ரம்ஜான்: மெரீனாவில் தொழுகைக்கு அனுமதியில்லை

சென்னை:

சென்னை மெரீனா கடற்கரையில் ரம்ஜான் சிறப்புத் தொழுகைக்கு அரசு அனுமதி வழங்காததால், தீவுத் திடலில் ரம்ஜான் கூட்டுத் தொழுகை நிகழ்ச்சி நடந்தது.

ரம்ஜான் பண்டிகை இன்று தமிழகம் முழுவதிலும் சிறப்பாக கொண்டாடப்பட்டது. சென்னையில் வழக்கமாக மெரீனா கடற்கரையில் கூட்டுத் தொழுகை நடத்தப்படும். இதில் ஆயிரக்கணக்கானோர் கலந்து கொள்வது வழக்கம்.

ஆனால் கடற்கரை அழகுபடுத்தும் திட்டத்தின் கீழ் மெரீனாவில் எந்த பொது நிகழ்ச்சியும், மத நிகழ்ச்சியும் நடத்த தடை விதிக்கப்பட்டுள்ளது. இதனால் ரம்ஜான் தொழுகை நடத்தவும் அனுமதி கிடைக்கவில்லை. இதையடுத்து தீவுத் திடலில் கூட்டுத் தொழுகை நடந்தது.

இங்கு நடந்த கூட்டுத் தொழுகையில் ஆயிரக்கணக்கான முஸ்லீம் மக்கள் கலந்து கொண்டு வழிபாடு நடத்தினர். இதுதவிர ஆயிரம் விளக்கு, திருவல்லிக்கேணி உள்ளிட்ட நகரின் பல்வேறு பகுதிகளிலும் சிறப்பு தொழுகைகள் நடந்தன.

இதேபோல, மாநிலத்தின் அனைத்துப் பகுதிகளிலும் ஈத்கா மைதானங்களிலும், பள்ளி வாசல்களிலும் ரம்ஜான் சிறப்புத் தொழுகைகள் நடந்தன.

தலைவர்கள் வாழ்த்து:

ரம்ஜான் பண்டிகையையொட்டி முதல்வர் ஜெயலலிதா, திமுக தலைவர் கருணாநிதி ஆகியோர் வாழ்த்துத் தெரிவித்துள்ளனர்.

இதுதொடர்பாக ஜெயலலிதா வெளியிட்டுள்ள வாழ்த்துச் செய்தியில், ஒரு மாத காலம் நோன்பிருந்து, உடலையும், உள்ளத்தையும் தூய்மைப்படுத்திக் கொண்டு, இறைவன் அருளால் பெற்ற பொருளில் ஒரு பங்கை ஏழை மக்களுக்கு ஈந்து, மகிழும் ஈகைத் திருநாள் இந்த ஈத் பெருநாள்.

இந்த நன்னாளில் சாந்தியும், சமாதானம் தழைக்கட்டும், சமதர்மம் ஓங்கட்டும், சகல நாடுகளிலும் சகோரத்தத்துவம் வளரட்டும் என்று கூறியுள்ளார்.

கருணாநிதி வெளியிட்டுள்ள செய்தியில், அண்ணல் நபி அருளிய போதனைகளின்படியும், திருமறை வகுத்தளித்த நெறிமுறைகளின்படியும், கடந்த முப்பது நாட்களாக பசிப்பிணி பொறுத்து நோன்பு நோற்று இன்று ஈகைத் திருநிாள் கொண்டாடி மகிழும் இஸ்லாமிய பெருமக்களுக்கு இதயமார்ந்த வாழ்த்துக்கள்.

ஆட்சியாளர்கள் நேர்மையானவர்களாக இருக்க வேண்டும் என்ற நபி பெருமானாரின் கூற்று இன்றைய காலத்திற்கும் உகந்ததாகவே இருக்கிறது என்று கூறியுள்ளார்.

மதிமுக பொதுச் செயலாளர் வைகோ வெளியிட்டுள்ள செய்தியில், சமத்துவத்தோடும், சகோதரத்துவத்தோடும், அண்டை அயலாரோடு சமூக நல்லிணக்கத்தோடும், சமய நல்லுணர்வு பேணி வாழும் இஸ்லாமிய பெருமக்களுக்கு வாழ்த்துக்கள் என்று தெரிவித்துள்ளார்.

இவர்கள் தவிர பல்வேறு தமிழக அரசியல் தலைவர்களும் ரம்ஜான் வாழ்த்துக்களைத் தெரிவித்துள்ளனர்.