Kollu: உடல் எடையை சட்டென குறைக்கும் கொள்ளு! நாள்பட்ட கொழுப்பை கரைக்க இப்படி சாப்பிடுங்க!

தமிழர் பாரம்பரிய உணவுகளில் கொள்ளு தானியத்திற்கு எப்போதும் தனி இடம் உண்டு. "இளைத்தவனுக்கு எள்ளு, கொழுத்தவனுக்கு கொள்ளு" என்ற பழமொழி சும்மா சொல்லவில்லை. உடலில் தேங்கியுள்ள தேவையற்ற கொழுப்பைக் கரைப்பதில் கொள்ளு மிகச்சிறந்த மருந்தாகச் செயல்படுகிறது. இதில் புரதம், நார்ச்சத்து மற்றும் இரும்புச்சத்து போன்ற அத்தியாவசிய ஊட்டச்சத்துக்கள் மிக அதிக அளவில் நிறைந்துள்ளன.

நவீன கால வாழ்க்கை முறையில் உடல் பருமன் என்பது பெரும் சவாலாக உள்ளது. இன்று குழந்தைகள் ஜங்க் உணவுகளை சாப்பிட்டுவிட்டு உடல் பருமனுடன் இருக்கிறார்கள். இதற்கு கொள்ளு ஒரு இயற்கை தீர்வு. இது உடலில் வெப்பத்தை உண்டாக்கி வளர்சிதை மாற்றத்தை (Metabolism) வேகப்படுத்துகிறது. இதனால் உடலில் உள்ள கெட்ட கொழுப்புகள் மிக எளிதாக எரிக்கப்படுகின்றன.

கொழுப்பை கரைக்கும் கொள்ளு: அறிவியல் பின்னணி

கொள்ளு தானியத்தில் உள்ள அதிகப்படியான நார்ச்சத்து செரிமானத்தை மெதுவாக்குகிறது. இதனால் நீண்ட நேரம் பசி எடுக்காமல் வயிறு நிறைந்த உணர்வைத் தருகிறது. இது தேவையற்ற நொறுக்குத் தீனி உண்பதைத் தவிர்க்க உதவுகிறது. மேலும் இதில் உள்ள பீனால் கலவைகள் கொழுப்பு செல்கள் உருவாவதைத் தடுக்கின்றன. இது ரத்தத்தில் உள்ள சர்க்கரை அளவையும் சீராக வைத்திருக்க உதவுகிறது.

தினமும் காலையில் வெறும் வயிற்றில் கொள்ளு வேகவைத்த தண்ணீரை குடிக்கலாம். அல்லது கொள்ளு பொடியை உணவில் சேர்த்துக் கொள்ளலாம். இது உடலில் உள்ள நச்சுக்களை வெளியேற்றி ரத்த ஓட்டத்தை சீராக்குகிறது. குறிப்பாக அடிவயிற்று கொழுப்பைக் குறைக்கிறது. உடனே கொள்ளு சூடு என்பதால் உடல் சூட்டை கிளப்பிவிடுமோனு பயப்படாதீங்க. வாரத்தில் மூன்று நாட்கள் கொள்ளு சேர்த்துக் கொள்ளலாம்.

நீரிழிவு மற்றும் இதய ஆரோக்கியம்

கொள்ளு குறைந்த கிளைசெமிக் குறியீடு கொண்ட ஒரு உணவாகும். இது ரத்தத்தில் சர்க்கரை அளவு திடீரென உயர்வதைத் தடுக்கிறது. இதனால் நீரிழிவு நோயாளிகள் தாராளமாக இதனை சாப்பிடலாம். மேலும் இது ரத்தத்தில் உள்ள எல்.டி.எல் (LDL) எனப்படும் கெட்ட கொழுப்பை குறைக்கிறது. இதன் மூலம் இதய நோய்கள் ஏற்படும் அபாயம் பெருமளவு குறைகிறது.

இதயத் தமனிகளில் கொழுப்பு படிவதைத் தடுத்து ரத்த அழுத்தத்தைச் சீராக வைக்கிறது. இதில் உள்ள ஆன்டி-ஆக்ஸிடன்ட்கள் செல்கள் சேதமடைவதைத் தடுத்து இளமையைத் தக்க வைக்கின்றன. சிறுநீரகக் கற்களைக் கரைப்பதிலும் கொள்ளு முக்கியப் பங்கு வகிக்கிறது. இது சிறுநீரகச் செயல்பாட்டை மேம்படுத்தி நச்சுக்களை வெளியேற்ற உதவுகிறது.

யாரெல்லாம் கொள்ளு தவிர்க்க வேண்டும்?

கொள்ளு உடலில் அதிக வெப்பத்தை உண்டாக்கும் தன்மை கொண்டது. எனவே சில குறிப்பிட்ட உடல்நிலை உள்ளவர்கள் இதனைத் தவிர்ப்பது நல்லது. அவர்கள் யார் என்பதை கீழே உள்ள பட்டியலில் காணலாம்:

• கர்ப்பிணிப் பெண்கள்.
• உடல் சூடு அதிகம் உள்ளவர்கள் மற்றும் மூல நோய் உள்ளவர்கள் .
• சிறுநீரகக் கோளாறுக்காகத் தீவிர சிகிச்சை பெறுபவர்கள் மருத்துவர் ஆலோசனை பெற்று கொள்ளு தானியத்தை எடுத்துக் கொள்ளலாம்.
• அல்சர் உள்ளவர்கள்.
• மாதவிடாய் காலங்களில் அதிக ரத்தப்போக்கு உள்ளவர்கள்.

போனஸ் டிப்ஸ்!

கொள்ளு ரசம் செய்வது மிகவும் எளிதானது மற்றும் சுவையானது. ஒரு கைப்பிடி கொள்ளுவை வறுத்து பொடி செய்து கொள்ளவும். புளித் தண்ணீரில் தக்காளி, பூண்டு, மிளகு, சீரகம் மற்றும் அரைத்த கொள்ளு பொடி சேர்த்து கொதிக்க விடவும். கடைசியாகக் கடுகு, பெருங்காயம் தாளித்து இறக்கினால் சுவையான கொள்ளு ரசம் தயார். இது சளி மற்றும் இருமலுக்கும் சிறந்த மருந்தாகும்.

பொறுப்பு துறப்பு: இந்தச் செய்தி பொதுவான தகவல்களின் அடிப்படையில் எழுதப்பட்டுள்ளது. ஏதேனும் தீவிர உடல்நலப் பாதிப்புகள் இருந்தால் அல்லது புதிய உணவு முறையைத் தொடங்கும் முன் தகுந்த மருத்துவரை அணுகி ஆலோசனை பெறுவது அவசியமாகும்.