்பு
மத நல்லிணக்கத்திற்கு உதாரணமாக ஓணம் பண்டிகையை கொண்டாடிய இஸ்லாமிய மாணவிகளுக்கு பலரும் பாராட்டு தெரிவித்து வரும் நிலையில், இஸ்லாமிய மதகுரு கல்பே சிப்தைன் நூரி எதிர்ப்பு தெரிவித்துள்ளார். "மாணவிகள் தங்கள் சுய விபரத்தின்படி நடனமாடி இருந்தால் அதில் பிரச்சனை இல்லை. இந்த நாட்டில் ஒவ்வொருவருக்கும் முடிவெடுக்கும் உரிமை இருக்கிறது.
நடனமாட தடை
பள்ளி நிர்வாகம் நடனமாட கட்டாயப்படுத்தி இருந்தால் அது சட்டவிரோதமானது. இஸ்லாமிய ஷரீஅத் சட்டத்தை எடுத்துக்கொண்டால் அதற்கு அதிக மரியாதை இருக்கிறது. மற்ற ஆண்களின் முன்பாக நடனமாடுவது ஷரீஅத் சட்டத்தின் கீழ் தடை செய்யப்பட்டு இருக்கிறது." என்று அவர் கூறி இருக்கிறார்.
Click it and Unblock the Notifications
Sign in with Google