அலர்ட் மக்களே.. 3 மணி நேரத்திற்கு.. சென்னை, திருவள்ளூர் உள்பட 27 மாவட்டங்களில் கொட்டப்போகும் மழை

சென்னை: சென்னையில் பல்வேறு இடங்களில் லேசானது முதல் கனமழை பெய்தது. இந்த நிலையில், அடுத்த 3 மணி நேரத்திற்கு சென்னை, திருவள்ளூர், கடலூர், திருச்சி உள்பட 27 மாவட்டங்களில் மழைக்கு வாய்ப்பு இருப்பதாக சென்னை வானிலை ஆய்வு மையம் தெரிவித்துள்ளது.

மேற்கு திசை காற்றின் வேக மாறுபாடு காரணமாக, இன்று தமிழ்நாடு, புதுச்சேரி மற்றும் காரைக்கால் பகுதிகளில் அநேக இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும் என்று, கடலூர், விழுப்புரம், கள்ளக்குறிச்சி, பெரம்பலூர், அரியலூர், சேலம், நாமக்கல், தர்மபுரி, திருவண்ணாமலை, திருப்பத்தூர் மாவட்டங்கள் மற்றும் புதுச்சேரி பகுதிகளில் ஓரிரு இடங்களில் கனமழை பெய்ய வாய்ப்பு இருப்பதாக சென்னை வானிலை ஆய்வு மையம் தெரிவித்திருந்தது.

அதன்படி, சென்னையில் பல இடங்களில் மழை கொட்டியது. வானிலை ஆய்வு மையம் கணித்தது போலவே சென்னையின் பல்வேறு பகுதிகளில் இடி மின்னலுடன் கூடிய கனமழை கொட்டியது. குறிப்பாக சென்னை தாம்பரம், பெருங்களத்தூர், மாங்காடு மற்றும் தெற்கு புறநகர் பகுதிகளில் கனமழை கொட்டி தீர்த்தது. இதே போல நகரின் பல பகுதிகளிலும் பலத்த மழை பெய்தது.

கிண்டி, ஆலந்தூர், முகப்பேர், கோயம்பேடு, அண்ணாநகர், அரும்பாக்கம், அமைந்தகரை பகுதிகளிலும் கன மழை பெய்தது. திடீரென கொட்டித்தீர்த்த கனமழையால் சாலையின் தாழ்வான பகுதிகளில் தண்ணீர் தேங்கியது. கடந்த சில நாட்களாக அக்னி நட்சத்திரம் போல வெயில் சுட்டெரித்த நிலையில் சட்டென்று கொட்டித்தீர்த்த கனமழையால் வானிலை ஜில்லென்று மாறி குளிர் காற்று வீசியது. இந்த நிலையில், அடுத்த 3 மணி நேரத்திற்கு சென்னை உள்பட 27 மாவட்டங்களில் மழை பெய்ய வாய்ப்பு உள்ளதாக சென்னை வானிலை ஆய்வு மையம் தெரிவித்துள்ளது.

இது குறித்து சென்னை வானிலை ஆய்வு மையம் வெளியிட்டுள்ள செய்திக்குறிப்பில் கூறப்பட்டிருப்பதாவது:- தமிழகத்தின் 27 மாவட்டங்களில் அடுத்த 3 மணி நேரத்திற்கு மழை பெய்ய வாய்ப்புள்ளது. சென்னை, திருவள்ளூர், செங்கல்பட்டு, காஞ்சிபுரம், விழுப்புரம், கள்ளக்குறிச்சி, ராணிப்பேட்டை, கடலூர், திருவண்ணாமலை, வேலூர், கிருஷ்ணகிரி, புதுக்கோட்டை, திருச்சி, அரியலூர், ஈரோடு, கோவை, நீலகிரி, திருப்பூர், தேனி, திண்டுக்கல், பெரம்பலூர், கரூர், மதுரை, சேலம், நாமக்கல், தருமபுரி உள்ளிட்ட மாவட்டங்களில் மழைக்கு வாய்ப்பு உள்ளது. இவ்வாறு அதில் கூறப்பட்டுள்ளது.

English summary

Light to heavy rains lashed various places in Chennai. In this situation, there is a chance of rain in 27 districts including Chennai, Tiruvallur, Cuddalore and Trichy for the next 3 hours, according to the Chennai Meteorological Department.