பயங்கரமாக சொதப்பிய பாகிஸ்தான்! ஈரான்-அமெரிக்கா பேச்சுவார்த்தை தோல்வி! மோசமடையும் நிலைமை

Updated: Saturday, April 4, 2026, 7:07 [IST]

Subscribe to Oneindia Tamil

இஸ்லாமாபாத்: ஈரான்-அமெரிக்கா போரில், மத்தியஸ்தம் செய்வதற்காக பாகிஸ்தானை அமெரிக்கா நியமித்திருந்தது. அமெரிக்கா கொடுக்கும் டீலை, ஈரானை ஏற்றுக்கொள்ள வைப்பதுதான் பாகிஸ்தானின் வேலை. ஆனால், இதில் பாக், சொதப்பியிருப்பதால், பேச்சுவார்த்தை தோல்வியில் முடிந்திருக்கிறது.

அமெரிக்கா மற்றும் ஈரானுக்கு இடையிலான போர் நிறுத்த பேச்சுவார்த்தை தடைபட்டுள்ளதை 'தி வால் ஸ்ட்ரீட் ஜர்னல்' உறுதிப்படுத்தியுள்ளது. அமெரிக்காவின் கோரிக்கைகளை ஈரான் ஏற்க மறுத்துள்ளது. பாகிஸ்தானை வைத்து முன்னெடுக்கப்பட்ட முயற்சிகள் தோல்வியடைந்துள்ளன.

பாகிஸ்தான் மற்றும் சமரச முயற்சிகள்

பாகிஸ்தான் வழங்கிய சமரச முயற்சிகள் தோல்வியடைந்தது, அந்நாடு எந்த மாதிரியான முயற்சிகளை எடுத்தது என்கிற கேள்விகளை எழுப்பியிருக்கிறது. பாகிஸ்தான் வெளியுறவுத்துறை அமைச்சர் இஷாக் தார், இது குறித்து கூறுகையில் “பயனுள்ள பேச்சுவார்த்தைகளை எளிதாக்குவதில் பெருமைப்படுவோம்” என்று சிம்பிளாக கருத்து தெரிவித்திருக்கிறார். பாகிஸ்தான் பேச்சுவார்த்தைகளுக்கு உதவத் தயாராக இருப்பதாக அறிவித்திருந்தார்.

இஸ்லாமாபாத்தில் அமெரிக்க அதிகாரிகளை சந்திக்க ஈரான் விரும்பவில்லை என்றும், அமெரிக்காவின் கோரிக்கைகள் ஏற்றுக்கொள்ள முடியாதவை என்றும் பாகிஸ்தானிடம் ஈரான் தெரிவித்ததாக வால் ஸ்ட்ரீட் ஜர்னல் குறிப்பிட்டது.

டிரம்ப் மற்றும் ஈரானின் நிலைப்பாடு

அமெரிக்க அதிபர் டொனால்ட் டிரம்ப், சமீபத்தில்தான் ஈரானுடன் பேச்சுவார்த்தை சுமூகமாக போய்க்கொண்டிருக்கிறது என்று கூறியிருந்தார். இப்படி இருக்கையில், ஈரான் வெளிப்படையாக பேச்சுவார்த்தை தோல்வியடைந்திருப்பதாக கூறியிருப்பது, டிரம்புக்கு அதிருப்தியை ஏற்படுத்தியிருக்கிறது.

மும்பையில் உள்ள ஈரானிய துணைத் தூதரகம் சார்பில் X தளத்தில் வெளியான அறிக்கையில், வெளியுறவு அமைச்சக செய்தித் தொடர்பாளர் இஸ்மாயில் பகாபி,

“அமெரிக்காவுடன் நேரடிப் பேச்சுவார்த்தைகள் எதுவும் இல்லை. பாகிஸ்தானில் நடக்கும் பேச்சுவார்த்தையில் நாங்கள் பங்கேற்கவில்லை. டிரம்ப் நிர்வாகத்திடமிருந்து 15 அம்சத் திட்டம், யதார்த்தமானது அல்ல. அது நியாயமற்றது. போரை முடிவுக்குக் கொண்டு வர பிராந்திய நாடுகள் விடுக்கும் அழைப்புகளை வரவேற்கிறோம். ஆனால், யார் போரை ஆரம்பித்தார்கள் என்பதை நினைவில் கொள்ள வேண்டும்” என்றும் கூறியிருக்கிறார்.