நாடு முழுக்க ரயில் புக்கிங் விதிகளில்.. அதிரடி மாற்றம்.. மத்திய அரசின் முக்கியமான முடிவு.. கவனம்!

சென்னை: இந்திய ரயில்வே (ஐ.ஆர்.சி.டி.சி) ரயில் டிக்கெட் முன்பதிவு, கட்டண அமைப்பு ஆகியவற்றில் பல முக்கிய மாற்றங்களை அறிவித்துள்ளது. ஆதார் சரிபார்க்கப்பட்ட பயணிகளுக்கான புதிய முன்பதிவு விதிமுறைகளும் வந்துள்ளன.

இதன் ஒரு பகுதியாக, ஐ.ஆர்.சி.டி.சி இணையதளத்தில் ஆதார் அங்கீகரிக்கப்பட்ட பயனர் ஒருவரால் மட்டுமே முன்பதிவு செய்யக்கூடிய சிறப்பு பக்கம் அறிமுகப்படுத்தப்பட்டுள்ளது. முன்பதிவு திறக்கப்படும் முதல் நாளில் காலை 8 மணி முதல் மாலை 4 மணி வரை ஆதார் அங்கீகரிக்கப்பட்ட பயனர்கள் மட்டுமே டிக்கெட் முன்பதிவு செய்ய தற்போது அனுமதிக்கப்படுகிறார்கள்.

இந்திய ரயில்வே (ஐ.ஆர்.சி.டி.சி) ரயில் டிக்கெட் முன்பதிவு

முன்கூட்டியே முன்பதிவு செய்யும் காலம் (ARP) தொடங்கும் நாளில் பொதுவான முன்பதிவு டிக்கெட்டுகளை பதிவு செய்ய ஆதார் அங்கீகாரம் கட்டாயமாக்கப்பட்டுள்ளது. ஐ.ஆர்.சி.டி.சி தகவல்படி, 2026 ஆம் ஆண்டு ஜனவரி 12 முதல் இந்த புதிய விதி அமுலுக்கு வரும். பயணம் செய்யும் தேதியைத் தவிர்த்து, ரயில் புறப்படும் நிலையத்தில் இருந்து 60 நாட்களுக்கு முன்பே டிக்கெட்டுகளை முன்பதிவு செய்ய முடிவது குறிப்பிடத்தக்கது.

தட்கல் டிக்கெட் முன்பதிவுகளுக்கும் ஆதார் அங்கீகாரம் கட்டாயமாக்கப்பட்டு உள்ளது. இந்திய ரயில்வே வெளியிட்ட தகவலின்படி, 2025 ஆம் ஆண்டு ஜூலை 1 முதல், ஐ.ஆர்.சி.டி.சி இணையதளம் மற்றும் செயலி மூலம் ஆதார் சரிபார்க்கப்பட்ட பயனர்கள் மட்டுமே தட்கல் டிக்கெட்டுகளை முன்பதிவு செய்ய முடியும். மேலும், 2025 ஆம் ஆண்டு ஜூலை 15 முதல் ஆன்லைனில் செய்யப்படும் தட்கல் டிக்கெட் முன்பதிவுகளுக்கு ஆதார் அடிப்படையிலான ஒருமுறை கடவுச்சொல் (OTP) சரிபார்ப்பு கட்டாயமாக்கப்படும்.

தட்கல் டிக்கெட் முன்பதிவுகளுக்கும் ஆதார் அங்கீகாரம்

டிக்கெட் முன்பதிவு விதிமுறைகளுக்கு அப்பால், ரயில்வே கட்டணக் கட்டமைப்பிலும் மாற்றங்களைக் கொண்டு வந்துள்ளது. 2025 ஆம் ஆண்டு டிசம்பர் 26 முதல் திருத்தப்பட்ட கட்டணங்கள் அமலுக்கு வரும். நீண்ட தூர பயணங்களுக்கான புதிய கட்டணத் திருத்தத்தின்படி, ரயில் கட்டணங்கள் தூரப் பிரிவுகளாக பிரிக்கப்பட்டு அதிகரிக்கப்பட்டுள்ளன. அவை பின்வருமாறு:

216 கி.மீ முதல் 750 கி.மீ வரையிலான தூரங்களுக்கு ₹5 ஆக உயர்த்தப்பட்டுள்ளது. 751 கி.மீ முதல் 1,250 கி.மீ வரையிலான தூரங்களுக்கு ₹10 அதிகரிக்கப்பட்டுள்ளது. 1,251 கி.மீ முதல் 1,750 கி.மீ தூரத்திற்கு ₹15 மற்றும் 1,751 கி.மீ முதல் 2,250 கி.மீ வரையிலான தூரங்களுக்கு ₹20 என கட்டணம் உயர்த்தப்பட்டுள்ளது.

பயணிகளின் வகுப்புகளைப் பொறுத்தவரை, படுக்கை வசதி இல்லாத சாதாரண மற்றும் முதல் வகுப்பு சாதாரண டிக்கெட்டுகளுக்கான கட்டணங்கள் திருத்தப்பட்டுள்ளன. புறநகர் அல்லாத பயணங்களுக்கு, ஒரு கிலோமீட்டருக்கு 1 பைசா என்ற சீரான மற்றும் குறைந்தபட்ச கட்டணத்தில் இந்த உயர்வு அமல்படுத்தப்பட்டுள்ளது.

மெயில் மற்றும் எக்ஸ்பிரஸ் ரயில்

மெயில் மற்றும் எக்ஸ்பிரஸ் ரயில்களில், ஏசி மற்றும் ஏசி அல்லாத இரு வகுப்புகளிலும் ஒரு கிலோமீட்டருக்கு 2 பைசா கட்டணம் அதிகரிக்கப்பட்டுள்ளது. இதில் படுக்கை வசதி, முதல் வகுப்பு, ஏசி சேர் கார், ஏசி 3 டயர், ஏசி 2 டயர் மற்றும் ஏசி முதல் வகுப்பு அடங்கும். உதாரணமாக, ஏசி அல்லாத மெயில் அல்லது எக்ஸ்பிரஸ் ரயிலில் 500 கி.மீ பயணம் செய்யும் ஒரு பயணி குறைந்தது ₹10 கூடுதலாகச் செலுத்த வேண்டியிருக்கும்.

இருப்பினும், அனைத்து சேவைகளுக்கும் கட்டணங்கள் அதிகரிக்கப்படவில்லை. புறநகர் சேவைகள் மற்றும் சீசன் டிக்கெட்டுகளுக்கு கட்டண உயர்வு இல்லை. புறநகர் மற்றும் புறநகர் அல்லாத வழித்தடங்கள் இரண்டையும் உள்ளடக்கிய சீசன் டிக்கெட்டுகளுக்கும் இந்த விதி பொருந்தும். இதனால் தினசரி பயணிகளுக்கு எந்த ஒரு நிதிச்சுமையும் ஏற்படாது, அவர்கள் வழக்கமான கட்டணத்திலேயே தொடர்ந்து பயணிக்கலாம்.

ராஜ்தானி, சதாப்தி, துரந்தோ, வந்தே பாரத், தேஜாஸ், ஹம்சஃபர், அம்ரித் பாரத், கரீப் ரத், ஜன் சதாப்தி, அந்த்யோதயா, கதிமான், யுவா எக்ஸ்பிரஸ், நமோ பாரத் ராபிட் ரயில் மற்றும் சாதாரண புறநகர் அல்லாத சேவைகள் போன்ற முக்கிய ரயில் சேவைகளுக்கான அடிப்படை கட்டணம் திருத்தப்பட்டுள்ளது. அங்கீகரிக்கப்பட்ட வகுப்பு வாரியான திருத்தங்களுக்கு இணங்க இந்த கட்டண மாற்றங்கள் மேற்கொள்ளப்பட்டுள்ளன.

English summary

Indian Railways Announces New Ticket Systems all over India: ISRTC Rules