“எள்ளு வய பூக்களையே” பாடலுக்கு அங்கீகாரம், தமிழக அரசு விருதுக்காக, ஜிவி பிரகாஷ் பற்றி சைந்தவி போஸ்ட்

சென்னை: தமிழ்நாடு அரசின் சார்பில் அறிவிக்கப்பட்ட அரசு திரைப்பட விருதுகள் பட்டியலில், சிறந்த பின்னணி பாடகிக்கான விருது, 'அசுரன்' திரைப்படத்தில் இடம்பெற்ற "எல்லு வய பூக்களையே" பாடலுக்காக பாடகி சைந்தவிக்கு வழங்கப்பட்டுள்ளதாக அறிவிக்கப்பட்டுள்ளது.

இந்த அறிவிப்பைத் தொடர்ந்து, சைந்தவி தனது சமூக வலைதளப் பக்கத்தில் ஒரு நீண்ட பதிவை வெளியிட்டு, இந்த பாடலுக்கு தன்னை தேர்வு செய்ததற்காகவும், வாய்ப்பு அளித்ததற்காகவும் இசையமைப்பாளர் ஜி.வி. பிரகாஷ் குமாருக்கு மனமார்ந்த நன்றி தெரிவித்துள்ளார்.

அந்த பதிவில், தமிழக அரசுக்கும், விருது தேர்வு குழுவினருக்கும் தனது நன்றியை தெரிவித்த சைந்தவி, "எல்லு வயா பூக்களையே" பாடலுக்காக தனக்கு ரசிகர்கள் இதுவரை அளித்து வந்த அன்பும் பாராட்டும் மிகுந்த பணிவுடன் ஏற்றுக்கொள்வதாக குறிப்பிட்டுள்ளார்.

சைந்தவி பதிவு

மேலும், இந்த பாடலுக்கு தன்னை நம்பி வாய்ப்பு அளித்த ஜி.வி. பிரகாஷ் குமார், இயக்குநர் வெற்றிமாறன், தயாரிப்பாளர் கலைப்புலி எஸ். தாணு, நடிகர் தனுஷ், பாடலாசிரியர் யுகபாரதி உள்ளிட்ட 'அசுரன்' படக்குழுவினருக்கும் அவர் தனது நன்றியை தெரிவித்துள்ளார். தனது குடும்பத்தினர், நண்பர்கள் மற்றும் ரசிகர்கள் தொடர்ந்து அளித்து வரும் ஆதரவே தன்னை இன்றும் இந்த பயணத்தில் நிலைத்திருக்க வைக்கிறது என்றும் அந்த பதிவில் சைந்தவி குறிப்பிட்டுள்ளார்.

சைந்தவி யார்

சைந்தவி தமிழ் திரையுலகில் பல ஆண்டுகளுக்கும் மேலாக பாடி வரும் முக்கியமான பின்னணி பாடகிகளில் ஒருவராக இருக்கிறார். இசையமைப்பாளர்கள் ஏ.ஆர். ரஹ்மான், இளையராஜா, யுவன் ஷங்கர் ராஜா, ஜி.வி. பிரகாஷ் குமார் உள்ளிட்ட பலரின் இசையில் பாடியுள்ளார். மெலோடி, ஃபோக், கிளாசிக்கல் என பல்வேறு பாணிகளில் பாடி தனது திறமையை நிரூபித்து இருக்கிறார்.

"எல்லு வயா பூக்களையே" , விழிகளில் ஒரு வானவில், பிறை தேடும் நிலவிலே போன்ற பாடல்கள் அவருக்கு ரசிகர்களிடையே தனி அடையாளத்தை உருவாக்கிக் கொடுத்தன.

ஜி.வி. பிரகாஷ் - சைந்தவி

சைந்தவி - ஜி.வி. பிரகாஷ் குமார் இருவரும் சிறுவயதிலிருந்தே பழக்கமானவர்கள் தான். நீண்ட கால நட்புக்குப் பிறகு காதலித்து திருமணம் செய்து கொண்டனர். இவர்களின் காதலும் திருமணமும் ரசிகர்களிடையே பெரும் வரவேற்பையும் கவனத்தையும் பெற்றது. பின்னர் சில ஆண்டுகளுக்குப் பிறகு இருவரும் பரஸ்பர சம்மதத்தின் அடிப்படையில் விவாகரத்து பெற்றனர்.

இந்த பிரிவு செய்தி ரசிகர்களுக்கு அதிர்ச்சியளித்தாலும், இருவரும் எந்த இடத்திலும் ஒருவரை ஒருவர் குறை சொல்லாமல், பழி சுமத்தாமல், மரியாதையுடன் பிரிந்த விதம் பலரின் பாராட்டை பெற்றது.

விவாகரத்துக்கு பிறகும் தொடரும் நட்பு

விவாகரத்துக்குப் பிறகும் சைந்தவி மற்றும் ஜி.வி. பிரகாஷ் இருவரும் நல்ல நண்பர்களாகவே பழகி வருவது பலராலும் கவனிக்கப்படுகிறது. பொதுவெளியில் ஒருவரைப் பற்றி ஒருவர் அவதூறாக பேசாததும், சமூக வலைதளங்களில் கூட மரியாதையுடன் அணுகுவதும் இவர்களின் முதிர்ச்சியை காட்டுவதாக ரசிகர்கள் கூறி வருகின்றனர்.

இசை தொடர்பான விஷயங்களில் ஒருவருக்கொருவர் ஆதரவாக இருப்பதும், தொழில்முறை ரீதியாக ஒருவரின் திறமையை மற்றொருவர் மதிப்பதும் இவர்களுக்குள் இன்னும் நல்ல ஒற்றுமை இருப்பதை வெளிப்படுத்துகிறது.

சைந்தவி, 'அசுரன்' பாடலுக்கான விருதுக்காக ஜி.வி. பிரகாஷ்க்கு நன்றி தெரிவித்த பதிவு, இவர்களுக்குள் விவாகரத்துக்குப் பிறகும் இருக்கும் மரியாதை மற்றும் நல்லுறவை மீண்டும் ஒருமுறை வெளிச்சத்துக்கு கொண்டு வந்துள்ளது. காதலித்து திருமணம் செய்து, பின்னர் பிரிந்தாலும், ஒருவரை ஒருவர் மதித்து, நட்பாக பழக முடியும் என்பதற்கு சைந்தவி - ஜி.வி. பிரகாஷ் ஜோடி ஒரு நல்ல எடுத்துக்காட்டாகவே ரசிகர்கள் மத்தியில் பேசப்படுகிறது.

மொத்தத்தில், தமிழக அரசு விருதில் சைந்தவியின் "எல்லு வய பூக்களையே" பாடலுக்கு கிடைத்த அங்கீகாரம் ஒருபுறம் அவரது இசைப் பயணத்திற்கு கிடைத்த முக்கியமான மரியாதையாக பார்க்கப்படும் நிலையில், மறுபுறம் ஜி.வி. பிரகாஷ் - சைந்தவி இருவருக்குள்ள முதிர்ச்சியான உறவு மீண்டும் சமூக வலைதளங்களில் பாராட்டைப் பெறும் காரணமாகவும் மாறியுள்ளது.