'பாட்டம் பையிங்' இந்தியாவில் தங்கம் விலையை.. அடியோடு மாற்றிய அந்த சக்தி.. ஒரே நாளில் பெரிய ட்விஸ்ட்

சென்னை: கடந்த சில நாட்களாக தொடர்ந்து சரிவைச் சந்தித்து வந்த தங்கம் மற்றும் வெள்ளி விலைகள், செவ்வாய்க்கிழமை (பிப்ரவரி 3) அன்று அதிரடியாக உயர்ந்து முதலீட்டாளர்களை ஆச்சரியத்தில் ஆழ்த்தியுள்ளன. நேற்று இரவு அமெரிக்க சந்தையில் கூட தங்கம் விலை உயர்ந்தது. இந்திய மல்டி கமாடிட்டி எக்ஸ்சேஞ்சில் (MCX) வெள்ளி விலை ஒரே நாளில் 13% க்கும் மேல் அதிகரித்துள்ளது.

வெள்ளி விலையில் பெரும் ஏற்றம்

மார்ச் மாத டெலிவரிக்கான வெள்ளி ஒப்பந்தங்கள் செவ்வாயன்று 13.4% உயர்ந்து, ஒரு கிலோ ₹2,68,025 என்ற உச்சத்தை தொட்டது. திங்கட்கிழமை சந்தை முடிவில் ஒரு கிலோ வெள்ளி ₹2,36,261 ஆக இருந்தது குறிப்பிடத்தக்கது.

தங்கத்தைப் பொறுத்தவரை, 10 கிராம் தங்கம் 6.3% உயர்ந்து ₹1,53,200 என்ற அளவை எட்டியது. இது திங்கட்கிழமை விலையான ₹1,43,991-ஐ விட சுமார் ₹9,000 அதிகமாகும்.

எக்ஸ்சேஞ்ச் ட்ரேடட் ஃபண்ட் (ETF) நிலவரம்

எதிர்பாராத இந்த விலை உயர்வால் தங்கம் மற்றும் வெள்ளி தொடர்பான முதலீட்டுத் திட்டங்களும் (ETFs) நல்ல லாபத்தைக் கண்டுள்ளன. என்.எஸ்.இ (NSE) சந்தையில் டாடா சில்வர் இ.டி.எஃப் (Tata Silver ETF) 15.6% உயர்ந்தது. அதேபோல், எச்.டி.எஃப்.சி (HDFC) சில்வர் இ.டி.எஃப் 18% மற்றும் நிப்பான் இந்தியா சில்வர் இ.டி.எஃப் 15% வரை லாபம் ஈட்டின. ஐ.சி.ஐ.சி.ஐ புருடென்ஷியல், எஸ்.பி.ஐ மற்றும் குரோ (Groww) போன்ற நிறுவனங்களின் வெள்ளி திட்டங்களும் 16% வரை உயர்வு கண்டன. தங்கம் தொடர்பான இ.டி.எஃப் திட்டங்கள் சராசரியாக 5% க்கும் மேல் உயர்ந்து காணப்பட்டன.

கடந்த வாரத்தின் விலை மாற்றங்கள்

கடந்த வாரம் முழுவதும் தங்கம் மற்றும் வெள்ளி சந்தை ஒரு ராட்சத ஊஞ்சலில் பயணிப்பது போலவே இருந்தது. ஜனவரி 29, வியாழக்கிழமை அன்று, சர்வதேச பதற்றங்கள் காரணமாக வெள்ளி ஒரு கிலோ ₹4,20,048 என்ற வரலாற்றுச் சாதனை விலையை எட்டியது. அதேபோல் தங்கம் 10 கிராம் ₹1,83,962 என்ற உச்சத்தைத் தொட்டது.

ஆனால், இந்த உச்சத்தைத் தொட்ட அடுத்த நாளே (வெள்ளிக்கிழமை), லாபத்தைப் பதுக்க முதலீட்டாளர்கள் ஆர்வம் காட்டியதால் விலை மளமளவென சரிந்தது. வெள்ளி ஒரே நாளில் 26.9% சரிந்து அதிர்ச்சி அளித்தது.

"அமெரிக்க டாலரின் மதிப்பு வலுவடைந்தது மற்றும் ஈரான்-அமெரிக்கா இடையிலான பதற்றம் தணிந்தது போன்ற காரணங்களால் தங்கம் மற்றும் வெள்ளி விலை கடந்த சில நாட்களாக சரிவைச் சந்தித்தன," என மோதிலால் ஓஸ்வால் நிதி நிறுவனத்தின் ஆய்வாளர் மனவ் மோடி தெரிவித்துள்ளார்.

விலை உயரக் காரணம் என்ன?

தொடர்ந்து மூன்று நாட்களாக விலை சரிந்ததால், குறைந்த விலையில் தங்கம் மற்றும் வெள்ளியை வாங்க முதலீட்டாளர்கள் ஆர்வம் காட்டினர். இந்த 'பாட்டம் பையிங்' (Bottom Buying) எனப்படும் குறைந்த விலையில் வாங்கும் உத்தியே செவ்வாய்க்கிழமை விலையேற்றத்திற்கு முக்கியக் காரணமாகப் பார்க்கப்படுகிறது. நீண்ட கால நோக்கில் தங்கம் மற்றும் வெள்ளி இன்னும் உயரும் என்றே சந்தை வல்லுநர்கள் கணித்துள்ளனர்.

அடுத்தது என்ன?

தங்கம், வெள்ளி உள்ளிட்டவற்றின் விலை வரும் நாட்களில் அமெரிக்காவின் பொருளாதாரத் தரவுகளைப் பொறுத்தே அமையும். குறிப்பாக அமெரிக்காவின் வேலைவாய்ப்பு தரவுகள், வேலையில்லா திண்டாட்ட விகிதம் மற்றும் அமெரிக்க பெடரல் வங்கி அதிகாரிகளின் பேச்சுகள் சந்தையில் மாற்றத்தை உண்டாக்கும் என எதிர்பார்க்கப்படுகிறது.

தற்போது விலை மீண்டும் உயரத் தொடங்கியுள்ளதால், நகை வாங்குபவர்கள் மற்றும் முதலீட்டாளர்கள் சந்தையை உன்னிப்பாகக் கவனித்து வருகின்றனர்.

English summary

Precious Metals Rebound: Gold and Silver Stage Sharp Recovery After Multi-Day Slump