தமிழக தேர்தல் முடிவு.. மீண்டும் ஸ்டாலின் முழக்கத்துடன் அண்ணா அறிவாலயத்தில் குவியும் திமுக தொண்டர்கள்

சென்னை: தமிழக சட்டமன்றத் தேர்தல் 2026-க்கான வாக்கு எண்ணிக்கை இன்று விறுவிறுப்பாக நடைபெற்று வரும் நிலையில், ஆளுங்கட்சியான திமுகவின் தலைமையகமான சென்னை அண்ணா அறிவாலயம் களைகட்டியுள்ளது. அதிகாலை முதலே தமிழகத்தின் பல்வேறு பகுதிகளில் இருந்தும் ஆயிரக்கணக்கான தொண்டர்கள் அறிவாலயத்தில் குவியத் தொடங்கியுள்ளனர்.

வாக்கு எண்ணிக்கை மையங்களில் இருந்து வெளிவரும் ஆரம்பகட்ட முடிவுகளில் திமுக கூட்டணி முன்னிலை பெற்று வருவதைத் தொடர்ந்து, தொண்டர்கள் உற்சாகத்தின் எல்லைக்கே சென்றுள்ளனர். சென்னை கொளத்தூர் தொகுதியில் தமிழ்நாடு முதலமைச்சர் முக ஸ்டாலின் முன்னிலை பெற்றுள்ளார். இதனையடுத்து, "மீண்டும் ஸ்டாலின், மீண்டும் திமுக" போன்ற முழக்கங்களுடன் அறிவாலய வளாகமே அதிர்ந்தது.

தேர்தல் முடிவுகளை உடனுக்குடன் தெரிந்துகொள்ளும் வகையில் வளாகத்தில் பெரிய டிஜிட்டல் திரைகள் அமைக்கப்பட்டுள்ளன. ஒவ்வொரு தொகுதியிலும் திமுக முன்னிலை பெறும்போதும் ஆரவாரம் விண்ணைப் பிளக்கிறது.

முதலமைச்சர் மு.க. ஸ்டாலின் அவர்கள் அண்ணா அறிவாலயத்திற்கு வருகை தரக்கூடும் என்பதால், பாதுகாப்பு பலப்படுத்தப்பட்டுள்ளது. அமைச்சர்கள் மற்றும் முக்கிய நிர்வாகிகள் ஏற்கனவே அறிவாலயத்தில் முகாமிட்டுள்ளனர்.

கடந்த சில நாட்களாகவே வாக்கு எண்ணிக்கைக்கான முன்னேற்பாடுகளை தீவிரமாக கவனித்து வந்த முதலமைச்சர், இன்று மாலைக்குள் அதிகாரப்பூர்வ அறிவிப்புகள் வந்தவுடன் தொண்டர்களைச் சந்திப்பார் என எதிர்பார்க்கப்படுகிறது.

கூட்டம் அதிகரித்துக் கொண்டே இருப்பதால், அண்ணா சாலைப் பகுதியில் போக்குவரத்து நெரிசல் ஏற்படாத வண்ணம் காவல்துறையினர் தீவிர கண்காணிப்பில் ஈடுபட்டுள்ளனர். தொண்டர்களின் உணர்ச்சிப் பெருக்கைக் கட்டுப்படுத்தவும், அசம்பாவிதங்களைத் தவிர்க்கவும் கூடுதல் காவலர்கள் பணியமர்த்தப்பட்டுள்ளனர். தற்போதைய நிலவரப்படி, திமுக தொண்டர்களின் முகங்களில் தென்படும் அபார நம்பிக்கை, தமிழக அரசியல் களத்தில் மீண்டும் ஒரு புதிய அத்தியாயம் படைக்கப்படுவதைக் கோடிட்டுக் காட்டுகிறது.