போன், கணினிக்கு இனி வேலையே இருக்காது.. வருகிறது புதிய ஏஐ சாதனம்.. ஓபன் ஏஐ களமிறக்கும் புது கருவி!
சென்னை: மக்கள் தற்போது பயன்படுத்தும் கணினிகள் செயற்கை நுண்ணறிவின் (Artificial Intelligence - AI) எதிர்காலத் தேவைகளுக்கு ஏற்றதாக இல்லை என OpenAI நிறுவனத்தின் தலைமை நிர்வாக அதிகாரி சாம் ஆல்ட்மேன் தெரிவித்துள்ளார். செயற்கை நுண்ணறிவு முக்கியப் பங்கு வகிக்கும் எதிர்காலத்திற்கு ஏற்ற புதிய AI சாதனங்களை உருவாக்குவது குறித்து அவர் பேட்டி அளித்துள்ளார்.
தற்போதைய கணினிகள் AI தொழில்நுட்பத்தை மனதில் வைத்து உருவாக்கப்படவில்லை.. அதற்காக புதிய சாதனங்களை உருவாக்க வேண்டும் என்று கூறும் ஆல்ட்மேன், இதற்காக புகழ்பெற்ற கணினி வடிவமைப்பாளர் ஜானி ஐவ் உடன் இணைந்து செயலாற்ற திட்டமிட்டுள்ளார். இருவரும் இணைந்து புதிய ஏஐ சாதனம் ஒன்றை உருவாக்க முடிவு செய்துள்ளனர்.
சாம் ஆல்ட்மேனின் தொலைநோக்கு பார்வை
சாம் ஆல்ட்மேன், தனது சகோதரர் ஜாக் ஆல்ட்மேன் தொகுத்து வழங்கும் பாட்காஸ்ட் ஒன்றில் பேசுகையில், "இன்றைய கணினிகள் செயற்கை நுண்ணறிவு இல்லாத ஒரு உலகத்திற்காக உருவாக்கப்பட்டவை. அவை AI தொழில்நுட்பத்தின் வருகையை எதிர்பார்த்து உருவாக்கப்படவில்லை" என்று குறிப்பிட்டார்.
தொழில்நுட்பத்தின் எதிர்காலம் என்பது, நம்மைச் சுற்றியுள்ள உலகத்தைப் புரிந்து கொண்டு, நம்மைப் பற்றி நன்கு அறிந்திருக்கும் 'ஸ்மார்ட்' சாதனங்களை உள்ளடக்கியதாக இருக்க வேண்டும். இது வெறும் கணினிகளின் வெளிப்புறத் தோற்றத்தில் மட்டுமல்ல, அவற்றின் செயல்பாடுகளிலும் பெரிய மாற்றங்களை உள்ளடக்கியதாக இருக்க வேண்டும். திரைகள் மற்றும் விசைப்பலகைகளைத் தாண்டி, நாம் கணினிகளுடன் தொடர்பு கொள்ளும் விதத்தில் புதிய மாற்றங்கள் வர வேண்டும் என்பதே தனது விருப்பம் என்று ஆல்ட்மேன் மேலும் தெரிவித்தார்.
கூகுள் நிறுவனத்தின் தலைமை நிர்வாக அதிகாரி சுந்தர் பிச்சை போன்ற பிற தொழில்நுட்பத் தலைவர்களும், செயற்கை நுண்ணறிவு மேம்பட்டு வருவதால், தற்போதைய கணினி 'ஹார்ட்வேர்', சக்திவாய்ந்த AI மாடல்களுக்குப் போதுமானதாக இருக்காது என்பதை ஒப்புக்கொண்டுள்ளனர்.
புதிய AI சாதனம் உருவாக்கும் முயற்சி
AI அமைப்புகளுக்கு ஏற்ற புதிய கணினி சாதனங்களை உருவாக்க OpenAI நிறுவனம் முடிவு செய்துள்ளது. இதற்காக, ஆப்பிள் நிறுவனத்தின் வடிவமைப்பு பிரிவை முன்பு வழிநடத்திய சர் ஜானி ஐவ் உடன் இணைந்து செயல்பட திட்டமிடப்பட்டுள்ளது.
இந்த புதிய சாதனம் குறித்த ஆரம்பகட்ட தகவல்கள்:
- இது பாக்கெட் அளவில் இருக்கும் ஒரு சிறிய கணினி.
- இதில் தனியாக திரை இருக்காது.
- இது ஒரு சாதாரண தொலைபேசி போன்றும் இருக்காது.
- கண்ணாடி போன்ற வடிவத்திலும் இருக்காது.
- தொலைபேசிகள் மற்றும் மடிக்கணினி (லேப்டாப்) போல தனியாக பயன்படுத்தக்கூடிய ஒரு புதிய, மூன்றாவது சாதனமாக இது இருக்கும்.
அதாவது, இது வழக்கமான கணினி அல்லது மொபைல் போன் போல இல்லாமல், முற்றிலும் புதிய AI சாதனமாக இருக்கும். இந்த சாதனம், வரலாற்றில் எந்தவொரு தொழில்நுட்ப சாதனத்தை விடவும் வேகமாக 100 மில்லியன் பயனர்களைச் சென்றடையும் என்று ஆல்ட்மேன் நம்பிக்கை தெரிவித்துள்ளார். மேலும், இது குரல், சென்சார்கள் அல்லது சுற்றுப்புறங்களைப் பயன்படுத்தித் தொடர்பு கொள்ளும் என்றும், நம்முடைய வாழ்க்கையை ஆழமாகப் புரிந்து கொள்ளும் என்றும் அவர் கூறினார்.
எதிர்கால தொழில்நுட்பம்
இந்த புதிய AI கேட்ஜெட் 2026 ஆம் ஆண்டின் இறுதியில் அறிமுகப்படுத்தப்பட்டு, நாம் தொழில்நுட்பத்தைப் பயன்படுத்தும் முறையை மாற்றியமைக்கக்கூடும். சாம் ஆல்ட்மேனின் கூற்றுப்படி, "தற்போதைய கணினிகள் செயற்கை நுண்ணறிவுத் தொழில்நுட்பத்திற்கு ஏற்றவாறு உருவாக்கப்படவில்லை. புதிய தொழில்நுட்பம் வரவிருப்பதால், அதற்கேற்ப சாதனங்களை உருவாக்குவது காலத்தின் கட்டாயம்."
OpenAI மற்றும் ஜானி ஐவ் ஆகியோரின் இந்த புதிய முயற்சி, தொழில்நுட்ப உலகில் ஒரு பெரிய மாற்றத்தை ஏற்படுத்தும் என்று எதிர்பார்க்கப்படுகிறது. இது எதிர்காலத்தில் நாம் தொழில்நுட்பத்தை அணுகும் விதத்தை மாற்றியமைக்கும் ஒரு திருப்புமுனையாக அமையலாம்.
Click it and Unblock the Notifications
Sign in with Google