வங்கக்கடலில் உருவான ராட்சசன்.. எதிர்பார்க்காத வேகம்.. தாழ்வு மையத்தின் ஆட்டம் ஆரம்பம்! எங்கே நகரும்?
சென்னை: தென்மேற்கு வங்கக் கடல் பகுதியில் குறைந்த காற்றழுத்த தாழ்வுப் பகுதியாக உருவானதாக இந்திய வானிலை ஆய்வு மையம் அறிவிப்பு வெளியிட்டு உள்ளது. அடுத்த 36 மணி நேரத்தில் மேற்கு வடமேற்கு திசையில் தமிழ்நாட்டின் கடலோர பகுதிகளை நோக்கி நகர்ந்து, காற்றழுத்த தாழ்வு மண்டலமாக வலுவடையக் கூடும் என வானிலை ஆய்வு மையம் கணிப்பு வெளியிட்டு உள்ளது.
வங்கக் கடல் மற்றும் அரபிக்கடலில் உருவாகும் இரட்டை வானிலை அமைப்புகளால், வடகிழக்கு பருவமழை எதிர்பார்த்ததை விட தீவிரமடைந்துள்ளதாக இந்திய வானிலை ஆய்வு மையம் (IMD) தெரிவித்துள்ளது. இதனால், தமிழகத்தின் பல்வேறு மாவட்டங்களுக்கு கடும் மழைக்கான எச்சரிக்கை விடுக்கப்பட்டுள்ளது.
கடல் சீற்றங்கள் காணப்படும். அடுத்த சில நாட்களுக்கு மாநிலம் முழுவதும் பரவலான, கனமழை முதல் மிகக் கனமழை வரை பெய்யக்கூடும் என்பதால் இந்த எச்சரிக்கை முக்கியத்துவம் பெறுகிறது. கடலோர மாவட்டங்கள், குறிப்பாக சென்னை, அடுத்த இரண்டு நாட்களுக்கு கனமழையை எதிர்கொள்ள வாய்ப்புள்ளதால், எச்சரிக்கையாக இருக்குமாறு IMD அறிவுறுத்தியுள்ளது.
சென்னை பருவமழை தீவிரம்
கடந்த அக்டோபர் 16 அன்று தொடங்கிய வடகிழக்கு பருவமழை, கன்னியாகுமரி, திருநெல்வேலி, தென்காசி, தூத்துக்குடி மற்றும் விருதுநகர் போன்ற தென் மாவட்டங்களில் கணிசமான மழையைப் பொழிந்துள்ளது. அதேசமயம், சென்னை, காஞ்சிபுரம், செங்கல்பட்டு, திருவள்ளூர் மற்றும் விழுப்புரம் போன்ற வட மாவட்டங்களிலும் கனமழை பெய்து, நகர்ப்புறங்களில் நீர் தேங்க வழிவகுத்துள்ளது.
டெல்டா கடற்கரை பகுதிகளில் பரவலான மழை பெய்யும். புதுச்சேரிக்கும் டெல்டா பகுதிக்கும் இடையே மிதமான முதல் கனமழை தொடரும். இதற்கிடையில், சென்னை கடற்கரை பகுதிகளில் காலை நேரங்களில் அவ்வப்போது மழை பெய்யும் என்று வானிலை ஆய்வு மைய வட்டாரங்கள் தெரிவிக்கின்றன.
IMD வானிலை அறிவிப்பு
IMD வெளியிட்ட விரிவான மாவட்ட வாரியான முன்னறிவிப்பின்படி, அக்டோபர் 21 அன்று ராமநாதபுரம், புதுக்கோட்டை, மயிலாடுதுறை, நாகப்பட்டினம், திருவாரூர், தஞ்சாவூர், கடலூர், புதுச்சேரி மற்றும் காரைக்காலில் இடியுடன் கூடிய லேசானது முதல் மிதமான மழையும், கனமழையும் எதிர்பார்க்கப்படுகிறது.
கூடுதலாக, கன்னியாகுமரி, திருநெல்வேலி, தூத்துக்குடி, விழுப்புரம், செங்கல்பட்டு, திருவள்ளூர், சென்னை, காஞ்சிபுரம், அரியலூர், பெரம்பலூர், சிவகங்கை, விருதுநகர், மதுரை, தேனி மற்றும் திண்டுக்கல் ஆகிய மாவட்டங்களில் தனிமைப்படுத்தப்பட்ட கனமழை பெய்யக்கூடும்.
அக்டோபர் 22 அன்று, திருவள்ளூர், சென்னை, செங்கல்பட்டு, காஞ்சிபுரம், விழுப்புரம், ராணிப்பேட்டை, திருவண்ணாமலை, புதுச்சேரி, கடலூர், கள்ளக்குறிச்சி, திருப்பத்தூர், வேலூர், மயிலாடுதுறை, நாகப்பட்டினம், திருவாரூர், தஞ்சாவூர் மற்றும் புதுக்கோட்டையில் கனமழை தொடரும் என கணிக்கப்பட்டுள்ளது.
அக்டோபர் 23 அன்று நிலைமை தீவிரமடைந்து, திருவள்ளூர், சென்னை, செங்கல்பட்டு, காஞ்சிபுரம், ராணிப்பேட்டை மற்றும் வேலூரில் கனமழை முதல் மிகக் கனமழை எதிர்பார்க்கப்படுகிறது. மேலும், கிருஷ்ணகிரி, தருமபுரி, விழுப்புரம், திருவண்ணாமலை மற்றும் திருப்பத்தூரில் கனமழை பெய்யக்கூடும்.
அக்டோபர் 24 அன்று, திருப்பத்தூர், வேலூர், கிருஷ்ணகிரி, சென்னை, திருவள்ளூர், காஞ்சிபுரம், ராணிப்பேட்டை, திருவண்ணாமலை, ஈரோடு, நீலகிரி, கோவை மற்றும் தருமபுரி ஆகிய மாவட்டங்களில் கனமழை தொடரும்.
பருவமழையின் தீவிரத்தை அதிகரிக்கும் வகையில், IMD இரண்டு முக்கிய வானிலை நிகழ்வுகளை கண்காணித்து வருகிறது. தென்கிழக்கு அரபிக்கடல் மற்றும் லட்சத்தீவுகளின் மீது நிலவும் குறைந்த காற்றழுத்த தாழ்வு பகுதி, அடுத்த 36 மணி நேரத்தில் மேற்கு-வடமேற்கு நோக்கி நகர்ந்து காற்றழுத்த தாழ்வு மண்டலமாக வலுப்பெறும் என எதிர்பார்க்கப்படுகிறது.
அதே நேரத்தில், தென்கிழக்கு வங்காள விரிகுடாவில் அக்டோபர் 21-ஆம் தேதிக்குள்.. அதாவது இன்று மாலைக்குள் மற்றொரு குறைந்த காற்றழுத்த தாழ்வு பகுதி உருவாகி, மத்திய மற்றும் அதை ஒட்டிய மேற்கு-மத்திய வங்காள விரிகுடாவில் காற்றழுத்த தாழ்வு மண்டலமாக மாற வாய்ப்புள்ளது.
Click it and Unblock the Notifications
Sign in with Google