குஜராத் மக்கள் மனநிலையை ஆராய வரும் ஜெர்மன் நிபுணர்

டெல்லி:

பூகம்பத்தால் மிக மோசமாகப் பாதிக்கப்பட்ட குஜராத் மாநிலத்தில் கோடிக்கணக்கில் மக்கள் தவித்துக் கொண்டிருக்கும் இந்த நேரத்தில் மக்களின்மன நிலையை ஆராயும் வகையில் சர்வதேச மனோத தத்துவ நிபுணர் ஒருவர் ஜெர்மனியிலிருந்து வரும் மார்ச் மாதம் குஜராத் செல்லவுள்ளார்.

குஜராத்தில் கடந்த ஜனவரி 26 ம் தேதி குடியரசு தினத்தன்று திடீரென்று ஏற்பட்ட பூகம்பத்தில் சூரத், அகமதாபாத், ராஜ்கோட், கட்ச் உள்பட பலமாவட்டங்கள் கடுமையாகப் பாதிக்கப்பட்டன. பலர் வீடுகள், உறவினர்கள் மற்றும் உடைமைகளை இழந்தனர்.

தங்களது சொந்த உறவினர்களை இழந்த மக்கள் மனதளவில் மிகவும் மோசமாகப் பாதிக்கப்பட்டுள்ளனர். பாதிக்கப்பட்ட மக்களுக்கு இந்தியாவின்பிற மாநிலங்கள் உள்பட வெளிநாட்டினரும் நிதியுதவி மற்றும் நிவாரண உதவிகள் செய்து வருகிறார்கள்.

இதுகுறித்து வேர்ல்டு விஷன் என்ற தன்னார்வ அமைப்பு, பூகம்பத்தால் பாதிக்கப்பட்ட மக்கள் மனதளவில் மிகவும் பாதிக்கப்பட்டிருப்பார்கள்.அவர்களுக்கு தொடர்ந்த மன நல ஆலோசனைகள் வழங்க வேண்டும் என்று வலியுறுத்தியுள்ளது.

இதுகுறித்து வேர்ல்டு விஷன் அமைப்பின் துணை இயக்குநர் ஜோஷி கூறுகையில், மார்ச் மாதம் ஜெர்மனியைச் சேர்ந்த மனநோய்நிபுணர் ஒருவர், குஜராத்துக்குவருவார். அவர், பூகம்பத்தால் பாதிக்கப்பட்ட பகுதிகளைப் பார்வையிடுவார். பாதிக்கப்பட்ட மக்களை சந்தித்துப் பேசுவார்.

அதற்குப்பின் பூகம்பத்தால் உறவினர்கள் மற்றும் உடைமைகளை இழந்து தவிக்கும் மக்களுக்கு எவ்விதமான சிகிச்சை அளிக்க வேண்டும் என்பதுகுறித்து ஆலோசனைகள் வழங்குவார்.

பூகம்பத்தால் மிகவும் மோசமாகப் பாதிக்கப்பட்ட கட்ச் மாவட்டத்தில் உள்ள பச்சாவ், அஞ்சார் மற்றும் ரப்பார் பகுதிகளில் ஏற்கனவே இரண்டுமுறை இந்தியா விஷன் பல நிவாரண உதவிகளைச் செய்திருக்கிறது. அதுமட்டுமின்றி பாதிக்கப்பட்ட மக்களுக்கு மனநல ஆலோசனைகளையும்வழங்கியிருக்கிறது.

தற்போது வேர்ல்டு விஷனில் வேலை செய்பவர்கள் குஜராத் பூகம்பம் குறித்து அங்கு நேரடியாகச் சென்று பார்வையிட்டு வருகிறார்கள். அவர்கள்இதுகுறித்து சமர்பிக்கும் அறிக்கைப்படி பிப்ரவரி 28 ம் தேதி முதல் அடுத்த கட்ட நடவடிக்கை குறித்து இறுதியாக முடிவு எடுக்கத் திட்டமிட்டுள்ளோம்.

பூகம்பத்தால் இடிந்து தரைமட்டமான வீடுகள், பள்ளிகள், சுகாதார மையங்கள் ஆகிவற்றை மீண்டும் கட்டத் தீர்மானித்துள்ளோம்.

இவ்வாறு ஜோஷி கூறினார்.

யு.என்.ஐ.