தூத்துக்குடி ரயில் நிலையத்திற்கு அல்-உம்மா வெடிகுண்டு மிரட்டல்

தூத்துக்குடி:

தூத்துக்குடி ரயில் நிலையத்திற்கு அல்-உம்மா இயக்கத்தினர் வெடிகுண்டு மிரட்டல் விடுத்துள்ளனர்.

தூத்தக்குடி ரயில் நிலைய அதிகாரிக்கு 2 நாட்களுக்கு முன்பு ஒரு மர்ம கடிதம் வந்தது. அதில், "தூத்துக்குடி ரயில்நிலையத்தை விரைவில் வெடிகுண்டு வைத்துத் தகர்ப்போம்" என்று மிரட்டல் விடப்பட்டிருந்தது. அந்தக் கடிதத்தில்"அல்-உம்மா பாட்ஷா பேரவை, மதுரை" என்ற முகவரி அச்சிடப் பட்டிருந்தது.

மேலும், இந்த ரயில் நிலையத்தைக் குண்டு வைத்து தகர்க்கப் போவதாக, டெலிபோன் மூலமாகவும் தொடர்ந்துமிரட்டல்கள் விடுக்கப்பட்டுள்ளன.

இதையடுத்து, கடந்த 2 நாட்களாக தூத்துக்குடி ரயில் நிலையத்தில் பாதுகாப்புப் பணிகள் தீவிரப்படுத்தப்பட்டுள்ளன. இரயில் நிலையத்திற்கு வரும் பயணிகள் உட்பட அனைவரும் தீவிர சோதனைக்குப் பிறகேஅனுமதிக்கப்படுகின்றனர்.

ரயில்வே போலீசாரும் சிறப்புப் பாதுகாப்புப் படையினரும் தொடர்ந்து சோதனை நடத்தி வருகின்றனர்.

இதற்கிடையில் இந்தக் கடிதம் எங்கிருந்து வந்தது என்பதையும், அனுப்பியவர்கள் யார் என்பது பற்றியும் போலீசார்விசாரித்து வருகின்றனர்.