Tour: காரைக்கால் திருநள்ளாறு சனீஸ்வர பகவான் திருத்தலம்- குறைவான செலவில் எளிதாக செல்லலாமே- எப்படி?

சென்னை: திண்டுக்கல் அல்லது திருச்சியில் இருந்து புதுச்சேரி மாநிலம் காரைக்கால் அருகே உள்ள திருநள்ளாறு சனீஸ்வர பகவான் திருத்தலத்துக்கு செல்வது என்பது மேலோட்டமாக பார்த்தால் அவ்வளவு தொலைவா? என தோன்றும்.. ஆனால் மிக குறைவான கட்டணத்திலேயே திருநள்ளாறு சனீஸ்வர பகவானை தரிசனம் செய்து திரும்புவதற்கான சில டிப்ஸ்கள் இங்கே தரப்படுகின்றன.

நீங்கள் திண்டுக்கல் அல்லது திருச்சியில் இருந்து புறப்படுகிறவர்கள் எனில் இந்த பயணத் திட்டத்தை பரிசீலனை செய்து பார்க்கலாம்.

திண்டுக்கல்: திண்டுக்கல் ரயில் நிலையத்தில் இருந்து காலை 5 மணிக்கு 16868 - Dindigul Villupuram Intercity Express (Un Reserved) ரயில் புறப்படுகிறது. சற்று முன்னதாகவே திண்டுக்கல் ரயில் நிலையம் வந்தாலே இருக்கைகள் கிடைக்கும்
திண்டுக்கல்லில் இருந்து திருச்சி செல்ல ரூ145 கட்டணம். திருச்சி ரயில் நிலையத்தை காலை 6.35-க்கு சென்றடையும்.

திருச்சியில் இருந்து திருநள்ளாறு: வேறு எங்குமே செல்ல வேண்டியது இல்லை. திருச்சி ரயில் நிலையத்தில் இருந்து காலை 6.50 மணிக்கு 06490/Tiruchchirappalli - Karaikal Passenger (UnReserved) புறப்படுகிறது. நடைமேடைகளை மாறினாலே போதும். ரயில் நமக்காக காத்திருக்கும். பயண கட்டணம் ரூ100. காலை 10.45 மணிக்கு காரைக்கால் ரயில் நிலையத்தை சென்றடையலாம்.

காரைக்கால் டூ திருநள்ளாறு: காரைக்காலில் இருந்து 7 கிமீ தொலைவில்தான் திருநள்ளாறு சனீஸ்வர பகவான் திருத்தலம் அமைந்துள்ளது. காரைக்காலில் இருந்து ஏராளமான பேருந்துகள் திருநள்ளாறு கோவிலுக்கே செல்கின்றன. திருநள்ளாறில் முதலில் நளதீர்த்தத்தில் நல்லெண்ணெய், சீயக்காய் தேய்த்து குளித்து எழுந்து பின்னர் சனீஸ்வர பகவானை வழிபட வேண்டும்.

நீங்கள் திருநள்ளாறு திருத்தலத்துக்கு சென்று வழிபாடு செய்துவிட்டு சில மணிநேரங்களிலேயே வந்த வேகத்திலேயே புறப்பட்டும் விடலாம்.

காரைக்கால்- திருச்சி: காரைக்கால் ரயில் நிலையத்தில் இருந்து 06739/Karaikal - Tiruchchirappalli DEMU பிற்பகல் 2.55 மணிக்கு புறப்பட்டு மாலை 4.30 மணிக்கு திருச்சியை வந்தடையும். (இந்த ரயில் சேவை சில நேரங்களில் மாற்றி மாற்றி அமைக்கப்படவும் வாய்ப்பிருக்கிறது. அதனால் நீங்கள் புறப்படும் நாளில் ரயில் சேவை குறித்த கூடுதல் விவரங்களை அறிந்து கொள்வதும் நன்று) இந்த DEMU-ல் கட்டணம் ரூ65.

இந்த ரயிலை விட்டால் கூட கவலையில்லை. மாலை 4.30 மணிக்கு 16187 - Ernakulam Jn. Express ரயில் இருக்கிறது. இந்த ரயில் இரவு 7.50 மணிக்கு திருச்சி ரயில் நிலையம் வந்தடையும். இந்த ரயிலில் பயணக் கட்டணம் ரூ145.

திண்டுக்கல் செல்ல வேண்டிய பயணிகளுக்கு மீண்டும் காத்திருக்கிறது அதே 16867 - Dindigul Intercity Express (Un Reserved) ரயில் திருச்சி ரயில் நிலையத்தில் காத்திருக்கும். இந்த ரயில் இரவு 8.15 மணிக்கு திருச்சியில் இருந்து புறப்பட்டு திண்டுக்கல் ரயில் நிலையத்தை இரவு 10.15 மணிக்கு வந்தடையும். இந்த ரயில் பயண கட்டணம் ரூ145.

ஆலய தரிசனத்துக்காக அரசு நமக்கு ஏற்பாடு செய்துள்ள இந்திய ரயில் சேவையை அழகாக பயன்படுத்திக் கொண்டு நலமுடன் சென்று திரும்புவோமே!

குறிப்பு: திருச்சி- காரைக்கால் ரயில் வழித்தடமானது காவிரி டெல்டா மாவட்டங்களின் வழியாகவே பயணிக்கிறது. காவிரி டெல்டாவின் பல ரயில் நிலையங்களில் நின்றும் செல்கின்றன. இதனால் காவிரி டெல்டா மாவட்ட மக்களுக்கும் இந்த பயண திட்டம் பயனுள்ளதாகவே இருக்கும்.)

English summary

Here are some tips for visiting Thirunallar Saneeswarar Temple and returning with minimal expenses.