Parasakthi Box Office: பராசக்தியின் வசூல் நிலவரம்! சிவகார்த்திகேயனுக்கு சிக்கல்.. தியேட்டர் நிலவரம் இதுதான்!

சென்னை: பொங்கல் வெளியீடாக பெரிய எதிர்பார்ப்புகளுடன் திரைக்கு வந்த சுதா கொங்கரா இயக்கத்தில் உருவான 'பராசக்தி' திரைப்படம், ஆரம்பத்தில் வேகமாக பாய்ந்தாலும் தற்போது பாக்ஸ் ஆபீஸில் தடுமாறும் நிலைக்கு வந்துள்ளது. சிவகார்த்திகேயன், ரவி மோகன், அதர்வா, ஸ்ரீலீலா என பல நட்சத்திரங்கள் இணைந்ததால், இந்த படம் வெளியீட்டுக்கு முன்பே "பெரும் வசூல் வேட்டை" நடத்தும் என்ற நம்பிக்கை இருந்தது.

ஆனால், வெளியீட்டுக்குப் பிறகான நிலவரம் தயாரிப்பாளர்களுக்கும், தியேட்டர் உரிமையாளர்களுக்கும் கலவையான உணர்வுகளை உருவாக்கியுள்ளது. இந்த நிலையில் இந்த படத்தின் வசூல் நிலவரம் பற்றிய தகவல் வெளியாகி இருக்கிறது.

1960-களின் இந்தி திணிப்பு எதிர்ப்பு போராட்டத்தை பின்னணியாக கொண்டு உருவான இப்படம், மாணவர்களின் அரசியல் விழிப்புணர்ச்சி மற்றும் போராட்ட உணர்வை பேசுவதாக விளம்பரப்படுத்தப்பட்டது. முதல் நாள் முதல் இரண்டு நாட்கள் வரை அதற்கான ஆதரவும் தெளிவாகவே தெரிந்தது. படக்குழு வெளியிட்ட அதிகாரப்பூர்வ தகவலின்படி, முதல் நாளில் சுமார் 27 கோடி ரூபாயையும், இரண்டாம் நாளில் மொத்தமாக 51 கோடி ரூபாயையும் படம் வசூலித்தது. இதனால், "சிவகார்த்திகேயன் கேரியரில் புதிய மைல்கல்" என ரசிகர்கள் உற்சாகம் அடைந்தனர்.

ஆனால், உண்மையான சோதனை வாரத்தின் நடுப்பகுதியில் ஆரம்பமானது. திங்கட்கிழமை முதல் தியேட்டர்களில் கூட்டம் கணிசமாக குறைய தொடங்கியது. செவ்வாய்க்கிழமைக்கு வந்தபோது, பல இடங்களில் டிக்கெட் புக்கிங் மந்தமாக இருந்ததாக பாக்ஸ் ஆபீஸ் வட்டாரங்கள் தெரிவிக்கின்றன. குறிப்பாக மல்டிபிளக்ஸ் திரையரங்குகளில், மாலை மற்றும் இரவு காட்சிகளில் பாதி அரங்குகள் மட்டுமே நிரம்பியுள்ளன என்ற தகவல்கள் வெளியாகி வருகின்றன.

இதற்கிடையே, படத்தைச் சுற்றி அரசியல் சர்ச்சைகளும் கிளம்பின. திமுக - காங்கிரஸ் அரசியல் சமன்பாடுகள், ரெட் ஜெயன்ட் மூவிஸ் மூலம் வெளியீடு, சென்சார் போர்டின் கட் விவகாரம் என பல விஷயங்கள் சமூக வலைதளங்களில் தீவிரமாக விவாதிக்கப்பட்டு வருகின்றன. சுமார் 25 இடங்களில் சென்சார் கட் செய்யப்பட்டதால், படத்தின் தீவிர அரசியல் உணர்வு மங்கிவிட்டதாகவும், அது காதல்-ஆக்‌ஷன்-பழிவாங்கல் டிராமாவாக மட்டுமே மாறிவிட்டதாகவும் சில விமர்சகர்கள் குற்றம் சாட்டுகின்றனர்.

Parasakthi box office: சாதனை படைத்த சிவகார்த்திகேயன்.. இதுதான் பராசக்தியின் 2 நாள் வசூல்.. அதிகாரப்பூர்வமான அறிவிப்பு
இதனால் பராசக்தி நிலைத்து நிற்குமா என்பதே இப்போது பெரிய கேள்வியாக உள்ளது. சிவகார்த்திகேயன் நடிப்பில் கடந்த ஆண்டு வெளியான 'அமரன்' படம் போல வலுவான உணர்ச்சி தாக்கத்தை பராசக்தி உருவாக்கவில்லை என்பதே, தற்போதைய வசூல் சரிவுக்கான முக்கிய காரணமாக சொல்லப்படுகிறது.

பொங்கல் விடுமுறை நாட்களில் ஒரு பெரிய புஷ் கிடைத்தால் மட்டுமே, 100 கோடி வசூல் என்ற எல்லையை பராசக்தி தொட்டுவிடும் என்ற நம்பிக்கை உள்ளது. இல்லையெனில், ஆரம்பத்தில் வேகமாக ஓடி பின்னர் டல் அடித்த ஒரு பொங்கல் ரிலீஸாகவே இந்த படம் நினைவில் நிற்கும் அபாயம் இருப்பதாக பாக்ஸ் ஆபீஸ் நிபுணர்கள் கணிக்கின்றனர்.

English summary

Parasakthi 4th day Box Office: Released as a high-profile Pongal festival film, Parashakthi, directed by Sudha Kongara and starring Sivakarthikeyan, initially recorded an impressive box office opening. Backed by a strong ensemble cast and promoted as a politically charged drama set against the anti-Hindi imposition protests of the 1960s, the film earned around ₹27 crore on its first day and crossed ₹51 crore within two days. However, the momentum began to decline from the start of the week, with theatre occupancy dropping significantly, especially in multiplexes. Political controversies, censorship cuts, and criticism that the film diluted its core ideological intensity have further impacted audience interest. Trade experts believe that only a strong push during the remaining Pongal holidays could help the film reach the ₹100 crore mark; otherwise, it risks being remembered as a film that lost steam after a promising start.