5வது முறையாக சொதப்பல்.. 7 ரன்களில் அவுட்டான ருதுராஜ் கெய்க்வாட்.. ஃபார்ம் அவுட்டில் சிஎஸ்கே கேப்டன்!
சென்னை: சிஎஸ்கே அணியின் கேப்டன் ருதுராஜ் கெய்க்வாட் தொடர்ந்து 5வது முறையாக சொதப்பலான ஆட்டத்தை வெளிப்படுத்தி இருக்கிறார். சேப்பாக்கம் மைதானத்தில் நடந்து வரும் கேகேஆர் அணிக்கு எதிரான போட்டியிலும் ருதுராஜ் கெய்க்வாட் 7 ரன்களில் ஆட்டமிழந்து வெளியேறி இருப்பது ரசிகர்களிடையே ஏமாற்றத்தை ஏற்படுத்தி இருக்கிறது.
ஐபிஎல் தொடரில் கேகேஆர் அணிக்கு எதிரான போட்டியில் சிஎஸ்கே அணி விளையாடி வருகிறது. இந்தப் போட்டியில் டாஸ் வென்ற கேகேஆர் அணியின் கேப்டன் ரஹானே பவுலிங்கை தேர்வு செய்தார். இதன்பின் சிஎஸ்கே அணி தரப்பில் கேப்டன் ருதுராஜ் கெய்க்வாட் - சஞ்சு சாம்சன் கூட்டணி தொடக்கம் கொடுத்தது. வைபவ் அரோரா வீசிய முதல் ஓவரிலேயே ஹாட்ரிக் பவுண்டரியுடன் சஞ்சு சாம்சன் கணக்கை தொடங்கினார்.
தொடர்ந்து 2வது ஓவரை வீசிய கேமரூன் க்ரீன் பந்தில் ருதுராஜ் கெய்க்வாட் ஒரு பவுண்டரியை விளாசி தள்ளினார். இதன்பின் 3வது ஓவரில் ரஹானே ஸ்பின்னரான அனுகுல் ராய்யை அட்டாக்கில் கொண்டு வந்தார். அந்த ஓவரின் 2வது பந்திலேயே அட்டாக் செய்ய முயற்சித்த ருதுராஜ் கெய்க்வாட், ஸ்லாக் ஸ்வீப்பை ஆடினார். அது நேராக மிட் விக்கெட்டில் நின்றிருந்த பவல் கைகளில் சென்று விழுந்தது.
இதனால் ருதுராஜ் கெய்க்வாட் 6 பந்துகளில் 7 ரன்கள் எடுத்து வெளியேறினார். இது ரசிகர்களிடையே ஏமாற்றத்தை ஏற்படுத்தி இருக்கிறது. ஏனென்றால் ருதுராஜ் கெய்க்வாட் தொடர்ச்சியாக 5வது போட்டியிலும் சொதப்பி இருக்கிறார். ஏற்கனவே ராஜஸ்தான் அணிக்கு எதிரான போட்டியில் 6 ரன்களிலும், பஞ்சாப் அணிக்கு எதிரான போட்டியில் 28 ரன்களிலும் ருதுராஜ் வெளியேறினார்.
தொடர்ந்து ஆர்சிபி அணிக்கு எதிரான போட்டியில் 7 ரன்களிலும், டெல்லி அணிக்கு எதிரான போட்டியில் 15 ரன்களிலும் ஆட்டமிழந்தார். ஐபிஎல் தொடரில் ருதுராஜ் கெய்க்வாட் பெரிதாக அவுட் ஃபார்மில் இருந்ததே கிடையாது. எந்த பேட்டிங் வரிசையில் களமிறங்கி ஆடினாலும், ருதுராஜ் கெய்க்வாட் கிளாசிக் ஷாட்கள் மூலமாக விரைவாக ரன்களை குவிப்பார்.
இந்த சீசனில் 5 போட்டிகளாக தொடர்ந்து சொதப்பி இருப்பது பேசுபொருளாகி இருக்கிறது. இதனால் ருதுராஜ் கெய்க்வாட் விரைவில் ஃபார்முக்கு திரும்ப வேண்டும் என்று ரசிகர்கள் அறிவுறுத்தி வருகின்றனர். ருதுராஜ் கெய்க்வாட் அதிரடி தொடக்கம் கொடுக்கும் பட்சத்தில், அவரால் கேப்டன்சியிலும் அழுத்தம் இல்லாமல் செயல்பட முடியும் என்றும் பார்க்கப்படுகிறது.
Click it and Unblock the Notifications
Sign in with Google