சிக்குன்குனியா, டெங்குவை ஒழிக்க உதவும் மரபனு மாற்ற கொசு - சென்னையி்ல் ஆய்வு ரீதியாக வளர்ப்பு

சென்னை: இங்கிலாந்தின் ஆக்ஸ்போர்ட் பல்கலைக்கழக ஆய்வாளர்களால் வடிவமைக்கப்பட்ட மரபு ரீதியாக மாற்றப்பட்ட கொசுவளர்ப்பு மற்றும் ஆராய்ச்சி சென்னை அருகே நடந்து வருகிறது.

இந்த மரபனு மாற்ற கொசு, டெங்கு மற்றும் சிக்குன்குனியாவை ஒழிக்க உதவும் என்பது குறிப்பிடத்தக்கது.

இந்த ஆண் கொசுக்களில் மரபணு மாற்றம் செய்யப்பட்டு்ள்ளதால் அவை டெங்கு மற்றும் சிக்குன்குனியாவை பரப்பும் கிருமிகளை ஏந்திச் செல்லாது. மேலும் இந்தக் கொசுக்கள் மூலம் இனப் பெருக்கம் செய்யப்படும் கொசுக்களிலும் இந்த நோய் பரப்பும் திறன் இருக்காது. இதன்மூலம் நோய் பரப்பும் கொசுக்களின் எண்ணிக்கையை குறைக்க முடியும்.

இந்த கொசு குறித்த ஆய்வை மேற்கொள்ள மத்திய அரசின் பயோடெக்னாலஜி துறை அனுமதி அளித்துள்ளது. தற்போது படப்பையில் உள்ள சர்வதேச பயோடெக்னாலஜி மற்றும் டாக்சிகாலஜி கழகத்தில் இந்த கொசு ஆய்வில் உள்ளது.

தற்போது ஆய்வில் 2வது கட்டம் முடிவடைந்துள்ளதாம்.
இதுகுறித்து ஆக்ஸ்போர்ட் பல்கலைக்கழகத்தின் விசிட்டிங் ஆய்வாளரும், ஆக்ஸ்போர்ட் இன்செக்ட் டெக்னாலஜிஸ் கழகத்தின் (ஆக்ஸிடெக்) தலைவருமான எஸ்.எஸ்.வாசன் கூறுகையில், டெங்கு, சிக்குன்குனியா ஆகியவற்றைப் பரப்பும் கொசுக்களுடன் போராடி அவற்றை ஒழிக்கும் தன்மையுடன் கூடியதாக இந்த மரபனு மாற்ற கொசு (ஏடெஸ் ஏஜிப்டி -Aedes aegypti) இருக்கும்.

2002ம் ஆண்டு ஆக்ஸிடெக் உருவாக்கப்பட்டது. ஆக்ஸ்போர்ட் பல்கலைக்கழகத்தில் கண்டுபிடிக்கப்படும் அறிவியல், தொழில்நுட்ப கண்டுபிடிப்புகளை வர்த்தகமயாக்கும் முயற்சியில் இது ஈடுபட்டுள்ளது. இந்தியா உள்ளிட்ட 10 நாடுகளில் இது ஆய்வு மற்றும் அமலாக்கப் பணிகளில் ஈடுபட்டுள்ளது.

உலக மக்கள் தொகையில் 55 சதவீதம் பேர் டெங்கு காய்ச்சலால் பாதிக்கப்படுபவர்களாக உள்ளனர். 120 நாடுகளில் இந்த டெங்கு பெரும் பாடுபடுத்தி வருகிறது. எனவேதான் இதை ஒழிக்க பெரும் பொருட் செலவில் மரபனு கொசுவை உருவாக்கும் ஆய்வில் ஆக்ஸ்போர்ட் பல்கலைக்கழகம் ஈடுபட்டுள்ளது.

விரைவில் 3வது கட்ட பரீட்சார்த்த ஆய்வுகள் நடைபெறவுள்ளன. அதன் பின்னர் இந்தத் தொழில்நுட்பம் வெளியிட்படும்.

இந்த ஆய்வு டெங்கு மற்றும் சிக்குன்குனியாவை அடியோடு ஒழிப்பது என்பதற்காக அல்ல. அப்படி செய்யவும் முடியாது. மரபனு மாற்ற கொசுக்கள் மூலம் டெங்கு, சிக்குன்குனியா பரவுவது குறையும் என்பதுதான் இதில் முக்கிய அமசம் என்றார் வாசன்.