வேலையை ஆரம்பிச்சிட்டாங்க.. சென்னையில் 1000+ இடங்கள் அடியோடு மாறுது.. இது லிஸ்டுலேயே இல்லையே
சென்னை:சென்னையில் பல பணிகளுக்காக உடைக்கப்பட்ட மற்றும் சேதமடைந்த சாலைகள் தற்போது மில்லிங் முறையில் முறையாகச் சீரமைக்கப்பட்டு வருகின்றன. இந்தச் சீரமைப்புப் பணிகளால் நகரத்தின் போக்குவரத்துச் சீராகும் என எதிர்பார்க்கப்படுகிறது.
குறிப்பாக, அண்ணா சாலையில் சிவில் மற்றும் இணைய நிறுவனங்களின் பணிகளால் ஏற்பட்ட சேதங்களை நெடுஞ்சாலைத் துறை பிட்டுமினஸ் தார் கொண்டு சீரமைக்க உள்ளது. இதுகுறித்து அதிகாரிகள் உறுதிப்படுத்தியுள்ளனர்.
சென்னை சாலை பணிகள்
சாலையின் புனரமைப்புப் பணிகளில் பாதசாரிகளுக்கு உகந்த சூழலை உருவாக்கும் வகையில் கேபிள் பதிப்பால் ஏற்பட்ட நடைபாதை சேதங்கள் சரிசெய்யப்படவுள்ளன. அத்துடன், சரியான வடிகால் வசதிகளும் ஏற்படுத்தப்படும் என அதிகாரிகள் தெரிவித்தனர். முன்பு சிமெண்ட் கான்கிரீட் மூலம் சரிசெய்யப்பட்ட சாலை வெட்டுகள், கேபிள் பதிப்பால் மீண்டும் சேதமடைந்திருப்பது குறிப்பிடத்தக்கது.
அனுமதியின்றி வெட்டப்பட்ட சாலைகளும் சீரமைக்கப்படும். சைதாப்பேட்டை முதல் தேனாம்பேட்டை வரையிலான வழித்தடத்தில் குடிநீர்க் குழாய் மாற்றப்பட்ட பகுதிகளில் ஒப்பந்ததாரர்கள் புனரமைப்புப் பணிகளை மேற்கொண்டு வருகின்றனர். இதனால் அப்பகுதி மக்களின் பயணம் மென்மையாகும்.
அண்ணா சாலையில் ஏற்பட்ட சேதங்களை உடனடியாகச் சரிசெய்யும் இந்தப் பணி, போக்குவரத்தைச் சீராக்குவதுடன் பொதுமக்களின் பாதுகாப்பையும் உறுதி செய்யும். நெடுஞ்சாலைத் துறையின் இந்த முயற்சிக்கு பொதுமக்கள் வரவேற்பு தெரிவித்துள்ளனர். இப்பணிகள் விரைவில் முடிந்து, சாலைகள் புதிய பொலிவுடன் காட்சியளிக்கும் என எதிர்பார்க்கப்படுகிறது. துறை அதிகாரிகள் தொடர்ந்து இப்பணிகளைக் கண்காணித்து வருகின்றனர்.
சென்னை சாலை சீரமைப்பு
சென்னையில் மொத்தம் 1,000 மோசமான சாலைகள் கண்டறியப்பட்டுள்ளன. இதில் 300 சாலைகள் வடசென்னையில் அமைந்துள்ளன. இந்தச் சாலைகளை மில்லிங் செய்து சீரமைக்கும் பணிகள் தீவிரமாக நடைபெற்று வருகின்றன. தமிழ்நாடு முழுவதும் சாலை விரிவாக்கம், பாதாள சாக்கடை, கழிவுநீர்க் குழாய் அமைத்தல், கேபிள் பதித்தல், மழைநீர் வடிகால், மின்சார வடங்கள் பதித்தல் மற்றும் பாலம் கட்டுதல் போன்ற பல்வேறு பணிகளுக்காக சாலைகள் சீரமைக்கப்பட்டு வருகின்றன.
கடந்த சில வாரங்களாக சென்னையில் மெட்ரோ குடிநீர்ப் பணிகள் நடைபெற்றன. இதன் காரணமாகச் சேதமடைந்த சாலைகள் உடனடியாக சிமெண்ட் மூலம் பேட்ச் செய்யப்பட்டு, குழிகள் மூடப்பட்டு வருகின்றன. சுமார் 1,000 முக்கிய மற்றும் உள் சாலைகள் அடுத்த வாரத்திற்குள் சரிசெய்யப்பட்டு, வாகன ஓட்டிகளுக்கு நிவாரணம் கிடைக்கும் என அறிவிக்கப்பட்டுள்ளது. முழுமையாகப் பழுதடைந்த சாலைகள் மீண்டும் போடப்படும்; பள்ளங்கள் மட்டும் உள்ள சாலைகள் பேட்ச் செய்யப்படும். ஒரு பள்ளத்தைச் சரிசெய்ய சுமார் 20 நிமிடங்கள் ஆகும் என்றும், இரவு நேரங்களில் இதற்கான பணிகள் நடைபெறும் என்றும் தெரிவிக்கப்பட்டுள்ளது.
சென்னை சாலை ஜெட் பேட்ச் எந்திரம்
சென்னை சாலைகள் சீர்திருத்தத்தின் ஒரு பகுதியாக, மாநகராட்சி ஜெட் பேட்ச் இயந்திரங்களை வாடகைக்கு எடுக்க முடிவு செய்துள்ளது. இந்த இயந்திரங்கள் சாலைகளில் உள்ள குழிகளைச் சுத்தம் செய்யவும் சரிசெய்யவும் பயன்படும். முதல் கட்டமாக ராயபுரம், தொண்டியார்பேட்டை, பெருங்குடி, அண்ணாநகர் ஆகிய பகுதிகளில் உள்ள பர்னபி சாலை, புரசைவாக்கம் மெயின் சாலை, பேசின் பிரிட்ஜ் சாலை, அண்ணாநகர் சாந்தி காலனி சாலை போன்ற முக்கிய சாலைகள் சரிசெய்யப்படும். இது போக்குவரத்து நெரிசலைக் குறைக்கவும் உதவும்.
எட்டு மாத தாமதத்திற்குப் பிறகு, பெருநகர சென்னை மாநகராட்சி (ஜிசிசி) நகரமெங்கும் 570 கி.மீ நீளமுள்ள 3,505 சாலைகளைப் புதுப்பிக்க உள்ளது. இந்த பணிகள் மூன்று மாதங்களுக்குள் முடிவடையும் என எதிர்பார்க்கப்படுகிறது. நீண்ட காலமாகப் பள்ளங்கள் நிறைந்த மற்றும் மோசமாகப் பராமரிக்கப்படும் துரைசாமி சுரங்கப்பாதை, நுங்கம்பாக்கம் சுரங்கப்பாதை, மேட்லி சுரங்கப்பாதை ஆகியவற்றிலும் சாலைகள் அமைக்கப்படவுள்ளன.
Click it and Unblock the Notifications
Sign in with Google