வழக்கத்திற்கு மாறான அளவில் பெய்த வடகிழக்கு பருவமழை.. இது பத்தாது! வானிலை ஆய்வு மையம் சொன்ன தகவல்

சென்னை: தமிழ்நாடு முழுவதும் கடந்த சில நாட்களாக தொடர் மழை பெய்து வருகிறது. இருப்பினும் வடகிழக்கு பருவமழை இயல்பை விட 9% குறைவாகத்தான் பெய்திருப்பதாக சென்னை வானிலை ஆய்வு மையம் தெரிவித்துள்ளது.

தமிழ்நாட்டில் கடந்த சில நாட்களாக தொடர்ந்து பரவலாக மழை பெய்து வருகிறது. தொடர் மழை காரணமாக மேட்டூர் அணை தவிர பெரும்பாலான அணைகள் அனைத்தும் முழு கொள்ளளவை எட்டியுள்ளன. குறிப்பாக தென் மாவட்டங்களான திருநெல்வேலியில் உள்ள பாபநாசம், சேர்வலாறு, மணிமுத்தாறு, வடக்கு பச்சையாறு, நம்பியாறு, கொடுமுடியாறு உள்ளிட்ட அணைகளும், தென்காசியின் கடனா, ராமநதி, கருப்பாநதி, குண்டாறு, அடவிநயினார் உள்ளிட்ட அணைகளும் நிரம்பியுள்ளன.

அதேபோல சென்னைக்கு குடிநீர் ஆதாரமாக இருக்கும் செம்பரம்பாக்கம், புழல் உள்ளிட்ட ஏரிகளும் நிரம்பியுள்ளன. கொங்கு மண்டலத்தில் உள்ள பெரும்பாலான நீர் நிலைகள் மற்றும் அணைகள் நிரம்பியுள்ளன. இருப்பினும் தமிழ்நாட்டில் வடகிழக்கு பருவமழை இயல்பை விட 9% குறைவாக பெய்திருப்பதாக வானிலை ஆய்வு மையம் கூறியுள்ளது. அதாவது அக்.1 முதல் இன்றுவரை இயல்பாக 346.மி.மீ மழை பதிவாகி இருக்க வேண்டும். ஆனால் 316.3 மிமீ மட்டுமே பெய்துள்ளது.

இது ஒருபுறம் இருக்க மறுபுறம் தமிழகத்தில் மழை நீடிக்கும் என வானிலை ஆய்வு மையம் கூறியுள்ளது. இன்று திருவள்ளூர், கடலூர், மயிலாடுதுறை, தஞ்சாவூர், திருவாரூர், நாகப்பட்டினம், புதுக்கோட்டை, ராமநாதபுரம், தூத்துக்குடி மற்றும் திருநெல்வேலி ஆகிய 10 மாவட்டங்களில் கனமழைக்கு வாய்ப்பு உள்ளது எனத் தெரிவித்துள்ளது.

மேலும், தெற்கு அந்தமான் கடல் மற்றும் அதனை ஒட்டிய பகுதிகளில் நிலவும் காற்றழுத்த தாழ்வு பகுதி மேற்கு-வடமேற்கு திசையில் நகர்ந்து தென்கிழக்கு வங்கக்கடல் பகுதிகளில் நாளை காற்றழுத்த தாழ்வு மண்டலமாகவும், டிசம்பர் ஒன்றாம் தேதி புயலாகவும் வலுப்பெற கூடும் என்றும் தெரிவிக்கப்பட்டுள்ளது.

தெற்கு அந்தமான் கடலோரப் பகுதியில் உருவான குறைந்த காற்றழுத்த தாழ்வு பகுதி மேற்கு வட மேற்கு திசையில் ஒடிசா கடற்கரையை நோக்கி நகர்ந்து கொண்டிருக்கிறது. இந்த சூழ்நிலையில் இன்று சென்னைக்கு ஆரஞ்சு அலர்ட்டானது விடுக்கப்பட்டு இருக்கிறது. தொடர்ந்து நாளை குறைந்த காற்றழுத்த தாழ்வு மண்டலமாக வலுப்பெறும் என்பதால் நாளையும் மழைக்கு வாய்ப்புள்ளதாகவும் தெரிவிக்கப்பட்டுள்ளது என்பது குறிப்பிடத்தக்கது.

English summary

It has been raining continuously for the past few days across Tamil Nadu. However, the Northeast Monsoon has received 9% less than normal, according to the Chennai Meteorological Department.